Cənazə mərasimində keçmiş ABŞ prezidenti Bill Clintonun, komediya ustası Billy Crystalin və idman yazarı Bryant Gumbelin çıxış edəcəyi gözlənilir.
74 yaşında vəfat edən boks əfsanəsi Məhəmməd Əli cümə günü torpağa tapşırılacaq. Cənazə mərasimi Əlinin doğulduğu yer olan Kentucky əyalətinin Lousville şəhərində keçiriləcək. Boksçunun ailəsi Məhəmməd Əliyə vəda etmək istəyən hər kəsin mərasimə dəvətli olduğunu bildirib.

Cənazə mərasimində keçmiş ABŞ prezidenti Bill Clintonun, komediya ustası Billy Crystalin və idman yazarı Bryant Gumbelin çıxış edəcəyi gözlənilir.




Xatırladaq ki, parkinson xəstəsi olan əfsanə idmançı, ötən həftənin çərşənbə günü xəstəxanaya aparılmışdı. Məhəmməd Əli 1964-cü ildə amerikalı boksçu Sonny Listona qalib gələrək dünya çempionluğunu qazanmışdı. Əli daha sonra 3 dəfə dünya çempionu olmuşdu. 1981-ci ildə boksa əlvida deyən Əli, keçirdiyi 61 boks görüşündən 56-sı qalib olaraq başa vurmuşdu.

"Sports Illustrated" tərəfindən "Yüz ilin idmançısı", BBC tərəfindən "Yüz ilin idman adamı" seçilən Əli, sadəcə ringdəki bacarığı ilə deyil, həm də açıqlamaları və atdığı addımlarla insanların yaddaşında qalıb.

İnsan haqları müdafiəçisi və şair olar Əli, "necə xatırlanmaq istəyərsiniz?" sualına "Xalqını heç vaxt satmayan bir insan olaraq. Amma əgər bu mənim üçün çoxdursa sadəcə yaxşı bir boksçu olaraq" deyə cavab vermişdi.

Məşhur boksçu 22 yaşında ilk dəfə dünya çempionu olduqdan sonra müsəlman olmuş və "köləlik adım" dediyi Cassius Marcellus Clay adını, dəyişdirərək özünə Məhəmməd Əli adını götürmüşdür.


Bizimyol.info