Gənc Politoloqlar Mərkəzi “İctimai iştirakçılığın təmin olunması, şəffaflığın və ictimai nəzarətin gücləndirilməsində gənclərin rolu” - Gənclər Düşərgəsinin təşkili layihəsinin icrasına start verdi.

Azərbaycan Respublikası Prezidenti yanında Qeyri-Hökumət Təşkilatlarına Dəstək Şurasının maliyyə dəstəyi ilə həyata keçirilən təlim proqramı dörd gün davam etmişdir. Layihənin əsas məqsədi gənc liderlərə şəffaflıq, hesabatlılıq, ictimai iştirak və məsuliyyətli vətəndaş prinsiplərini aşılayan bilik və bacarıqları tədris etməklə onların açıq və məsuliyyətli idarəetmənin müdafiəçiləri olmasına nail olmaqdır.

Dörd günlük düşərgə müddətində 20 gənc təlim və müzakirələr ilə yanaşı interaktiv tədris sessiyaları və praktiki oyunlardan ibarət proqramdan da yararlandılar.

“Hüquqi dövlətdə demokratik institutların möhkəmləndirilməsində ictimai nəzarət və şaffaflıq kimi prinsiplərin rolu mühümdür. İctimai nəzarət demokratik institutların əsas atributlarından olub, əsasən sosial davranış qaydalarını tənzimləməklə, cəmiyyətdə davranış normalar sistemini təsbit edir.İctimai nəzarətin gücləndirilməsi və şəffaflığın artırılmasında ictimai sektor ilə yanaşı vətəndaş cəmiyyəti institutları - QHT, KİV, həmkarlar ittifaqları, vətəndaşların təşəbbüs qrupları və bələdiyyələrin məhəllə komitələri və gənclərin rolu əsasdır”, Gənc Politoloqlar Mərkəzinin rəhbəri İkin Əliyev konfransın açılışında bildirdi.

Gənc Politoloqlar Mərkəzi 1997-ci ildən fəaliyyət göstərir və təşkilatın əsas məqsədi hüquqi-demokratik cəmiyyətin fəal iştirakçıları olan gənclərin siyasi və hüquqi təhsil və biliklərinin artırılmasına və təhkimləşdirilməsinə dəstək olmaqdan ibarətdir.