142 yaşın mübarək!

Ölkədə mətbuatın əsasını Həsən bəy Zərdabi qoydu; “Əkinçi” qəzetini nəşr etməklə. Hazırda qəzetin nəşrə başladığı 22 iyul Azərbaycanda Milli Mətbuat Günü kimi qeyd olunur.


Bu yolda o, böyük çətinliklər çəkdi, çünki Bakıda ana dilində “Əkinçi” qəzetinin nəşr edilməsi üçün icazə almalıydı, o icazəni aldı da. Axı məqsədi olanların əziyyətlərə baxmayaraq ona çatması üçün vasitələri də olur. Bu qəzetin ilk nömrəsi 1875-ci il iyulun 22-də çapdan çıxdı. “Əkinçi” qəzeti 1875-1877-ci illər ərzində fəaliyyət göstərərək yalnız 56 nömrəsi işıq üzü görə bildi. Çünki çar Rusiyası qəzetin insanların maariflənməsində müstəsna rol oynadığını bildi və beləcə, qəzetin nəşri dayandırıldı. Qəzet iki il fəaliyyətdə olsa da xalqın milli oyanışında, maariflənməsində, yenilikçi düşünməyində böyük rol oynadı.

Mətbuat üçün söz və ifadə azadlığının hansı dərəcədə önəmli olduğunu bilirik, bu səbəblə də 1998-ci ilin avqustunda senzuranın ləğvi isə Azərbaycanda mətbuatın inkişafına təkan verdi.

Hazırda ölkədə müxtəlif qəzet və jurnallar nəşr olunur, informasiya texnologiyaları inkişaf edir.
Sevinməli olduğumuz min səbəbdən birincisi elə bu günün qeyd olunmasıdır. Çünki 1991-ci ilə kimi “Pravda” qəzetinin yarandığı 5 may sovet Azərbaycanında Mətbuat və radio günü kimi qeyd olunurdu. Həmin vaxtlar Milli Məclisin üzvü olan Vətəndaş Birliyi Partiyasının sədri Sabir Hacıyev Prezident Aparatında işləyirdi. O, “Əkinçi” qəzetinin nəşrə başladığı günü Milli Mətbuat günü kimi qeyd etməyi təklif edir və təklif qəbul olunur. Elə 1991-ci ildə qəbul edilən həmin qərarda 22 iyulun Mətbuat günü kimi qeyd olunması öz əksini tapdı.

Mətbuat nümayəndələri, gününüz mübarək!

Butov.az