18-01-2024, 01:59
TƏBİB əhali arasında yayılan xəstəliklə bağlı açıqlama verdi
Hər il olduğu kimi, payız-qış mövsümündə havaların soyuması ilə əlaqədar tənəffüs yolu infeksiyalarında artım müşahidə edilir.
Bu barədə TƏBİB-dən məlumat verilib.
Qeyd edilib ki, son günlərdə insanlar arasında boğaz qıcıqlanması, boğaz ağrısı, yüksək olmayan temperatur, oynaqlarda ağrı, burun tutulması simptomları ilə müşayiət olunan tənəffüs yolu infeksiyalarından şikayətlər artıb.
"Hətta bəzi xəstələrdə iybilmə, dadbilmə duyğusunun itirilməsi də müşahidə olunur. Xəstələr bunun COVID-19 virusunun yeni variantlarından biri olduğunu düşünərək təşviş keçirirlər, lakin buna heç bir əsas yoxdur. Tənəffüs yolu infeksiyalarının (qrip, kəskin respirator xəstəliklər və s.) bəzilərində iybilmə və dadbilmə duyğusunun itirilməsi şikayətləri müşahidə edilə bilər. Mövsümlə əlaqədar sadaladığımız şikayətlərlə həkimə müraciət sayında artım olması, hər zamankı kimi, gözləniləndir. Payız-qış fəsli daxil olandan bəri, TƏBİB respirator infeksiyaların artacağı ilə bağlı dəfələrlə əhaliyə çağırışlar edib, respirator gigiyena qaydalarına əməl etmələri tövsiyə olunub, qrip vaksinlərinin tətbiqi həyata keçirilib və keçirilməkdə davam edir", - deyə əlavə edilib.
17-01-2024, 17:53
Bakının bu qəsəbələrində Hepatit “A” virusu xəstəliyi yayıldı
Bakı şəhəri Suraxanı rayonu Əmircan və Bülbülə qəsəbələrinin əhalisi arasında 2023-cü ilin dekabr ayından başlayaraq yoluxucu Hepatit “A” virusu xəstəliyi yayılıb.
Bu barədə Səhiyyə Nazirliyinin Respublika Gigiyena və Epidemiologiya Mərkəzi məlumat yayıb.
Bildirilib ki, xəstəliyi yayılması ilə bağlı tədbirlər davam etdirilir:
"Aparılan profilaktik tədbirlər ilə əlaqədar “Azərsu” ASC-nin mütəxəssisləri ilə birgə mərkəzləşdirilmiş içməli su şəbəkəsində laborator müayinə üsullarının tətbiqi ilə monitorinqlər keçirilir. Profilaktik tədbir olaraq su şəbəkəsində qalıq xlorun müvəqqəti yüksəlməsi ilə bağlı Əmircan və Bülbülə qəsəbələrini qidalandıran +54 Ramana mərkəzi su anbarının ərazisində 1 ədəd xlor tərkibli reagent dozalayıcı nasos quraşdırılıb. Eyni zamanda, “Azərsu” ASC-nin Suraxanı rayon Sukanal idarəsinin mütəxəssisləri rayon GEM-nin əməkdaşları ilə birgə fərdi yaşayış evlərində yerləşən ehtiyat su çənlərinin yuyulub dezinfeksiya edilməsi ilə bağlı tədbirlər həyata keçirilib", - məlumatda vurğulanıb.
16-01-2024, 23:37
Qızılcaya yoluxanlarən sayı getdikcə artır
Cəlilabad rayonu üzrə ötən ilin noyabr ayından bugünədək 339 nəfər qızılca virusuna yoluxub.
Onlardan 236 nəfəri 18 yaşdan kiçiklər və 103 nəfəri 18 yaşdan böyüklərdir.
Hazırda aktiv xəstə sayı 73 nəfərdir. Onlardan 69 nəfəri ambulator, 4 nəfəri isə stasionar şəraitdə müalicə alır.
Ötən ilin dekabrın 1-dən peyvənd vurulan uşaqların sayı 2 104 nəfərdir.
Ötən gün 17 nəfər bu virusa yoluxub. Hələlik bu rəqəm rayon ərazisində gündəlik yoluxma ilə bağlı qeydə alınmış ən yüksək say hesab olunur. Yoluxma sayının artımı havaların kəskin soyuması ilə əlaqədar olması bildirilir.
13-01-2024, 05:50
BİR ANA TANIYIRAM
Bir ana tanıyıram, elə mənim özüm kimi. Üzü gülər, dili şirin, amma qəlbi paramparça.
Bir ana tanıyıram elə mənim özüm kimi. İradəsi poladdan möhkəm, dözümü ümman, göz yaşı dərya.
Fərqimiz nədədir, bilmirəm. Dərdimizin ağırlığında, yaramızın dərinliyində, ya nədə...
Onu yaxşı bilirəm ki, övlad dərdinin ağırı, yüngülü yoxdur. Bu elə yaradır ki, nə öldürür, nə yaşadır. Yara var sağalır, yara var öldürür, yara da var ki, bir ömür süründürür.
25 yaşlı balasını körpə uşaq kimi açıb bələyən bu müqəddəs qadını mən qiyabi tanıyırdım. Bacım Sahibə onun haqqında həmişə ağız dolusu danışır. Bu yaxınlarda bacımla danışanda, Kəmalə xanım oğluna ad günü keçirir dedi. Məkanı öyrəndim və təbrik etmək qərarına gəldim. İlkinin ayağı yeriməsə də ağılı üstündədir. Hər şeyi anlayır, danışır, ürək sözlərini bölüşür. Gecəni yata bilmədim. Gah İlkini, gah da öz Vüqarımı düşündüm. Nə fayda...
“ Yüz fikir bir borcu ödəməz” deyib atalar.
İşin arasında vaxt tapıb evə, balasını görməyə tələsən, sonra yenə işə dönən bu qadın ürəyini balasının yanında saxlayır... Allah heç kəsə sağalmaz yara verməsin. Bizi bir – birimizdən çox kim anlayar ki...
Göz yaşlarımı saxlaya bilmədim. Ürəyimin ağrısı vərəqlərə töküldü.
Gözləri dəryadı, qurumur yaşı,
Dərdindən vədəsiz ağarıb başı.
Sənsən Kəmalənin yadı- yaddaşı,
Sənsən Kəmalənin dünyası, İlkin.
Ad gününə getdim, yazdığım bir neçə bəndlik şeirlə. Axı İlkin oxumağı, yazmağı bacarır. Yəqin ki, bu şeir onun üçün ərməğan olacaq deyə düşündüm. Elə də oldu. Mənim gəlişim onları çox sevindirdi.
Süfrənin başında oturan bu boylu – buxunlu oğlanın gözləri gülürdü. Sanki öz taleyinə meydan oxuyurdu bu gözlər.
20-dən çox qonağı olan bu məclis çox şən keçsə də hərdən anasının doluxsunan gözləri nəzərimdən qaçmırdı. Göz yaşlarımı güclə saxlayırdım.
Dünyaya sığmayan dərdini çiyinlərində daşıya bilən analar ağlaya - ağlaya gülməyi, yaşaya – yaşaya ölməyi də bacarır. Mən bunu 33 ildir ki bilirəm.
Anadan etibarlı, anadan dözümlü ikinci bir varlıq yoxdur bu dünyada. Ana məhəbbəti çəkiyə gəlməz, ölçüyə sığmaz. Ana ürəyində olan hikmət, məhəbbət, dözüm oxunmamış kitab, açılmamış sirdi, sehirdi.
Mən sona kimi otura bilmədim. Məclisdən tez ayrıldım. Axı məni də öz balam gözləyirdi. 33 yaşında 2 yaşlı körpədən seçilməyən, dilsiz-ağızsız balam.
Maşında oturanda özümdən ixtiyarsız göz yaşlarım yanağmdan sinəmə doğru yol açdı.
Anaları qoruyun əziz övladlar. Bu dünyada heç kəs sizi ana qədər sevə bilməyəcək! Ana məhəbbəti sonsuzdur, qarşılıqsızdır. Kəmalə xanıma can sağlığı arzu edirəm. Var ol səni, müqəddəs ana!
Südabə İRƏVANLI
AYB - nın fəxri üzvü,
Aşıq Pəri Məclisinin sədr müavini.
8-01-2024, 17:55
TƏBİB: “Azərbaycanda istifadə olunan peyvənd alfa ştammına qarşıdır”
İlk istifadə etdiyimiz peyvəndlər virusun alfa ştammına qarşı istifadə edilmişdi. Təbii ki, heç nə yerində dayanmır, peyvənd istehsal edən şirkətlər bunun üzərində çalışırlar.
Bunu TƏBİB-in Tibbi xidmətlərin inkişafı departamentinin rəhbəri Yaqut Qarayeva deyib.
O qeyd edib ki, ABŞ-də xüsusilə 2023-2024 il mövsümü üçün son variantlar nəzərə alınaraq COVID peyvəndi hazırlanıb.
"Azərbaycanda istifadə olunan peyvənd alfa ştammına qarşıdır. Ancaq virus eyni virusdur, sadəcə onun zülallarında müəyyən dəyişikliklər olur və buna mutasiya deyirik. Bu, orqanizmin immun sistemi üçün yeni deyil, əgər peyvənd vurulubsa, artıq immun sistemi onu tanıyır. Qrip peyvəndində də belədir.
Hər il yeni qrip peyvəndi istifadə edilir, artıq onun istehsalı çox inkişaf etdiyi üçün belə bir praktika var. Peyvəndlərin də üzərində ilboyu epidemioloji nəzarət aparılır, dünyanın müxtəlif ölkələrindən nümunələr götürülərək məlumat toplanılır ki, gələcək mövsümdə hansı ştammlar daha çox yayıla bilər. Həmin məlumatlar əsasında yeni peyvəndlər hazırlanır. Bu, qrip virusunda belə idi, artıq COVID-də də var. Qriplə COVID-in yeni ştammı bir peyvənddə olması üzərində iş gedir və gələcəkdə bir peyvənd vurduraraq hər iki virusdan qorunmaq mümkün olacaq", - deyə Y. Qarayeva əlavə edib.
18-12-2023, 16:46
Qripə qarşı peyvəndləməyə başlanılıb - TƏBİB
Qripə qarşı peyvəndləməyə yeni başlanılıb.
Bunu Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov jurnalistlərə açıqlamasında deyib.
O bildirib ki, qripə qarşı peyvəndlər Səhiyyə Nazirliyi tərəfindən ölkəyə gətirilib və artıq prosesə başlanılıb:
"Bununla bağlı statistik rəqəmlər bir ay sonra açıqlana bilər".
16-12-2023, 14:40
Həkimlik anddır, vicdandır, müqəddəsdir
Həyatını insanların, millətinin sağlamlığına həsr etməyi, bu yolda gecə-gündüz vicdanla çalışmağı, həkimlik andına sadiq qalmağı həyat amalı seçən insanlar həm də daha fədakar, daha cəsarətli olurlar desək, yəqin ki, yanılmarıq. Yüksək ixtisaslı, qayğıkeş həkimlərimizin bacarığı və çalışqanlığı sayəsində səhhətindəki problemlərlə bağlı onlara üz tutan hər bir vətəndaş öz sağlamlığına qovuşub normal həyatına davam edir, həkimlərə isə duaçı olurlar.
Həkimlik peşəsi harada sevilirsə, orada insanlıq sevgisi də var. Təcrübələr göstərir ki, hansı peşənin arxasınca gedirsən get, peşənə ürək qızdırmalısan. Xidmət etdiyin xalqa, onun hər bir üzvünə bu ürəkdə böyük eşq yuva salmalııdr. Belə keyfiyyət sahibi olan hər kəs öz peşəsinin ustadı olur, sevilir – Solmaz Orucova kimi.
Orucova Solmaz Balasaday qızı 2 aprel 1980-ci ildə Şamaxı rayonunun Sündü kəndində anadan olub. 1998-2004-cü illərdə Azərbaycan Tibb Universitetinin “Müalicə işi” fakültəsində təhsil alıb. Həmin ildən əmək fəaliyyətinə başlamış, 5 saylı Şəhər Poliklinikasında, “Bioloji Təbabət” klinikasında çalışmışdır. 2005-ci ildə dəri-zöhrəvi üzrə internatura proqramı keçmiş və öz sahəsi üzrə ixtisaslaşaraq fəaliyyətini davam etdirmişdir. 2016-cı ildən Binəqədi rayonu 15 saylı Şəhər Poliklinikasında dermatoveneroloq kimi insanların sağlamlığının keşiyində durur. Ona üz tutan hər bir vətəndaşa fərdi yanaşır, onların problemlərini səbirlə, təmkinlə dinləyir və yalnız müalicə vasitələriylə kifayətlənməyərək, lazımi tövsiyələr verir, doğru istiqamət göstərməklə, onlara həm də mənəvi dayaq durur.
Solmaz Orucova məhz o həkimlərdəndir ki, istər iş kollektivi, istər xəstə yaxınları həmişə ondan razılıq edirlər. O, öz biliyi, savadı, peşəkarlığı ilə hər bir şəxsə fərdi yanaşmaqla əlindən gələnin ən yaxşısını etməyə çalışır.
Bütün peşələr kimi, həkimlik sənəti də daim öyrənməyi, təkmilləşməyi, müasir üsullara yiyələnməyi tələb edən bir sahədir. Buna görə daim öz üzərində işləməyə çalışan, tibbin yeniliklərini araşdıran Solmaz həkim ona üz tutan hər bir şəxsə daha faydalı, daha effektiv müalicə üsulları tətbiq edərək müsbət nəticələr görməyə çalışır ki, bu nəticələr də insanların onun müalicəsinə, fəaliyyətinə olan inamı, sevgi və hörmətidir. Bunu Solmaz həkim öz fəaliyyəti, vicdanla, dürüst çalışmağı ilə qazanıb.
Çalışdığı bütün kollektivlərdə sevilən, hörmət sahibi olan Solmaz həkim həm də qayğıkeş ana, mehriban, gülərüz həyat yoldaşı, ailə dəyərlərinə xüsusi bağlı olan nümunəvi xanımdır. Həyat yoldaşı - 7 saylı Şəhər Poliklinikasında çalışan Şövqi Zeynalov xalqımıza sədaqətlə xidmət edən, ona ümidlə üz tutan insanlara yaşama sevinci bəxş edən peşəkar həkimlərimizdəndir. Nümunəvi həkim ailəsində böyüyən övladların da valideynlərindən örnək götürərək vətənimizin gələcəyi üçün savadlı kadr olacağına inanır, Solmaz həkimə çətin və məsuliyyətli fəaliyyətində, eləcə də şəxsi həyatında uğurlar arzulayırıq.
G.SÜLEYMANLI
“Bütöv Azərbaycan”
12-12-2023, 13:34
Qızılcaya yoluxmaların artım sürətində nisbətən azalma var - Nazir
Görünən mənzərə odur ki, qızılcaya yoluxmaların artım sürətində nisbətən azalma var.
Bunu jurnalistlərə açıqlamasında elm və təhsil naziri Emin Əmrullayev bildirib.
Onun sözlərinə görə, proses nəzarətdədir: "Hazırda baş verənlərin təkrarlanmaması üçün valideynlər öz övladlarını vaxtında, düzgün qaydada peyvənd etdirməlidirlər. Hazırda ümumilikdə təhsil sisteminin distanta keçirilməsi və qapanma olması ilə bağlı gözlənti yoxdur. Amma ayrı-ayrı məktəblərdə və ya siniflərdə yoluxmalar artarsa, lokal qapanma ola bilər".
6-12-2023, 17:02
Peyvənddən sonra qızılcadan ölüm halları 85 faiz azalıb - Rəsmi
Müasir dövrdə bir sıra infeksiyaları peyvəndlərlə idarə edə bilirik.
Bunu Səhiyyə Nazirliyinin mütəxəssis-eksperti, infeksionist Təyyar Eyvazov nazirliyin rəsmi instaqram səhifəsində “Qızılca” mövzusunda yayımlanan canlı yayımda deyib.
Azərbaycan Respublikasında qəbul olunmuş milli peyvənd təqvimində 11 infeksiyanın peyvəndlərlə idarə olunması məsələsinin olduğunu diqqətə çatdıran T.Eyvazov qızılcanın da onlardan biri olduğunu qeyd edib: “Qızılca əleyhinə peyvənd ilk dəfə ötən əsrin 60-cı illərində tətbiq olunub. Peyvənd tətbiq olunmadığı dövrlərdə təxminən 15-16 yaşlı uşaqların 90 faizi qızılcanı keçirirdi. Dünya üzrə peyvənd olmadığı dövrlərdə 1 il ərzində 2 milyon şəxs qızılcadan vəfat edirdi. Peyvəndlərin tətbiq olunması nəticəsində qızılcaya yoluxma hallarının sayı kəskin azalmışdı. Ən aşağı ölüm göstəricisi 2016-cı ildə oldu ki, bu da 100 mindir. Təxminən 85 faiz ölüm halları azaldı. Bu, onu göstərir ki, peyvənd kifayət qədər effektivdir. Peyvənd uzun illərdir tətbiq olunur, öz təhlükəsizliyini və effektivliyini sübut edib”.
Mütəxəssis-ekspert iki yaşadək uşaqlar və hamilə qadınların yanaşı xəstəlikləri olmasa belə qızılcanın fəsadlaşması üçün risk qrupuna aid olduqlarını bildirib.
6-12-2023, 15:47
Qızılcaya yoluxan şəxsı hava-damcı yolu ilə həssas insanları yoluxdurur
“Qızılca virusu yalnız insanlarda xəstəlik törədir. Qızılcaya yoluxan şəxsı hava-damcı yolu ilə həssas insanları yoluxdurur”.
Bunu Səhiyyə Nazirliyinin mütəxəssis-eksperti, infeksionist Təyyar Eyvazov qızılca ilə bağlı danışarkən deyib.
O bildirib ki, qızılcaya yoluxan şəxslə təmas olmadan belə qapalı məkanlarda yoluxma mümkündür: “İnkubasion dövr minimal 6, maksimal isə 21 gündür”.
T.Eyvazov söyləyib ki, qızılcaya digər bakterial fəsadların qoşulması faktı olarsa, antibiotik təyin edilə bilər: “Fəsadlardan olmadan antibiotik təyini olmaz. Qızılcaya qarşı ən effektiv qoruyucu vasitə peyvənd olunmaqdır. Belə olan halda xəstəlik yüngül keçirilir və ağırlaşma olmur”.
Nazirlik rəsmisi qeyd edib ki, əgər hamilə qadın əvvəllər qızılcaya yoluxubsa, ikinci dəfə yoluxması mümkün deyil.
T.Eyvazov xatırladıb ki, qızılcaya yoluxan şəxsdə sonradan ömürlük immunitet formalaşır: “Təkrar yoluxma çox nadir halda baş verə bilər”.
O vurğulayıb ki, qızılca əleyhinə peyvəndin tərkibində yumurta zülalı olmadığından allergiyası olanların vaksinasiyası qorxulu deyil.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!