Qrip əleyhinə vaksinasiya dövlət xəstəxanalarında pulsuz həyata keçiriləcək

Azərbaycanda qrip əleyhinə vaksinasiya dövlət xəstəxanalarında pulsuz həyata keçiriləcək.
Bu barədə Səhiyyə Nazirliyi Respublika Gigiyena və Epidemiologiya Mərkəzindən bildirilib.
Məlumatda qeyd olunub ki, ölkəyə gətirilən qrip əleyhinə peyvəndin istehsalçısı Niderlanddır. Peyvəndlər yalnız dövlət tibb müəssisələrində tətbiq edilir və ödənişsizdir.

Zaqatalada 64 nəfər qızılcaya yoluxub

Zaqatala Rayon Mərkəzi Xəstəxanasına bu ilin oktyabrın 11-dən noyabrın 17-dək qızılca simptomları ilə 64 müraciət daxil olub.
TƏBİB-dən bildirilib ki, onlardan 46-sı müayinə olunaraq ambulator müalicə üçün evə buraxılıb.
Qeyd olunub ki, ambulator xəstələrdən 8 uşaqdır, vəziyyətləri stabildir: "Bu müddət ərzində xəstəxanaya müraciət edən 19 nəfər (5-i uşaq olmaqla) stasionar müalicə alıb. Onlardan 10 xəstə artıq evə buraxılıb. 9 xəstənin isə stasionar müalicəsi davam etdirilir".

Sevda xanım Nəsrullayeva – ürəyi işıq məbədi

Kurortoloq-alim, Əməkdar həkim Sevda xanım Nəsrullayevadan yazanda istər-istəməz yazımı onun müqəddəs ata ocağından başlayıram. Səbəb budur ki, illər keçsə də, müqəddəs dəyərlər üzərində qurulmuş bu ocaqda bütün ali dəyərlər olduğu kimi qalır, heç nə dəyişilmir. Məhz bu cür ailələr bugünkü gəncliyə bir nümunədir. Və nə qədər yazılsa azdır.
Hansısa müdrikin gözəl bir deyimi var. Nəsrullayevlər ailəsindən nə qədər yazı yazmışamsa, həmin müdrik deyimə istinad etmişəm: “Mötəbərlik göydən düşmür – onu nəsil zərrə-zərrə qazanır. Sonra ocağın bütün övladları bölüşür bu mənəvi nemətı. Hərədə bir az sönüb azalsa, vay o ocağın halına. Hərədə bir az çoxalsa, xoş o ocağın halına...”.
Ocaqdan söhbət düşmüşkən deyim ki, yazacağım bu söhbətləri – atalı-analı, nənəli-babalı çağlarını göz yaşlarıyla xatırlayaraq söyləyib Sevda xanım. Bəzilərini dəftərçəmə qeyd etdiyimə görə sevinirəm indi.
Ömrün sonuna kimi bir-birini tamamlayan cütlüklər az olur həyatda. Sevda xanım dünyaya göz açanı belə cütlüklərin əhatəsində böyüyüb, boy atıb. Bu gün də sevgi dolu ömür yaşayır.
Babası Hidayət kişi 56 illik ömründə min bir əziyyətlə üzləşib. Atası Nəsrulla bəyin məhkəmədə kiminsə haqqını müdafə edərkən dediklərini sübuta yetirib inandıra bilmədiyindən ürəyi dayanır, daha dəqiq desək, ürəyi partlayır. 1918-ci ildə erməni faşizmi Şamaxı sakinlərini qanına qəltan edərkən Qüreyiş xanımla ilk körpələrini götürüb Bakıya qaçırlar. Bir qədər sonra ilk körpələrini itirmələri gənc ailəni sarsıdır. Amma sevimli Qüreyiş xanım yenilməz arxa olur ərinə. Şöhrəti, böyük insanlığı bu gün də yaddaşlarda yaşayan Nəsrulla, sonralar göz həkimi kimi tanınacaq Şükufə dünyaya gəlir. Sonra nəvələr - Sevda, Namiq babanın həyatda olmadığı illərdə Arifə (Şükufənin qızı) gəlir dünyaya. Hidayət kişinin gözündə həmişə cavan olan xanımına “nənə” deməyə qoymur nəvələrini. Nəvələri «mama» deyə müraciət edirlər Qüreyiş xanıma.
Bəzən düşünürəm Leyli və Məcnun qovuşsaydı, xoşbəxt olacaqdılarmı? Çətin sualdır. Bəlkə də bir-birinin yolunda şəhid olduqlarından eşqin zirvəsinə ucaldılar. Bəlkə qovuşsaydılar, adiləşəcəkdi sevgiləri? Hər halda Leyli də, Məcnun da nağıl qəhrəmanıdır. Fəqət əfsanəvi münasibətlər, əfsanəvi məhəbbətlər var ki, həqiqətdir... Atası Nəsrulla Nəsrullayev, anası Şeyda xanım birgə olduqları 36 ildə ilahi bir sevgi yaşayıblar. Başdan aşan iş-güc, problemlər - Nəsrulla müəllimin vəzifə qayğıları – Bakı Elektrik Maşınqayırma Zavoduna rəhbərlik, Bakı Şəhər Partiya Komitəsinin I katibi (indi ömürlərinin ixtiyar çağlarını yaşayan köhnə bakılılar 60-cı illəri xatırlayanda BK-nın pervıy sekretarı (ifadəni eşitdiyim kimi yazıram) Nəsrulla Nəsrullayevi böyük məhəbbətlə anırlar), Rabitə naziri, Yüngül Sənaye naziri, tutduğu böyük vəzifələrlə yanaşı indiki Neft Akademiyasında dövlət imtahan komissiyasının sədri, xarici ölkələrlə «Dostluq» mədəni əlaqələr cəmiyyətinin fəxri sədri və s. ictimai işlər, Şeyda xanımın ADU-nun (BDU) xarici dillər kafedrasında alman dilini tədris etməsi (Xalq şairi N.Həsənzadə ADU-nun aspiranturasında təhsil aldığı illəri xatırlayanda onlara alman dilindən dərs deyən Şeyda xanımı böyük məhəbbətlə anır), hər zaman qonaq-qaralı evin ailə qayğıları adiləşdirə bilməyib bu sevgini. Təbii nəvazişləri, səmimi davranışları böyüklərin də, uşaqların da yanında adi qarşılanıb. Baxışlarıyla, ən mərhəm duyğularla oxuyublar ürəklərini. Ömrün hər dəqiqəsini özləri və başqaları üçün mənalı yaşamaqdan zövq alıblar. Birgəliyin qədrini yalnız hisslərlə deyil, ağılla dəyərləndiriblər.
Müstəqil Azərbaycanın ilk İqtisadiyyat naziri, ilk Hesablama Palatasının sədri Namiq Nəsrullayevin ömür-gün yoldaşı, Tibb Universitetinin professoru Gülnarə xanım bu gün də qaynanasını məhəbbətlə ananda göz yaşlarını saxlaya bilmir. Xanımlığın, qadınlığın zirvəsində dayanan bu qadına münasibətini qaynana kimi yox, ideal ana kimi qiymətləndirir. Ümumiyyətlə, ailənin bütün üzvləri haqqında bu fikirdədir. Həyatdakı mövqeyinə görə Nəsrullayevlər ailəsinin rolunu danılmaz sayır.
(Təəssüf ki, ötən il bibisi qızı ADU-nun dosenti Arifə xanım, bu ilin yanvar ayında həyatı qədər əziz olan qardaşı Namiq Nəsrullayev dünyalarını dəyişib, haqqa qovuşdular. Məkanları cənnət, ruhları şad olsun!)
Sevda xanım orta məktəbi qızıl medalla bitirib Tibb İnstitutuna daxil olanda Bakı Şəhər Partiya Komitəsinin I katibinin qızı idi. Şübhəsiz ki, böyük vəzifə sahibinin qızı hamıda maraq doğurur. Eləcə də sonuncu kurs tələbəsi Sudeyf İmamverdiyevdə də. O illəri Sevda xanımın ömür-gün yoldaşı, dünya şöhrətli uroloq-alim, Əməkdar elm xadimi Sudeyf müəllim belə xatırlayır: «I katibin qızı əla oxuması, nümunəvi əxlaqı, tərbiyəsi, ədəb-ərkanı, ictimai fəallığı ilə diqqəti cəlb edirdi. Adətən vəzifəli, tanınmış ailələrin qızları ərköyünlükləri, geyim-kecimləri ilə fərqlənirdilər. Tələbə Sevda Nəsrullayeva institutda savadlı, ləyaqətli, ictimaiyyətçi tələbə kimi sevildi. Tale elə gətirdi ki, Sevda xanımın təyinatını mənim işlədiyim Həkimləri Təkmilləşdirmə İnstitutuna verdilər. Ayrı-ayrı kafedralarda çalışsaq da, istimai işlərdə fəallığımızla əlaqədar tez-tez görüşürdük. Bu görüşlərdə bir-birimizi yaxından tanıdıq... Ailə həyatı qurduq. 1971-ci ildən bir kürəkən olaraq bu ailənin üzvü oldum. Haqqında həmişə xoş sözlər eşitdiyim Nəsrulla müəllimlə tanışlığım daha yaxından başladı. Elə ilk günlərdən böyük bir azərbaycanlı ilə yaxın olduğumu dərk etdim. Qürurla düşünürdüm ki, xalqımızın necə möhtəşəm övladları var. İşinə və ailəsinə qarşı son dərəcə məsuliyyətli bir insan idi. Ailədə elə mövqeyi, elə davranışı vardı, adam istər-istəməz tərbiyə olunardı. Evdəmi, bağ şəraitindəmi oldu, gələn kimi xoş bir mühit, bir bayram əhval-ruhiyyəsi yaranardı. Heç zaman adama nəsihət verməz, “bunu belə et, elə et” deməzdi. Hər bir hərəkəti nümunə, örnək götürüləsi idi. Nəsihət verməyə, söz deməyə ehtiyac qalmazdı. Təəssüf ki, belə bir insanın ömrü cəmi 58 il oldu. Nəsrulla müəllim bu gün də həmin möhtəşəmlikdə, həmin əzəmətdə, həmin məhəbbətlə mənim ürəyimdə yaşamaqdadır. Sevib hörmət etdiyim şəxsiyyətlər çoxdur. Amma qürurla deyirəm ki, bütün sevdiklərim arasında Nəsrulla Nəsrullayev ən uca zirvədə dayanan parlaq şəxsiyyətdir.
Xeyirxah genlərdən aldığı tərbiyə əsasında formalaşan Sevda xanım yeni qurulan ailəsində normal qarşılayır problemləri. Məlumdur ki, əsrlər boyu zəka, ağıl, düşüncə nadanlığın qurbanı olub. Həyat yoldaşının urologiyadakı uğurları başqalarını qıcıqlandırır. Doktorluq müdafiəsinə hazırlaşan Sudeyf İmamverdiyevə təbabətin başqa sahəsi ilə məşğul olmağı məsləhət görürlər. Gəncliyindən özünü savadı və zəhmətilə formalaşdıran gənc alim inadından dönmür. Hətta ailəsini götürüb respublikadan köçmək qərarına gəlir. Bütün bu haqsızlıqlar Sevda xanımın həssas qəlbindən keçir, işinə də təsirsiz ötüşmür. O zaman artıq körpə Cavid üç aylıq idi. Ə.Əliyev adına Həkimləri Təkmilləşdirmə İnstitutunda professor S.Qusmanın rəhbərlik etdiyi kafedrada işləyən Sevda xanım professor Tamerlan Əliyevin Tibb İnstitutunda rəhbəri olduğu terapeya kafedrasına dəvət olunur. Qısa müddətdə Sevda xanımın burda da uşgüzarlığı, bilik və bacarığı üzə çıxır.
Lakin Sevda xanımın Tibb İnstitutunda işlədiyini bəhanə gətirərək Sudeyf müəllimi böyük çətinliklərlə açdığı urologiya kafedrasında işləməsinə maneələr törədirlər. Onda Sevda xanım ərizə yazıb institutdan getməyə məcbur olur.
Sevda xanım 1967-72-ci illərdə klinik ordinatura və aspirantura keçmiş, “Şəkərli diabeti olan xəstələrdə mədənin motor və sekretor funksiyası” mövzusunda namizədlik dissertasiyası müdafiə edib, tibb elmləri üzrə fəlsəfə doktorudur. 1977-ci ildə Elmi-Tədqiqat Tibbi Bərpa İnstitutunda baş elmi-işçi kimi fəaliyyətə başlayır. Burda da savadı və işgüzarlığı diqqətdən yayınmır. İnstitutun partkomu seçilir. Bu zaman ictimai fəallığı daha çox diqqəti cəlb edir. İnstitut rəhbərliyi və nazirlik qarşısında mühüm məsələlərlə çıxış edir və həllinə nail olur. 1983-cü ildə Sevda xanıma instituta direktor vəzifəsini təklif edirlər. Heç zaman vəzifə arzusunda olmayan Sevda xanım etiraz edir. Amma nazirlik qərarından dönmür, əmri verilir. Həmin zamanlarda anası Şeyda xanım xəstə yatırmış. Sevda xanım yeni təyinatı barədə anasına məlumat verəndə o, gözlərini açır və üzünə təbəssüm qonaraq bildirir: “Atan həmişə deyərdi ki, Sevda bütün sahələrdə hər bir işin öhdəsindən gəlməyə qadirdir, çünki güclü idarəetmə qabiliyyətinə malikdir.” Ömrünün son aylarını yaşayan anasını sevindirməsi və atasının onun haqqında dediyi xoş sözləri məsuliyyət kimi qəbul etməsi onu əzmlə işləməyə məcbur edir. Həmin gündən bu günə kimi fəaliyyəti bu institutla bağlıdır. Elmi-Tədqiqat Tibbi Bərpa İnstitutuyla Sevda xanım ayrılmaz bir vəhdətdir. 56 illik əmək fəaliyyətinin 46 ili bu institutla bağlıdır. Onun instituta rəhbərlik etdiyi illərdə bu elmi-tədqiqat və müalicə ocağının Azərbaycan səhiyyəsində xüsusi nüfuza malik yeri olub. Keçmiş İttifaqda tanınıb. İnstitutda ciddi demokratikləşdirmə gedib, inzibatçılıq olmayıb. Çin təbabətindən istifadə üçün mütəxəssislər dəvət olunub. Rəhbər işçinin ilk növbədə böyük insanlığı xoşbəxtçilikdir kollektiv üçün. Onun ucadan danışdığını görən olmayıb heç zaman. Astadan, yumşaq, humanistcəsinə danışır hamıyla. Amma bir sözü ikinci dəfə dediyi də olmayıb hələ. Bütün insanlarla dil tapmağı bacardığındandır ki, hamı ürəyini ona aça bilir. O harda işləsəydi, hansı sahədə çalışsaydı, orda yalnız xeyirxahılq toxumları cücərərdi. Bu xoşbəxtlik onu tanıyanların hamısına paylanıb. Zahirən mülayim, gülərüz, sadə və təmkinli Sevda xanımı yaxından tanıdıqca yəqinləşdirirsən ki, bu onun mənəvi aləmindən gəlir. Çöhrəsində səmimiyyətindən doğan mülayim bir təbəssüm var ki, sanki əbədi hopub üz-gözünə. Bu ovqatı müsahibinin necə çətin əhval-ruhiyyəsindən asılı olmayaraq ona da sirayət edir. Ürəyi işıq məbədi olan bu xanım öz mənəviyyatıyla saflıq aşılayır insanlara.
Baş elmi işçidən institutun direktorluğuna kimi yüksəlmişdir. 1993-cü ildən (öz ərizəsinə əsasən direktorluqdan azad edilmişdir) elmi işlər üzrə direktor müavinidir.
Sevda xanım Nəsrullayevanın institutdakı fəaliyyətinin əsas istiqamətini Azərbaycanın geniş kurort ehtiyatlarının səmərəli mənimsənilməsi, fiziki amillərin təsir mexanizmlərinin müxtəlif istiqamətlərinin öyrənilməsi təşkil etmişdir. Müasir metodika və texnologiyaların tətbiqinə, yeni müayinə və müalicə kabinetlərinin açılmasına çalışmışdır. Sevda xanım 70-dən çox elmi məqalə və tezisin, ixtira və səmərələşdirici təklifin, beş metodik tövsiyənin müəllifidir. Bir neçə namizədlik dissertasiyasının yerinə yetirilməsində elmi rəhbər olmuşdur.
Dəfələrlə Səhiyyə Nazirliyinin Fəxri Fərmanlarıyla, 2005-ci ildə isə “Tərəqqi” medalı ilə mükafatlandırılmışdır. Əməkdar həkim adını alıb.
Ömrünü xeyirxahlıq yolunda şam kimi əridən Sevda xanım unudulmaz akademikimiz Azad Mirzəcanzadənin dediyi kimi, çoxdanın professorudur. Lakin professor diplomu almaq təklifini heç vaxt qəbul etməyib. Özünün professor ömrünü ailəsinə, övladlarına, yetirmələrinə sərf edib. Həyat yoldaşı, dünya şöhrətli uroloq-cərrah, akademik, Əməkdar elm xadimi Sudeyf İmamverdiyevin uğurlarını bütövlükdə Azərbaycan səhiyyəsinin uğurları sayır. “Başımın tacı” – “ömrümün bəzəyi” – belə izhar edirlər Sudeyf müəllimlə ülvi məhəbbətlərini bir-birinə. Oğlu Cavidin incəsənət aləmində, qızı Sevincin nevrologiya sahəsindəki nailiyyətlərindən onun “analıq sənəti”nə pay düşür. “Alim olsan da, ilk növbədə Elçinin həyat yoldaşısan, övladlarının anasısan. İncəsənətə bağlı olsanız da, ən başlıcası ər-arvadsınız”. Belədir, Sevincinə, Cavidinə, qızından ayırmadığı gəlini Natellaya ana nəsihəti, ana öyüdü. Kürəkəni Elçin Rzayevi oğlu Caviddən ayırmır. Nəvələri Murad, Şeyda, Bulat bir dünya sevincdir ona. Uğurlu estafet indi nəvələrdədir. Murad dünyanın ən məşhur elm ocaqlarından olan Mançestr Universitetinin məzunudur. Paşa Sığorta Şirkətində İnformasiya Təhlükəsizliyi departamentinin rəhbəridir. Şeyda ADA Universitetini bitirdikdən sonra magistr təhsilini Londonda alıb. Amerika-Azərbaycan ticarət palatasında baş mütəxəssisdir. Bu yay Hüseyn Mustafabəyli ilə hamıya toy sevinci bəxş edib. Bulatın tələbə adı alması sevinci ailəni az qala bir ömür cavanlaşdırıb. Dünyanın bir çox ölkələrindən təhsillə bağlı təkliflər alan Bulat İmamverdiyev babasının razılığı ilə Belçikanı seçib.
Ayrı-ayrı illərdə doğulsalar da, yubiley yaşları hər dəfə eyni ilə düşür. Ömrün müdrik yollarında hələ neçə onillər qoşa addımlayasınız, neçə yubiley yaşınızı birgə qarşılayıb başa vurasınız. Fərəhiniz nəvə toylarında qol götürüb süzmək, nəticə sevinclərini yaşamaq olsun.

Sevda Əlibəyli,
“Söz” jurnalının baş redaktoru

Yayılan virusun əlamətləri koronavirusun klinik çalarlarıyla eynidir - İnfeksionist

"Azərbaycanda yayılan virusun əlamətləri koronavirusun klinik çalarları ilə eynidir".
Bunu Səhiyyə Nazirliyinin mütəxəssis-eksperti, infeksionist Təyyar Eyvazov deyib.
Onun sözlərinə görə, payız və qış aylarında havaların soyuması baş verən zaman kəskin respirator virus infeksiyaları daha çox yayılır: "İstər böyüklər, istərsə də uşaqlar arasında çoxsaylı xəstələnmə halları törədir. Bu viruslar müxtəlifdir, hər mövsümdə bəziləri yenilənir. Onların törətdikləri xəstəliklərin əlamətləri oxşardır. Bu, koronavirusun klinik çalarları ilə eynidir. Ona görə hər bir şəxs özündə bu cür əlamətlər olduqda müraciət edərək özündə məhz koronavirus infeksiyasının olub-olmamasıını müəyyən edə bilər, yəni laborator üsullarla yalnız bu suala cavab verilə bilər. Onu da qeyd edək ki, qrip və koronavirusdan savayı adıçəkilən respirator viruslar yüngül keçir, çox az hallarda, əsasən risk qruplarına daxil olan insanlarda müəyyən fəsadlar verə bilir. Ona görə də bu cür mövsümi virus infeksiyaları xüsusi hallar olmadıqda heç bir ölkədə rutin identifikasiya olunmur".
"Ümumilikdə isə epidemioloji durum stabil olaraq qalır, hər ildə olduğu kimi fon səviyyəni aşmır. O cümlədən statistik göstəricilər bizə deməyə əsas verir ki, ölkədə koronavirusun yayılması kiçik həddədir, son vaxtlar yoluxma sayında artımlar olsa da bu hallar kütləvi deyil. İstər koronavirus, istərsə də bütün respirator viruslardan qorunma yolları eynidir.Yəni pandemiya dövründə öyrəndiyimiz qızıl qaydalar bizləri qoruya bilər. Risk qruplarına daxil olan insanların isə bundan əlavə qrip və koronavirusdan peyvənd vasitəsilə də qorunmaları tövsiyə olunur", - T.Eyvazov bildirib.

Xərçəngi məhv edən dərman istehsal olundu

Moskvada onkologiyanı işığın köməyi ilə müalicə etmək üçün unikal dərman istehsal etməyə başlanılıb.
Bu barədə Moskva meri Sergey Sobyanin məlumat verib.
"Xəstəliyin ilkin mərhələlərində bu müalicə üsulu əməliyyatı əvəz edə bilər. Dərman xəstəyə yeridilir, şiş hüceyrələrində toplanır, sonra lazer və ya LED şüalanması ilə aktivləşdirilir ", - Sobyanin "Telegram" kanalında yazıb.
Onun sözlərinə görə, dərman xərçəng hüceyrələrini demək olar ki, tamamilə məhv edə bilər.
Qeyd edək ki, 2023-cü ilin iyul ayının sonunda Rusiya xərçəng hüceyrələrini içəridən məhv etmək üçün yeni üsul hazırladığını elan edib. Alimlər yüksək tezlikli maqnit nanohissəciklərinin istehsalı üçün texnologiya hazırlayıblar. Onlar şişə yeridilir və 52-54 dərəcə istilikdə qızdırılır. Bununla da xəstə hüceyrələr məhv olur.

Koronavirusla bağlı TƏBİB-dən əhaliyə xəbərdarlıq

Tibbi Ərazi Bölmələrini İdarəetmə Birliyi (TƏBİB) COVID-19-un alt variantı olan EG.5 - elmi ədəbiyyatda həm də “Eris” kimi tanınan virusla bağlı əhaliyə xəbərdarlıq edib.
TƏBİB-in Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva açıqlamasında bildirib ki, artıq bir neçə aydır COVID-19-un alt variantı olan EG.5 - elmi ədəbiyyatda həm də “Eris” kimi tanınan virus son zamanlar bütün dünyada sürətlə yayılmaqdadır.
O bildirib ki, xüsusilə ABŞ, Çin, Böyük Britaniya və Avropanın digər ölkələrində yeni yoluxmalara və yoluxma saylarında artıma səbəb olub: "Bu hal ilk dəfə deyil, daha öncə də COVID-19-un digər ştammlarında qeydə alınıb. Tendensiya onu göstərir ki, hər bir yeni yaranmış ştam özündən öncəki ştammdan daha yüngül simptomlara malik olur. Lakin yeni ştammlarların yoluxduruculuq qabiliyyəti əvvəlkilərdən yüksək olması ilə fərqlənir. Bu isə qısa zamanda kütləvi yoluxmalara səbəb olur".
Hazırda Azərbaycanda COVID-19 xəstəliyinin yeni ştamına yoluxma hallarına rast gəlinmədiyini xatırladan TƏBİB rəsmisi vurğulayıb ki, insanların böyük əksəriyyəti COVID-19 xəstəliyini artıq keçirib və sağalıb: "Ölkədə peyvəndlənmə faizi də qənaətbəxş hesab ediləcək səviyyədədir. COVID-19-un alt variantı olan EG.5-ə qarşı xüsusi peyvənd növünün hazırlanması və xüsusi peyvəndlənmə prosesinin başlanılması barədə beynəlxalq protokollarda tövsiyələr mövcud deyil. Hər zaman olduğu kimi, COVID-19-un bütün ştammlarına qarşı risk qrupuna daxil olan şəxslər daha diqqətli olmalıdırlar. Risk qrupuna yanaşı və xroniki xəstəlikləri olanlar, peyvənd olunmayan şəxslər daxildir".
Qeyd edək ki, Ümumdünya Səhiyyə Təşkilatının məlumatına görə dünya üzrə son zamanlar COVID-19-a yoluxanların sayı 38 % artıb. Belə ki, Koreya, İtaliya, Böyük Britaniya, Avstraliya və Sinqapurda yoluxma sayında kəskin artım qeydə alınıb. Hazırda ABŞ-da COVİD-ə yoluxma 2020-ci ilin ilk pandemiyasının statistikasına yaxınlaşır. Ölüm halları avqust ayı ilə müqayisədə 5% artıb. Qardaş Türkiyədə isə yeni ştamla əlaqəli həyəcan təbili çalınıb.

Ölkəmizdə koronavirusun yeni variantı yoxdur - Rəsmi

"Hazırda Azərbaycanda koronavirusun "Eris" variantının yayılması barədə rəsmi məlumat yoxdur".
Bu barədə Səhiyyə Nazirliyinin mütəxəssis-eksperi, infeksionist Vasif Əliyev deyib.
İnfeksionist xatırladıb ki, hazırda qonşu ölkələrdə COVID-19-un yeni variantı aşkarlanıb: "COVID-19-un yeni ştammi, həmçinin qrip, digər respirator infeksiyalar nisbətən yüngül formada keçdiyindən xəstələr əksər hallarda test vermək üçün xəstəxanaya və poliklinikalara müraciət etmirlər, ev şəraitində simptomatik müalicə alırlar. Bu isə öz növbəsində belə infeksiyalara yoluxmuş insanların rəsmi qeydiyyata alınmasını çətinləşdirir".
Nazirlik rəsmisi bildirib ki, hazırda Azərbaycanda koronavirusun "Eris" variantının yayılması barədə rəsmi məlumat yoxdur: "Vətəndaşlarımıza bildirmək istərdim ki, bütün respirator infeksiyalardan qorunma tədbirləri eynidir. Sanitar və gigiyenik qaydalara riayət edilməsi vacibdir. Bura sosial məsafənin gözlənilməsi, xəstə insanın ev şəraitində izlənilməsi, əl təmizliyi kimi qaydalar və.s. aiddir".

Elektron reseptin qüvvəyə minəcəyi tarix müəyyənləşdi

Azərbaycan Respublikası Nazirlər Kabinetinin müvafiq Qərarına əsasən, Səhiyyə Nazirliyinə bu ilin sonunadək elektron resept sisteminin tətbiqi tapşırılıb.
Bunu səhiyyə nazirinin müşaviri Rüfət Hacıəlibəyov deyib.
O bildirib ki, E-Resept sistemi Azərbaycanın tibb müəssisələrində vətəndaşlara verilən reseptlərin elektron qeydiyyatını nəzərdə tutur. Bu, reseptlərin oxunaqlığını və ya səhv şərhini aradan qaldıracaq, əvvəllər təyin edilmiş dərmanların tarixini görməyə, dərmanlar arasında arzuolunmaz uyğunsuzluğun qarşısını almağa, dəqiq dozaları göstərməyə, habelə Xəstəliklərin Beynəlxalq Təsnifatına əsaslanan diaqnozlara uyğunlaşmağa imkan verəcək. Bu da, öz növbəsində, buraxılmış diaqnozları beynəlxalq təsnifata və vətəndaşların sağlamlığının sonrakı təhlilinə uyğunlaşdırmağa imkan yaradacaq.
"Dərman vasitələrinin yenilənmiş reyestri ölkə miqyasında makroanaliz üçün əsas olacaq. Belə ki, dərman vasitələrinin mövcudluğu və tələbat, dərman preparatlarını kimə və hansı diaqnoz üçün təyin etmiş həkimlər barədə dolğun məlumat olacaq. Bu, həm də dərman satışı sahəsində aparılan əməliyyatlara nəzarətin gücləndirilməsi, o cümlədən saxta məhsulların yayılmasının qarşısının alınması nəticəsində əlavə iqtisadi effekt yaradacaq", - müşavir vurğulayıb.

“Dərman vasitələri haqqında” qanuna dəyişiklik edildi

“Dərman vasitələri haqqında” qanuna dəyişiklik edilib.
Prezident İlham Əliyev bununla bağlı qanunu təsdiqləyib.
Yeni dəyişikliyə əsasən, dərman vasitəsinin xarici (beynəlxalq) qeydiyyatının tanınması şamil olunan ölkələrin və xarici (beynəlxalq) təşkilatların siyahısı hazırlanacaq.
Nazirlər Kabineti 4 ay müddətində dərman vasitəsinin xarici (beynəlxalq) qeydiyyatının tanınması şamil olunan ölkələrin və xarici (beynəlxalq) təşkilatların siyahısını Azərbaycan Respublikasının Prezidenti ilə razılaşdırmaqla təsdiq etməlidir.
Bundan başqa dərman vasitələrinin yeni dövlət qeydiyyatına alınması qaydası təsdiqlənəcək. Fərmana əsasən, Nazirlər Kabineti 4 ay müddətində dərman vasitələrinin, dərman maddələrinin və tibb vasitələrinin dövlət qeydiyyatına alınması, dövlət reyestrinə daxil edilməsi və dövlət reyestrinin aparılması qaydalarını Azərbaycan Respublikasının Prezidenti ilə razılaşdırmaqla təsdiq etməlidir.
Həmçinin, Nazirlər Kabineti 4 aya Azərbaycan Respublikasında istehsal olunan dərman vasitələrinin istehsalçıları tərəfindən təqdim edilən məlumatların dairəsini müəyyən edib Azərbaycan Respublikasının Prezidentinə məlumat verməli və yaradılacaq “Dərman vasitələrinin təqib və izləmə sistemi”nin formalaşdırılması, aparılması və saxlanılması ilə əlaqədar xərclərin cari ildə dövlət büdcəsində nəzərdə tutulmuş vəsait çərçivəsində maliyyələşdirilməsi üçün, növbəti illərdə isə dövlət büdcəsi layihələrində müvafiq vəsaitin nəzərdə tutulması üçün tədbirlər görməlidir.
Yeni dəyişikliyə görə, Tarif Şurası gələn aya kimi dərman vasitələrinin topdan və pərakəndə satış qiymətlərinin yuxarı həddini müəyyənləşdirəcək. Şura “Dərman vasitələri haqqında” qanunda nəzərdə tutulmuş dərman vasitələrinin sadələşdirilmiş ekspertizası xidmətlərinin tariflərini, o cümlədən dərman vasitələrinin topdan və pərakəndə satış qiymətlərinin yuxarı həddini bir ay müddətində təsdiq edib Azərbaycan Respublikasının Prezidentinə məlumat verməlidir.

Koronovirusun yeni variantı əhali üçün böyük risk yaratmır - ÜST

Ümumdünya Səhiyyə Təşkilatı (ÜST) koronavirus infeksiyasının omikron ştamının EG.5 "Eris" adlı yeni variantının dünyada sürətlə yayıldığını bildirib.
Bu barədə təşkilatın məlumatında bildirilir.
ÜST hesab edir ki, koronavirusun yeni versiyası qlobal səviyyədə əhali üçün böyük risk yaratmır.
Məlumatda bildirilir ki, EG.5 ilk dəfə fevralın 17-də qeydə alınıb. O vaxtdan bəri dünya miqyasında yoluxma hallarda artım müşahidə olunur.
Təşkilatın məlumatına görə, dünyada koronavirus infeksiyasının bu variantının aktiv şəkildə yayılmasına baxmayaraq, EG.5-in əhali üçün yaratdığı risk aşağı səviyyədə qiymətləndirilir.