26-12-2022, 17:50
İran XİN-dən Qərb ölkələrinə mesaj
“İranın iştirakı olmadan regionun problemlərini həll etmək mümkün deyil”. Bunu İran Xarici İşlər Nazirliyinin sözçüsü Naser Kanani ölkəsinin bölgədəki təsirindən danışarkən bildirib. Kanani deyib ki, bəzi Qərb ölkələri İranın daxili işlərinə müdaxiləyə cəhdlə səhv hesablama aparıblar. Diplomat Qərb ölkələrinə İrana qarşı yanlış davranışlarından əl çəkməyi tövsiyə edərək, bu cür addımların onların ziyanına olacağını bildirib. Naser Kanani növbəti dəfə deyib ki, İran Ukrayna müharibəsində iştirak etmir. Ukrayna rəsmilərinin Rusiyanın müharibədə İran PUA-larından istifadə etdiyinə dair açıqlamalarına cavab olaraq XİN rəsmisi "bu ittihamlar Ukrayna xalqına və liderlərinə kömək etməyəcək" deyib. Onun sözlərinə görə, İran Ukraynadakı böhranın həllinə və sülhün yaradılmasına kömək etməyə hazırdır. N.Kanani Səudiyyə Ərəbistanının İsraillə əlaqələri normallaşdırma cəhdlərini də pisləyib: “Ərəb və İslam ölkələri arasında İsraillə münasibətlərin normallaşması regionda sabitlik və təhlükəsizliyə töhfə verməyəcək".
26-12-2022, 17:35
Pensiyalarda hər il artım olacaq
Son dörd ildə ölkəmizdə minimum pensiya 2.2 dəfə, orta aylıq pensiya 80 faiz, sosial müavinət və təqaüd ödənişləri 3.5 dəfə artıb. Bu barədə Dövlət Sosial Müdafiə Fondunun sədri Himalay Məmişov 2022-ci ilin yekunlarına dair mətbuat konfransında bildirib. H.Məmişov qeyd edib ki, bu dövrdə 10-dan çox yeni sosial ödəniş növü təsis olunub, sosial təminat sisteminin əhatə dairəsi daha da genişlənib: "Pensiya islahatlarının davamı olaraq bu il "Əmək pensiyaları haqqında Qanunda" 50-dək əlavə və dəyişiklik edilməklə, pensiya sistemində bu sistemə əlçatanlığın artırılmasına, erkən pensiya hüququ olan kateqoriyaların sırasının artmasına xidmət edən yeni humanist yanaşmalar tətbiq edilib. 2023-cü ildən isə pensiya artımında vahid indeksasiya metoduna keçiləcək ki, bu da bütün növ pensiyalarda hər il artıma imkan verəcək. 2022-ci ildə pensiyaçılara əlavə olaraq maddi yardımlar verildi. Həmin maddi yardımlar gələn ilin əvvəlindən onların pensiyalarının tərkibinə daxil ediləcək və bundan sonra bütün pensiyalar indeksləşdirilərək artırılacaq. Ümumilikdə 2023-cü ildə pensiya ödənişlərinə 2022-ci ilin müvafiq göstəricisinə nisbətən 650 milyon manat və ya 12 faiz çox vəsait yönəldilməsi nəzərdə tutulur".
26-12-2022, 17:01
Sabahın hava proqnozu
Azərbaycanda dekabrın 27-nə gözlənilən hava proqnozu açıqlanıb. Milli Hidrometeorologiya Xidmətindən verilən məlumata görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə 4-6° isti, gündüz 7-9° isti, Bakıda gecə 4-6° isti, gündüz 7-9° isti olacaq. Atmosfer təzyiqi normadan yüksək 771 mm civə sütunu olacaq. Nisbi rütubət 65-75 % olacaq. Azərbaycanın rayonlarında hava əsasən yağmursuz keçəcək. Lakin gecə və səhər Lənkəran-Astara zonasında az yağıntılı olacağı ehtimalı var. Bəzi yerlərdə duman olacaq. Mülayim qərb küləyi əsəcək. Havanın temperaturu gecə 0-5° isti, gündüz 7-12° isti, dağlarda gecə 3-8° şaxta, gündüz 0-3° şaxta olacaq.
26-12-2022, 16:59
Vəziyyətin nizamlanması üçün ciddi səy göstəririk - Rusiya XİN
Laçın dəhlizi ətrafında vəziyyətin gərginləşməsi Ermənistanla Azərbaycan arasında sülh müqaviləsi üzərində işi çətinləşdirir. Bunu TASS-a Rusiya xarici işlər nazirinin müavini Mixail Qaluzin deyib. "Rusiya tərəfi vəziyyətin yerində nizamlanması üçün ciddi səylər göstərir. Biz bütün məsələlər üzrə birgə işi bərpa etməyi səbirsizliklə gözləyirik. Ən qısa zamanda Ermənistan-Azərbaycan münasibətlərinin normallaşması üçün çalışırq”. Onun sözlərinə görə, sənədin razılaşdırılması vaxtı o qədər də vacib deyil. Əsas odur ki, Bakı və İrəvan regionda sabit və ədalətli sülhə təminat verəcək qarşılıqlı məqbul həllə nail ola bilsinlər. Qaluzin bildirib ki, Rusiya tərəfi oktyabrın 31-də Soçi sammitindən sonra Rusiya, Ermənistan və Azərbaycan liderlərinin üçtərəfli bəyanatına uyğun olaraq danışıqlar prosesinə yardım etməyə hazırdır.
26-12-2022, 16:12
İran XİN: “Ukraynanın ittihamlarını rədd edirik”
İran Xarici İşlər Nazirliyi (XİN) Ukraynanın Rusiya ilə müharibədə bu ölkəyə qarşı ünvanladığı ittihamlara münasibət bildirib. Bu barədə İran XİN-in rəsmisi Nasser Kənani keçirdiyi mətbuat konfransında danışıb. "Biz Ukraynadakı savaşın bir hissəsi deyilik. Ukraynanın ittihamlarını rədd edirik. Bu ittihamların Ukrayna tərəfinə heç bir faydası toxunmayacaq. Bunların Ukrayna üçün hüquqi nəticələri ola bilər", - Kənani söyləyib. Qeyd edək ki, Ukrayna tərəfi İranın Rusiyaya kömək etməsi, xüsusən dronlar və digər silah-sursatlarla təmin etməsi ilə bağlı təkzibedilməz faktlar açıqlamışdı.
26-12-2022, 16:08
Pensiyalara amnistiya tətbiq olunacaq
Bu gün Milli Məclisin Əmək və Sosial Siyasət
komitəsinin iclası keçirilib. İclasda “Əmək pensiyaları haqqında” qanuna dəyişikliklər layihəsi ikinci oxunuşda müzakirə olunub. Qanuna görə, dəyişikliklər artıq ödənilmiş əmək pensiyasının və əmək pensiyasına əlavənin məbləğinin tutulmasında müddətli amnistiyanın tətbiqini nəzərdə tutur. Sözügedən məbləğ əmək pensiyaçısının razılığı ilə əmək pensiyasını təyin edən orqanın qərarı əsasında, razılığı olmadıqda məhkəmə qaydasında tutulur. Qeyd edək ki, mövcud qanunvericiliyə əsasən, bu zaman müddət müəyyənləşdirilmədən artıq məbləğin geri ödənilməsi həyata keçirilirdi. Amma yeni dəyişikliklərə əsasən, yalnız son 3 il üçün ödənilmiş artıq məbləğ geri tutulacaq. Yəni, əgər pensiyaçıya fərqli səbəblərdən 2020-ci ildən əvvəl artıq ödəniş olubsa, yeni dəyişikliklərə əsasən həmin ödəniş geri istənilməyəcək. Dəyişikliklər 2020-ci ildən əvvəlki dövrə amnistiyanın verilməsini nəzərdə tutur. Bu isə pensiyaçıların sosial təminatı baxımdan vacib addım hesab edilməlidir. Eyni zamanda, geri ödəniləcək vəsait hər ay əmək pensiyaçısına ödənilməli olan məbləğin 10 faizindən az, 20 faizindən artıq ola bilməz. Bu məhdudlaşdırmada məqsəd pensiyaçının sosial vəziyyətini pisləşdirməmək məqsədi daşıyır. Bütövlükdə, əmək pensiyaları üzrə artıq ödənilən vəsaitlərin böyük hissəsi 2020-ci ildən əvvəlki dövrü əhatə etdiyi üçün yeni dəyişikliklər böyük məbləğdə vəsaitin bağışlanmasına və amnistiya edilməsinə imkan verəcək. Onu da qeyd edək ki, yeni dəyişikliklərin gələn aydan qüvvəyə minəcəyi gözlənilir.
26-12-2022, 15:59
Bir ay komada qalan qadın yenidən həyata qayıtdı
30 gün koma vəziyyətində olan qadın sağalıb. Bu barədə məlumatı Klinik Tibbi Mərkəzin mətbuat katibi Elnur Hidayətoğlu ctimailəşdirib. E.Hidayətoğlu bildirib ki, keçirdiyi avtoqəzadan sonra yaralı özəl xəstəxanalardan birinə aparılır, amma xərcləri qarşılaya bilməyən ailə TƏBİB-ə müraciət edib. Bununla da yaralı Kliniki Tibbi Mərkəzə yerləşdirilib. Kliniki Tibbi Mərkəzə gətirilərkən ağır və dərin koma vəziyyətində olan xəstədə hemodinamika pozğunluğu, ağır kəllə-beyin travması aldığı müəyyən edilib. Mərkəzin Reanimasiya şöbəsinin müdiri Ülviyyə Qurbanovanın sözlərinə görə, xəstə 30 gün süni tənəffüs aparatında qalıb və müvafiq müalicələr alıb. “Xəstə 8 noyabrda yol-nəqiliyyat hadisəsi nəticəsində ağır travma alıb və özəl tibb müəssisələrindən birinə çatdırılıb. Noyabr ayının 11-də həddən artıq ağır vəziyyətdə, təcili yardım vasitəsi ilə Kliniki Tibbi Mərkəzə köçürülüb. Tibbi müayinələrdən sonra xəstəyə müştərək qapalı kəllə-beyin travması, baş-beyin əzilməsi, sol təpə gicgahın zədələnməsi, sol tərəfli qabırğaların çoxsaylı sınığı, sol dirsək və sol körpücük sümüklərinin sınığı diaqnozu qoyulub. Bir aydan sonra dekabr ayının 12-si xəstə süni tənəffüs aparatından ayrılıb. Hazırda xəstənin vəziyyəti yaxşıdır. Huşu aydındır, komandaları yerinə yetirir, süni tənəffüs aparatına ehtiyac yoxdur. Yaxın günlərdə palataya köçürülməsi planlaşdırılır”. Xəstənin atası Rahib Hacıyevin sözlərinə görə, hadisə istirahət məqsədi ilə İsmayıllı rayonunda olan zaman baş verib. “Hadisə noyabr ayının 7-si, axşam saatlarında baş verib. Bu barədə noyabr ayının 8-i bizə məlumat verildi və biz İsmayıllı rayonuna getdik. Təcili yardım maşını vasitəsi ilə qızımı özəl xəstəxanalardan birinə apardıq. İki gün özəl xəstəxanada müalicəsi davam etdi. Lakin müalicənin davam etməsi üçün pul çox lazım idi. Mən TƏBİB-ə müraciət etdim, qızımın müalicəsinin dövlət tibb müəssisələrində davam etdirilməsi üçün kömək istədim. Təcili yardım maşını ilə qızımı Kliniki Tibbi Mərkəzə köçürdülər. O qədər ağır vəziyyətdən onu həyata qaytarmağı bacardıqları üçün həkimlərə öz təşəkkürümü bildirirəm. Qızımın daha da yaxşı olub, ayağa qalxacağına inanıram”. Gənc xanımın bütün müalicə xərcləri icbari tibbi sığorta ilə qarşılanıb.
26-12-2022, 15:54
Qərbin Rusiyaya qarşı sanksiyalarına qoşulmamışıq - Qazaxıstan XİN
Qazaxıstanın xarici işlər naziri Muxtar Tleuberdi Yaponiyanın NHK telekanalına bildirib ki, ölkəsi Qərbin Rusiyaya qarşı sanksiyalarına qoşulmaqdan imtina edib. Nazir Yaponiyaya səfəri zamanı deyib ki, iqtisadi baxımdan Rusiya ilə Qazaxıstan sıx əlaqələrə malikdir və Rusiyaya qarşı sanksiyalar Qazaxıstan iqtisadiyyatına mənfi təsir göstərib. “Qazaxıstan Rusiyaya qarşı sanksiyalarda iştirak etmir. Biz Qazaxıstan və Rusiya arasında mövcud münasibətləri davam etdirəcəyik”, - deyə Tleuberdi bildirib. Qazaxıstan Xarici İşlər Nazirliyinin rəhbəri həmçinin Ukrayna böhranından narahat olduğunu bildirib və əlavə edib ki, Qazaxıstan prezidenti Rusiya və Ukrayna liderləri ilə daim təmasdadır.
26-12-2022, 15:50
Bu il telekanallara maddi yardım edilməyəcək
Bu il Azərbaycan telekanallarının borcları yoxdur. Bu fikirləri Audiovizual Şuranın sədri İsmət Səttarov ilin yekunları ilə bağlı keçirilən mətbuat konfransında deyib. "Ona görə də heç bir kanala maliyyə yardımı edilməyəcək" - deyə qurum rəhbəri bildirib.
26-12-2022, 15:45
Rusiyalı politoloqdan şok iddia
Rusiyalı siyasi ekspert, politoloq Valeri Solovey ölkə prezidenti Vladimir Putinlə bağlı şok iddialar səsləndirib. Solovey Putinin xərçəng xəstəliyindən əziyyət çəkdiyini və dərmanlarla yaşadığını idda edib. Onun sözlərinə görə, Rusiya prezidenti ən müasir müalicə üsullarından istifadə edir və sağalmağa çalışır. Soloveyin fikrincə, Putin artıq özündən sonra hakimiyyəti ötürmək üçün varis təyin edilməsi prosesinə start verib. Politoloq Putinin varisliyinə iki namizədin adını açıqlayıb. Belə ki, Təhlükəsizlik Şurasının katibi Nikolay Patruşevin oğlu, hazırda Rusiyanın kənd təsərrüfatı naziri olan Dmitri Patruşevin Rusiya prezidentliyinə hazırlandığı iddia edilib. Solovey digər namizədin isə hazırda Tula vilayətinin qubernatoru olan Aleksey Dyumin olduğunu söyləyib. Adı açıqlanan hər iki şəxsin Putinə yaxın kadr hesab olunduğu bildirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!