17-03-2026, 14:11
Nazirlik bayram günlərində gücləndirilmiş iş rejimində çalışacaq
Novruz və Ramazan bayramı günlərində əhalinin nəqliyyat, poçt, telekommunikasiya, o cümlədən internet, mobil rabitə xidmətləri və radio-televiziya yayımı ilə keyfiyyətli və davamlı şəkildə təmin edilməsi üçün müvafiq tədbirlər həyata keçirilib.
Bu barədə Rəqəmsal İnkişaf və Nəqliyyat Nazirliyi (RİNN) məlumat yayıb.
Bununla bağlı RİNN-in qurumlarına, eləcə də mobil və telekommunikasiya operatorlarına, internet xidmət provayderlərinə təlimat göndərilib.
Müvafiq struktur bölmələri xidmətlər üzrə baş verə biləcək problemlərin aradan qaldırılması məqsədilə tam hazır vəziyyətə gətirilib.
17-03-2026, 13:59
Horovluya köçənlərə açarlar təqdim edildi - FOTO
Cəbrayıl rayonunun Horovlu kəndinə növbəti köç olub.
Bu gün Horovlu kəndinə 30 ailə olmaqla 131 nəfər köçürülüb.
Ailələrə evlərinin açarları təqdim olunub. Sakinlərə ANAMA əməkdaşları tərəfindən mina və partlamamış hərbi sursatların yaratdığı təhlükələr barədə məlumat verilib. Onlara tanımadıqları naməlum əşya və cisimlərdən uzaq durmaq, belə hallarla qarşılaşdıqları təqdirdə isə aidiyyəti qurumlara məlumat vermək tövsiyə olunub.
Açarların təqdim olunması mərasimində Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin əməkdaşları və digər rəsmi şəxslər iştirak ediblər.
Qeyd edək ki, kəndə köçürülənlər respublikanın müxtəlif ərazilərində yataqxana, sanatoriya, düşərgə, yarımçıq tikililər və inzibati binalarda müvəqqəti məskunlaşmış ailələrdir.
17-03-2026, 13:54
Azərbaycanda üç klub 16 min manat CƏRİMƏLƏNDİ
Bu gün AFFA İntizam Komitəsinin iclası keçirilib.
Komitə Misli Premyer Liqasında XXIV turunun oyunları ilə bağlı qərarlarını açıqlayıb.
Misli Premyer Liqasında XXIV turun "İmişli" - "Sabah" oyunu bitdikdən sonra meydançaya kənar şəxslər daxil olduğuna və bu hal cari mövsümdə 2-ci dəfə yaşandığına görə "İmişli" komandası 5000 manat cərimə edilib.
Həmin turun "Qəbələ" - "Neftçi" oyunu "Qəbələ" komandasının meydançaya gec çıxması səbəbindən gec başladığı üçün "Qəbələ" komandası 3000 manat cərimə edilib. Bundan başqa, "Neftçi" komandasının azarkeşləri tərəfindən rəqib futbolçunun ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 6-cı dəfə təkrarlandığına görə "Neftçi" komandası 8000 manat cərimə edilib.
17-03-2026, 13:47
Trampın “Hörmüz koalisiyası” iflasa uğradı
ABŞ Prezidenti Donald Trampın Hörmüz boğazının açılması üçün koalisiya yaratmaq planı faktiki olaraq iflasa uğrayıb.
Bu barədə “Axios” portalının məqaləsində qeyd edilib.
Bildirlib ki, Donald Tramp Hörmüz boğazının açılması üçün koalisiya yaratmaq məqsədilə Avropa İttifaqı və digər ölkələrə müraciət edib. Lakin müsbət cavab ala bilməyib. Trampın təklifinə şübhə ilə yanaşanlar və onu rədd edənlər var.
Ağ Ev Hörmüz boğazının açılması əməliyyatına Böyük Britaniya, Fransa, Almaniya, İtaliya, Avstraliya, Kanada, Fars körfəzi dövlətləri və İordaniyanı cəlb etmək istəyib. ABŞ həmçinin Yaponiya və Cənubi Koreyaya müraciət edib.
Almaniya, İtaliya və Yaponiya hökumətləri artıq gəmilərini göndərmək ehtimalını rədd ediblər.
Fransa lideri Makron qəti şəkildə "yox" deməyib, amma razılıq da verməyib.
Britaniya Baş naziri Keir Starmerin də Trampa birmənalı cavabı yoxdur. “The Telegraph” qəzeti isə Starmerin Hörmüz boğazının açılmasına kömək üçün Britaniya gəmilərini göndərməmək qərarına gəldiyini bildirib.
“Politico” Avropa diplomatlarına istinadən xəbər verir ki, Hörmüz boğazındakı təhlükəsizliklə bağlı fikir ayrılıqları səbəbindən Avropa İttifaqı və ABŞ arasındakı münasibətlər yenidən dərin böhranın astanasındadır.
Avropalı diplomatlar deyiblər ki, İranda tammiqyaslı NATO missiyasının olması hələ mümkün deyil. Onlar belə bir qərarın bütün müttəfiqlərin yekdil dəstəyini tələb etdiyini və bunun əldə edilməsinin çətin olduğunu bildiriblər.
“Politico” aydınlaşdırıb ki, NATO hələlik Vaşinqtondan rəsmi sorğu almayıb.
ABŞ və İsrailin hərbi əməliyyatına cavab olaraq İran Hörmüz boğazında gəmiçiliyin blokadaya alındığını elan edib. Bu strateji əhəmiyyətli boğazdan dünya neft tədarükünün 15-20%-i və mayeləşdirilmiş təbii qazın 30%-dən çoxu buraxılırdı. İslam İnqilabı Keşikçiləri Korpusu (SEPAH) bütün gəmilərin Tehranın keçid icazəsini almalı olduğu barədə xəbərdarlıq edib. Lakin İranın xarici işlər naziri Abbas Əraqçi daha sonra aydınlaşdırıb ki, boğaz ABŞ və müttəfiqləri istisna olmaqla, bütün ölkələr üçün açıq olaraq qalır.
17-03-2026, 13:43
Laricani öldürülüb - Müdafiə naziri açıqladı - YENİLƏNİB
İranın Ali Milli Təhlükəsizlik Şurasının katibi Əli Laricani hava hücumunda öldürülüb.
İsrail müdafiə naziri İsrael Katz bu barədə bildirib.
Bildirilib ki, müdafiə naziri bu səhər İsrail Baş Qərargah rəisi general-leytenant Eyal Zamirdən Bəsic komandiri Qulamrza Süleymaninin və İran Ali Milli Təhlükəsizlik Şurasının katibi Əli Laricaninin Tehranda öldürüldüyü barədə məlumat alıb.
İsrail tərəfi onların zərbə zamanı sağ qalmaq şansının olmadığını bildiriblər.
***
13:04
İsrail ordusu Tehrana hava zərbəsi endirərək İranın yüksək vəzifəli rəsmilərindən birini - Əli Laricanini hədəf alıb.
Bu barədə İsrail mənbələri məlumat yayıb.
Məlumata əsasən, hücumun əsas məqsədi İranın Ali Milli Təhlükəsizlik Şurası ilə əlaqəli yüksək səviyyəli fiqurlardan biri hesab edilən Laricani olub.
Lakin Israil Müdafiə Qüvvələri hələlik onun öldürülüb-öldürülmədiyini müəyyənləşdirmək üçün hücumun nəticələrinin qiymətləndirilməsini aparır.
İsrail ordusu rəsmi açıqlamasında Laricaninin hədəf alındığını təsdiqləməyib.
Hərbi qurum hücumların əsas məqsədinin raket istehsalı obyektləri və komandanlıq mərkəzləri olduğunu bildirib.
17-03-2026, 13:39
Xocəvəndə köçən 11 ailəyə açarlar təqdim edildi - FOTO
Martın 17-də yola salınan köç karvanı Xocavənd rayonunun Xocavənd kəndinə çatıb.
Bu barədə Qaçqınların və Məcburi Köçkünlərin İşləri üzrə Dövlət Komitəsindən məlumat verilib. Bu mərhələdə Xocavənd kəndinə köçürülən 36 nəfərdən ibarət 11 ailəyə mənzillərin açarları təqdim edilib.
Mərasimdə Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin nümayəndələri iştirak ediblər.
.
17-03-2026, 13:34
Xüsusi icra məmurları ilə bağlı qaydaları pozanlara cərimələnəcək
Xüsusi icra məmurları haqqında qanunvericiliyi pozanlar cərimə ediləcək.
Məsələ Milli Məclisin bugünkü plenar iclasında müzakirəyə çıxarılan İnzibati Xətalar Məcəlləsinə təklif edilən yeni - 528-3-cü maddədə əksini tapıb.
Layihəyə əsasən, xüsusi icra məmurları haqqında" qanuna uyğun olaraq and içməyən və barəsindəki məlumatlar Xüsusi İcra Məmurlarının Reyestrinə daxil edilməyən şəxs tərəfindən xüsusi icra məmuru fəaliyyətinin göstərilməsinə görə min beş yüz manat məbləğində cərimə ediləcək. Xüsusi icra məmurunun vahid geyim formasını və (və ya) xüsusi icra məmurunun nişanını qanunsuz olaraq daşımağa görə inzibati xətanın obyekti olmuş geyim forması və xüsusi nişan müsadirə edilməklə beş yüz manatdan yeddi yüz manatadək məbləğdə cərimə olunacaq. Xüsusi icra məmurları tərəfindən Xüsusi İcra Məmurlarının Reyestrində olan məlumatlarda baş vermiş dəyişikliklər haqqında 3 (üç) iş günü müddətində reyestri aparan orqana məlumat verilməməsinə görə beş yüz manat məbləğində tətbiq ediləcək.
Barəsindəki məlumatlar Xüsusi İcra Məmurlarının Reyestrinə daxil edilmədən xüsusi icra məmurunun köməkçisi kimi fəaliyyətə başlamasına görə xəbərdarlıq ediləcək və ya beş yüz manat məbləğində cərimə olunacaq. Xüsusi icra məmurunun köməkçisinin müstəqil olaraq xüsusi icra məmurunun fəaliyyəti ilə məşğul olmasına, icra hərəkətlərini həyata keçirməsinə görə min beş yüz manat məbləğində cərimə ediləcək.
İcra sənədlərinin icrası ilə bağlı xüsusi icra məmurunun qanuni fəaliyyətinə müdaxilə edilməsinə görə fiziki şəxslər iki yüz manatdan üç yüz manatadək məbləğdə, vəzifəli şəxslər dörd yüz manatdan altı yüz manatadək məbləğdə, hüquqi şəxslər səkkiz yüz manatdan min iki yüz manatadək məbləğdə cərimələnəcək.
Xüsusi icra məmurları tərəfindən dövlət və digər informasiya ehtiyatları və sistemlərindən icra hərəkətlərinin həyata keçirilməsi ilə əlaqədar zəruri olmayan məlumatların əldə edilməsinə görə beş yüz manatdan min manatadək məbləğdə cərimə ediləcək.
Bunlar göstərilən əməllər Cinayət Məcəlləsinin müvafiq maddələrinə əsasən cinayət məsuliyyətinə səbəb olmadıqda tətbiq olunacaq.
Məsələ birinci oxunuşda qəbul edilib.
17-03-2026, 13:33
Dilənçilik edənlər 10 sutka HƏBS EDİLƏCƏK
Dilənçiliklə məşğul olanlar cərimələnəcək, inzibati həbs ediləcək.
Məsələ Milli Məclisin bu gün keçirilən plenar iclasında müzakirə edilən İnzibati Xətalar Məcəlləsinə təklif edilən yeni - 523-1-ci maddədə əksini tapıb.
Layihəyə əsasən, dilənçiliklə məşğul olmağa görə xəbərdarlıq ediləcək, yaxud yüz manatdan iki yüz manatadək məbləğdə cərimələnəcək və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda on günədək müddətə inzibati həbs tətbiq olunacaq.
Yetkinlik yaşına çatmayan şəxsin dilənçiliyə cəlb edilməsinə görə iki yüz manatdan beş yüz manatadək məbləğdə cərimə ediləcək və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda on beş günədək müddətə inzibati həbs tətbiq olunacaq.
Məsələ səsə qoyularaq birinci oxunuşda qəbul edilib.
17-03-2026, 13:31
Uşaqları döyən valideyn və müəllimlər cərimələnəcək
Tərbiyə etmək məqsədilə uşağa qarşı fiziki zorakılıq edən valideyn və müəllim 200 manatadək cərimələnəcək.
Məsələ Milli Məclisin bugünkü plenar iclasında müzakirə olunan İnzibati Xətalar Məcəlləsinə təklif edilən yeni - 525-1-ci maddədə əksini tapıb.
Layihəyə əsasən, valideynlər (onları əvəz edən şəxslər), uşaqlara nəzarəti həyata keçirmək vəzifəsini daşıyan təhsil, tibb, sosial xidmət, idman, mədəniyyət, istirahət müəssisələrinin və penitensiar müəssisələrin işçiləri tərəfindən uşağa qarşı cismani cəzanın tətbiqinə, yəni tərbiyə etmək məqsədilə və ya intizam tədbiri kimi uşağa qarşı fiziki və (və ya) psixoloji zorakılığın törədilməsinə görə iki yüz manat məbləğində cərimə ediləcək.
Bu, həmin əməl Cinayət Məcəlləsinin müvafiq maddələrinə əsasən cinayət məsuliyyətinə səbəb olmadıqda tətbiq ediləcək.
Məsələ birinci oxunuşda qəbul edilib.
17-03-2026, 13:16
Əsas ticarət tərəfdaşlarımız açıqlandı
2026-cı ilin yanvar ayında Azərbaycanın xarici ticarət dövriyyəsində daha çox paya malik olan ölkələrlə aparılmış əməliyyatlarda idxal və ixracın xüsusi çəkisi məlum olub.
Bu barədə Dövlət Statistika Komitəsindən bildirilib.
Belə ki, qeyd edilən dövr ərzində Azərbaycan Respublikasının hüquqi və fiziki şəxsləri dünyanın 128 ölkəsindəki tərəfdaşları ilə ticarət əməliyyatları həyata keçirib. Məlumata görə, ay ərzində 81 ölkəyə məhsul ixrac olunub, 122 ölkədən isə idxal həyata keçirilib.
Hesabat dövründə Azərbaycanın xarici ticarət dövriyyəsi 3092,1 milyon ABŞ dolları təşkil edib. Nəticədə 487,7 milyon dollar məbləğində müsbət ticarət saldosu formalaşıb.
Məlumata əsasən, İtaliya ilə ticarətdə ixracın payı 96,5 faiz, idxalın payı isə 3,5 faiz təşkil edib. Türkiyə ilə ticarət əməliyyatlarında ixracın xüsusi çəkisi 62,1 faiz, idxalın payı isə 37,9 faiz olub. Çinlə ticarətdə əsas pay isə idxalın üzərinə düşür. Belə ki, idxal 97,6 faiz, ixrac isə 2,4 faiz təşkil edib. Rusiya ilə ticarətdə idxalın payı 67,3 faiz, ixracın payı isə 32,7 faiz olub. Rumıniya ilə aparılan ticarət əməliyyatlarında ixrac 96,0 faiz, idxal isə 4,0 faiz səviyyəsində qeydə alınıb.
Bundan əlavə, Almaniya ilə ticarətdə ixracın payı 52,1 faiz, idxalın payı isə 47,9 faiz təşkil edib. Bolqarıstanla ticarətdə ixrac 98,8 faiz, idxal isə 1,2 faiz olub. Gürcüstanla aparılan ticarət əməliyyatlarında ixracın payı 89,0 faiz, idxalın payı isə 11,0 faiz təşkil edib. İranla ticarətdə isə idxal üstünlük təşkil edir. Belə ki, idxalın payı 98,3 faiz, ixracın payı isə 1,7 faiz olub. Yunanıstanla ticarətdə ixrac 83,4 faiz, idxal isə 16,6 faiz səviyyəsində qeydə alınıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!