28-03-2026, 17:26
İsrail iki livanlı jurnalisti öldürdü
Cənubi Livanda jurnalistlərə qarşı növbəti ölümcül hücum qeydə alınıb.
Ölkənin cənubunda yerləşən Cəzzin şəhəri yaxınlığında avtomobilə endirilən hava zərbəsi nəticəsində iki jurnalist və bir operator həlak olub.
Məlumata görə, hücum zamanı “Al-Manar” telekanalının müxbiri Əli Şueyb, “Al-Məyadeen” telekanalının müxbiri Fatimə Futuni və onları müşayiət edən operator həyatını itirib. Hər iki kanal əməkdaşlarının ölümünü təsdiqləyib. “Al-Məyadeen” hadisəni “İsrailin qəfil hücumu” kimi qiymətləndirib.
Hərbi mənbələr bildirir ki, zərbə jurnalistlərin olduğu avtomobilə birbaşa endirilib. Yerli KİV-lərin məlumatına əsasən, həlak olan operator Fatimə Futuninin qardaşı olub və çəkiliş zamanı onların yanında olub.
Hadisə səhər saatlarından etibarən Livanın cənubunda həyata keçirilən genişmiqyaslı hücumların tərkib hissəsi kimi qiymətləndirilir. İsrail ordusu isə insidentlə bağlı hələlik rəsmi açıqlama verməyib.
Belə ki, son saatlarda ölkənin bir sıra bölgələrində hərbi gərginlik daha da artıb, hava zərbələri və artilleriya atəşləri davam edir.
İsrail Müdafiə Qüvvələrinin (IDF) məlumatına görə, Şueyb “Radvan” qüvvəsinin kəşfiyyat bölməsində fəaliyyət göstərib, eyni zamanda “Hizbullah”a bağlı “Al-Manar” telekanalında jurnalist kimi çalışıb.
Livan Səhiyyə Nazirliyinin son məlumatına görə, martın 2-dən bəri davam edən hücumlar nəticəsində 1142 nəfər ölüb, 3 mindən çox insan yaralanıb.
Davam edən hücumlar və toqquşmalar fonunda ölkədə humanitar vəziyyətin daha da pisləşəcəyi ilə bağlı xəbərdarlıqlar artır. Xüsusilə cənub bölgələri və paytaxt Beyrutun cənub ətraflarında köç dalğasının genişləndiyi və itkilərin artdığı bildirilir.
28-03-2026, 17:08
Yaşar Gülər iranlı həmkarına zəng etdi
Türkiyənin milli müdafiə naziri Yaşar Gülər İran müdafiə nazirinin müavini Seyyid Məcid İbnül Rıza ilə telefon danışığı aparıb.
Bu barədə "TRT Haber" məlumat yayıb.
Qeyd olunub ki, telefon danışığı zamanı son hadisələr başda olmaqla, ikitərəfli və regional müdafiə və təhlükəsizlik məsələləri üzrə fikir mübadiləsi aparılıb.
28-03-2026, 16:59
İran Dubayda Ukraynanın dron anbarını məhv etdi
İran Silahlı Qüvvələrinin Xatəm əl-Ənbiya qərargahının sözçüsü İbrahim Zülfəqari bildirib ki, İran qüvvələri Dubayda Ukrayna istehsalı olan anti-dron sistemlərinin saxlandığı anbarı məhv edib.
Bu barədə İran İslam Respublikası Televiziya Şirkəti (IRIB) məlumat yayıb.
Onun sözlərinə görə, İslam İnqilabı Keşikçiləri Korpusunun (İİKK) aerokosmik və dəniz qüvvələri Dubaydakı Amerika hərbi sığınacaqlarına zərbələr endirib. Nəticədə ABŞ ordusu ağır itkilər verib.
Zülfüqari vurğulayıb ki, "Eyni zamanda, Ukraynanın dron əleyhinə sistemlərinin anbarı məhv edilib və orada 21 ukraynalı da olub".
İran Mərkəzi Komandanlığının sözçüsü əlavə edib ki, Ukrayna vətəndaşlarının taleyi hələ də məlum deyil. O, ukraynalıların ABŞ qüvvələrinə kömək etmək üçün Birləşmiş Ərəb Əmirliklərinə (BƏƏ) gəldiyini bildirib.
28-03-2026, 16:42
Xaçmazda 33 kəndi su basıb - FOTO
Son iki gündə aramsız yağan leysan və rayon ərazisindən keçən çaylarda əmələ gələn sel suları Xaçmaz rayonu ərazisində bir sıra fəsadlar törədib.
Yağış və sel suları vətəndaşlara məxsus fərdi yaşayış evlərinə və təsərrüfat tikililərinə dolaraq ciddi ziyan vurub.
Leysan yağışları nəticəsində rayonun 33 yaşayış məntəqəsində 537 fərdi yaşayış evini su basıb.
Həmçinin çaylarda əmələ gələn sel suları Azərbaycan Avtomobil Yolları Dövlət Agentliyinin balansında olan 1 avtomobil körpüsünə də ciddi ziyan vurub. Belə ki, Hülövlü-Qaracik Zeyid-Alıcqışlaq-Qədmalıqışlaq-Rəhimoba-Sərkərli avtomobil yolunda yerləşən Caqacuq çayı üzərindəki avtomobil körpüsü tamamilə dağılıb.
Xaçmaz Rayon İcra Hakimiyyətinin başçısı Elnur Rzayev Rayon Fövqəladə Hallar Komissiyasının üzvləri ilə birlikdə sel sularından ziyan dəymiş ərazilərə baxış keçirib, fəsadların aradan qaldırılması ilə bağlı müvafiq tapşırıqlar verib.
Hazırda dəymiş ziyanın müəyyənləşdirilməsi və fəsadların aradan qaldırılması istiqamətində zəruri tədbirlər davam etdirilir.
28-03-2026, 16:33
Rusiya XİN-dən sərt açıqlama: “Dayanın! Siz artıq həddi keçmisiniz"
İranda, o cümlədən “Buşehr” Atom Elektrik Stansiyasına qarşı həyata keçirilən hücumlar bütün beynəlxalq ictimaiyyət tərəfindən qətiyyətlə pislənməlidir.
Bu barədə Rusiya Xarici İşlər Nazirliyinin sözçüsü Mariya Zaxarova bildirib.
Onun sözlərinə görə, İrana qarşı hücum edən tərəflər Yaxın Şərqdə apardıqları müharibədə riskləri nəzərə almadan gərginliyi daha da artırırlar:
“Təcavüzkarlar Yaxın Şərqdəki müharibədə risklərə, o cümlədən genişmiqyaslı radioaktiv çirklənmə təhlükəsinə məhəl qoymadan vəziyyəti daha da gərginləşdirirlər”.
Zaxarova qeyd edib ki, martın 27-də İrana hücum edən dövlətlər Xondabdakı ağırsulu kompleksə və Ərdəkandakı uran filizi konsentratı istehsal edən zavoda məqsədli zərbələr endiriblər. Bundan dərhal sonra isə “Buşehr” AES ətrafının yenidən atəşə tutulması ilə bağlı məlumatlar yayılıb.
Diplomat vurğulayıb ki, bu hücumlar dünya ictimaiyyəti tərəfindən birmənalı və sərt şəkildə pislənməlidir.
O, həmçinin Beynəlxalq Atom Enerjisi Agentliyinin rəhbərliyinin də yaranmış təhlükə ilə bağlı daha aydın mövqe ortaya qoymalı olduğunu bildirib:
“Ümid edirik ki, MAQATE-nin baş direktoru Rafael Qrossi İran hakimiyyətindən birbaşa aldığı obyektiv məlumatlar əsasında aqressorlara təcili və açıq şəkildə sadə bir mesajı çatdıracaq:
“Dayanın! Siz artıq həddi keçmisiniz. Amma hələ də daha böyük cinayətlər törətməmək, günahsız qurbanların sayını artırmamaq və faciəni qlobal fəlakət miqyasına çatdırmamaq şansınız var”.
Zaxarova əlavə edib ki, İrandakı dinc nüvə obyektlərinə hücumlar geosiyasi maraqlar naminə Nüvə Silahlarının Yayılmaması Müqaviləsinin mexanizmlərini də faktiki olaraq iflic edir.
Rusiya XİN sözçüsü bildirib ki, Moskva İranın rəqiblərinin bu destruktiv xəttini qətiyyətlə pisləyir və onları dərhal dayanmağa çağırır.
28-03-2026, 16:07
İntensiv yağışlar Sumqayıtı işıqsız qoydu
İntensiv xarakterli yağıntılar nəticəsində Sumqayıtın bir hissəsində elektrik enerjisinin verilişində məhdudiyyətlər yaranıb.
Məlumata görə, bununla bağlı "Azərişıq"və FHN əməkdaşları Sumqayıtda yarımstasiya və transformator məntəqələrin (TM) ərazilərinin sel sularından təmizlənməsi prossesini davam etdirir.
"Bir neçə gündür ölkə ərazisində davam edən intensiv xarakterli yağıntılar bir sıra ərazilərdə, eləcə də Sumqayıt Elektrik Şəbəkəsinin (EŞ) bəzi ərazilərində elektrik enerjisinin verilişində qısa müddətli məhdudiyyət yaradıb. Buna səbəb leysan xarakterli yağışların yağması nəticəsində yağış sularının ətraf ərazilərə və eləcədə elektrik yarımstansiyalarına, Paylayıcı Qurğulara (PQ), TM-lərinə dolmasıdır.
Qəza halları nəticəsində Sumqayıtda bir neçə küçədə və Corat qəsəbəsində 21-ci məhəllənin bir hissəsində elektrik enerjisinin verilişində məhdudiyyətlər yaranıb.
İntensiv yağışların davam etməsi, bir çox ərazilərdə keçilməz gölməçələrin əmələ gəlməsi və yağış sularının ərazilərdən təmizlənməsi "Azərişıq" əməkdaşlarına əlavə problem yaradır. Bütün çətinliklərə baxmayaraq FHN əməkdaşlarının köməkliyi ilə "Azərişıq" ASC-nin əməkdaşları yaranan qəzaları aradan qaldırmaq üçün fasiləsiz çalışır. Qabaqlayıcı tədbirlər həyata keçirilir, yağış sularının ərazidən kənarlaşdırılması, eləcə də güc mərkəzlərində təmir-bərpa işləri davam etdirilir. Hissə-hissə ərazilərin elektirk enerjisi ilə təminatı həyata keçirilir",- "Azərişıq" bəyan edib.
28-03-2026, 15:56
BƏƏ-də yaralananların sayı 178 çatıb
İranın Birləşmiş Ərəb Əmirlikləri (BƏƏ) ərazisinə həyata keçirdiyi hücumlar nəticəsində yaralananların sayı 178 nəfərə çatıb.
Bu barədə BƏƏ Müdafiə Nazirliyi “X” platformasında yaydığı gündəlik məlumatda bildirib.
“178 nəfər müxtəlif dərəcəli xəsarətlər alıb - yüngüldən orta və ağır vəziyyətədək. Yaralananlar arasında təxminən 30-a yaxın ölkənin vətəndaşları var".
Nazirliyin açıqlamasına görə, onların arasında Rusiya vətəndaşları yoxdur:
"Hücumlar nəticəsində BƏƏ Silahlı Qüvvələrinin iki hərbçisi, silahlı qüvvələr tərəfindən işə cəlb edilmiş Mərakeş vətəndaşı olan bir mülki şəxs, eləcə də Pakistan, Nepal, Banqladeş və Hindistan vətəndaşı olan səkkiz mülki şəxs həlak olub", - deyə məlumatda qeyd olunub.
28-03-2026, 15:48
Qalibafdan sərt mesaj: ABŞ və İsrail...
İran parlamentinin spikeri Məhəmməd Baqir Qalibaf ABŞ və İsrailin İrana qarşı hərbi əməliyyatlarını “insan sivilizasiyası üçün birbaşa təhlükə” kimi qiymətləndirib.
O, şənbə günü "X" hesabında paylaşım edərək ABŞ və İsrailin hərbi addımlarını tənqid edib və bunu sübut etmək üçün üç BMT hesabatına istinad edib.
“İranın niyə insanlıq uğrunda mübarizə apardığını və İsrailin niyə insan sivilizasiyası üçün ciddi təhdid olduğunu anlamaq istəyirsinizsə, bu üç BMT hesabatını oxuyun”, - deyə o qeyd edib.
28-03-2026, 15:34
Ağacların kəsilməsinə görə cinayət işi açıldı
Oğuz rayonunun Filfilli kəndi ərazisində 15 ədəd vələs ağacının kəsilməsi və təbiətə 6 min manata yaxın maddi ziyan vurulması ilə bağlı cinayət işi açılıb.
Bu barədə Daxili İşlər Nazirliyinin mətbuat xidmətinin regional qrupundan məlumat verilib.
Bildirilib ki, polis əməkdaşları tərəfindən həyata keçirilən tədbirlərlə ağacları kəsməkdə şübhəli bilinən Xaçmaz kənd sakini, 21 yaşlı Nicat Süleymanov saxlanılıb.
Faktla bağlı Oğuz Rayon Polis Şöbəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.
28-03-2026, 15:23
Yaşlandıqca daha
çox xatırlayıram…
Bu gün nədənsə Vüqarla keçən günlərimizi xatırladım. 1996-cı ildə AzTV-də tanış olmuşduq. Sütül oğlan idi. Çox mədəni, həddindən artıq nəzakətli, söhbətcil, həm də yaraşıqlı və istiqanlı idi. Fərqli redaksiyalarda işləsək də hər gün tapışıb dərdləşirdik. 10 il ərzində lap doğmalaşdıq.
Vüqar Niderlanda getdi. Onun mənim həyatımda buraxdığı boşluğu kimsə doldura bilmədi. Amma bu boşluqda təkcə özümü yox, həmişə onu düşünürdüm ki, millətinə, ailəsinə, dostlarına bu qədər bağlı olan birinin qürbətdə günü necə keçər?!
Gününün necə keçdiyini bir özü bilir, bir də Allahı. Amma mən onu bilirəm ki, gedəndə ürəyini burda qoyub getdi. Vətən dərdini də, vətənin dərdlərini də özü ilə apardı. İllərlə hər çətinliyə, hər ağrı-acıya dözdü. Xarici dil öyrəndi. Yazı- pozu işlərinə başladı. Beynəlxaq media qurumlarına üzv oldu. Yazıları uğur qazandı. Yazılarından, social mediada çıxışlarında hiss olunur ki, harda olmasından asılı olmayaraq yenə də Azərbaycanla nəfəs alır, o taylı, bu taylı Azərbaycanın birlik xəyalı ilə yaşayır…
İndi Vüqar özünün yox, övadlarının uğuruna sevinərək yazır:
“Bu gün qızım Leiden Universitetində bakalavr diplomunu rəsmi olaraq aldı. Əslində universiteti ötən yay bitirmişdi, bu gün isə diplomun təqdimat mərasimi keçirildi. Hazırda hüquq ixtisası üzrə magistr təhsili alır. Çox xoş və qürurverici bir gün oldu. Bu hissi arzulayan hər kəsə, bütün valideynlərə övladlarının sevincli günlərini yaşamağı arzu edirəm”
Əzizim Vüqar, sevincinə şərik olaraq qürurlanıram. Arzu edirəm ki, gül balanın bütün arzu-istəkləri başa çatsın! Hər birinizə sevgi və sayğılarla:
Tamxil Ziyəddinoğlu
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!