29-03-2026, 18:10
Hindistan tankerləri Hörmüz boğazını keçdi
Hindistana mayeləşdirilmiş təbii qaz daşıyan daha iki tanker Hörmüz boğazını təhlükəsiz şəkildə keçib.
Bu barədə Hindistanın Neft və Təbii Qaz Nazirliyindən bildirilib.
Məlumata görə, "BW TYR" tankerinin martın 31-də Mumbaya, "BR ELM" tankerinin isə aprelin 1-də Nyu-Manqalor limanına çatacağı gözlənilir.
Qeyd olunub ki, regionda Hindistan gəmilərinin və dənizçilərinin təhlükəsizliyinin təmin edilməsi üçün tədbirlər görülür. Son 24 saat ərzində onların iştirakı ilə hər hansı insident qeydə alınmayıb.
Hazırda Fars körfəzinin qərb hissəsində Hindistan bayrağı altında 18 gəmi və 485 hindistanlı dənizçi qalır.
Bu həftənin əvvəlində İranın xarici işlər naziri Abbas Əraqçi bildirib ki, Hörmüz boğazından keçid dost ölkələr üçün açıqdır. "Biz Çin, Rusiya, Hindistan, İraq və Pakistanın keçidinə icazə vermişik", - deyə o söyləyib.
29-03-2026, 17:57
İran İsrailin sənaye zonasını vurdu
İran İsraildə sənaye zonasına ballistik raketlə zərbə endirib.
Bu barədə “The Times of Israel” məlumat yayıb.
Qeyd edilib ki, raket zərbəsindən sonra Ber-Şevdən cənubda, Neot-Xovav sənaye zonasında güclü yanğın başlayıb.
İlkin məlumata görə xəsarət alan yoxdur.
29-03-2026, 17:36
Rusiya İrana kömək edir - Zelenski
Rusiya tərəfi ABŞ-nin Səudiyyə Ərəbistanındakı aviabazasının peyk görüntülərini çəkərək İranın həmin obyektə hücumuna şərait yaradıb.
Ukrayna Prezidenti Volodimir Zelenski bu barədə əldə olunmuş kəşfiyyat məlumatlarını media ilə bölüşüb.
O bildirib ki, Rusiya hücumdan əvvəl həmin bazanın görüntülərini üç dəfə peyk vasitəsilə qeydə alıb:
"İranlılara kömək etmək Rusiyanın maraqlarına xidmət edir. Mən buna sadəcə inanmıram, bunu bilirəm ki, onlar məlumat paylaşırlar".
Qeyd edək ki, hücum nəticəsində ABŞ-yə məxsus qırıcı təyyarələrə ciddi ziyan dəyib, hərbçilər arasında yaralananlar olub.
29-03-2026, 17:20
İsrail ordusu Livanda itkilər verdi
İsrail ordusu Livanın cənubunda "Hizbullah"ın silahlı birləşmələrinə qarşı döyüş əməliyyatları zamanı yeni itkilər verib.
Bu barədə ordunun mətbuat xidməti məlumat yayıb.
Qeyd edilib ki, döyüşlərin birində hava-desant briqadasında xidmət edən 22 yaşlı çavuş Moşe Kats həlak olub.
Həmin döyüşdə daha üç israilli hərbçi orta dərəcəli xəsarətlər alıb, onlar xəstəxanaya yerləşdiriliblər.
29-03-2026, 17:05
PKK İrana qarşı vuruşsa, hərbi cavab veriləcək - Türkiyə
Türkiyə İrana qarşı hərbi əməliyyatlarda kürd qruplaşmalarından istifadə olunacağı təqdirdə ciddi hərbi tədbirlər görəcəyi barədə xəbərdarlıq edib.
İsrail "Mossad" kəşfiyyatı vasitəsilə PKK və PJAK terrorçularını İrana qarşı quru döyüşlərinə cəlb etməyə çalışır.
"Türkiyə bu planlardan xəbər tutan kimi dərhal hərəkətə keçib və ABŞ, İraq, eləcə də kürd birləşmələrini məlumatlandırıb.Məsələ martın əvvəlində Türkiyə Prezidenti Rəcəb Tayyib Ərdoğan və amerikalı həmkarı Donald Tramp arasında telefonla müzakirə edilib. Ərdoğan kürd qruplaşmalarının bu müharibədə iştirakına qəti etirazını bildirib. Kürd təşkilatlarına isə çatdırılıb ki, müharibəyə qoşulsalar, Türkiyə, Suriyada olduğu kimi, onlara dərhal zərbə endirəcək",- məlumatda qeyd edilib.
Hazırda Türkiyə XİN və Milli Kəşfiyyat Təşkilatı (MİT) Bağdad və İraq Kürdistanı ilə intensiv danışıqlar aparır. Türkiyə rəsmiləri Şimali İraqa səfər edərək Ankaranın hərbi cavab verməyə hazır olduğunu tərəflərə bəyan ediblər.
Həmçinin bildirilib ki, PKK lideri Abdullah Öcalan da prosesə cəlb olunub. O, təşkilata mesaj göndərərək İranın daxili işlərinə qarışmamağa və "İsrailin tələsinə düşməməyə" çağırıb.
29-03-2026, 16:56
Çeçenistanda fövqəladə vəziyyət
Çeçenistan ərazisində əhalinin qorunması məqsədilə fövqəladə vəziyyət rejimi tətbiq edilib.
Bu barədə "Çeçnya Seqodnya" agentliyi məlumat yayıb.
Qeyd edilib ki, Çeçenistan başçısı Ramzan Kadırov bu barədə müvafiq sərəncam imzalayıb.
Fövqəladə rejimin tətbiqinə səbəb güclü yağışlar, dağlarda leysanlar, yağış və sulu qar şəklində yağıntılar, çaylarda suyun səviyyəsinin təhlükəli həddə qədər yüksəlməsi və kiçikhəcmli sellərin baş verməsidir.
29-03-2026, 16:35
ABŞ gizli şəkildə İrana quru hücumu planlaşdırır - Qalibaf
ABŞ Tehrana göndərdiyi danışıqlar barədə açıq siqnallara baxmayaraq, gizli şəkildə İrana quru hücumu planlaşdırır.
Bu barədə İran parlamentinin sədri Məhəmmədbaqer Qalibaf bildirib.
"ABŞ öz istəklərini 15 bənddən ibarət siyahı şəklində ifadə edib və müharibədə nail ola bilmədiklərinə can atır. Düşmən açıq şəkildə danışıqlar barədə siqnal göndərir və eyni zamanda, gizli şəkildə quru hücumu planlaşdırır", - o qeyd edib.
Bununla yanaşı, Qalibaf vurğulayıb ki, İran istənilən quru hücumunu dəf etməyə hazırdır.
Daha əvvəl "The Washington Post" qəzeti xəbər yaymışdı ki, Pentaqon İran ərazisində tammiqyaslı müdaxilə əvəzinə, xüsusi təyinatlıların və piyadaların nöqtəvi reydlərini nəzərdə tutan məhdud quru əməliyyatları variantları üzərində işləyir.
Xatırladaq ki, ABŞ və İsrailin 28 fevralda İrana qarşı birgə əməliyyat başladıb. İran da cavab olaraq İsrail ərazisinə raketlər buraxıb. Bundan əlavə, İran qüvvələri ABŞ-nin Fars körfəzi ölkələrində yerləşən hərbi bazalarına hücum edib. Yaxın Şərqdəki vəziyyətlə əlaqədar regionun bəzi ölkələri hava məkanını müvəqqəti bağlayıb. Həmin gün İranın ali dini rəhbəri Əli Xamenei ABŞ və İsrailin hücumları nəticəsində öldürülüb.
Bundan əvvəl ABŞ-nin Yaxın Şərq münaqişəsinə son qoymaq üçün İran hakimiyyətinə 15 maddəlik plan göndərdiyi bildirilib.
29-03-2026, 16:17
Mədəniyyət Nazirliyi Rasim Balayevin ölümü ilə bağlı nekroloq yaydı
Azərbaycan Kinematoqrafçılar İttifaqının sədri, görkəmli aktyor, Xalq artisti Rasim Balayev vəfat edib.
Bu, Mədəniyyət Nazirliyinin R. Balayevin vəfatı ilə bağlı paylaşdığı yazıda qeyd olunub.
"Azərbaycan mədəniyyətinə ağır itki üz verib", - yazıda qeyd olunub.
Əlavə edilib ki, görkəmli kino aktyoru, Azərbaycan Kinematoqrafçılar İttifaqı İdarə Heyətinin sədri, Dövlət Mükafatı laureatı, Prezidentin fərdi təqaüdçüsü, Xalq artisti Rasim Balayev 29 mart 2026-cı il tarixində, ömrünün 77-ci ilində müalicə olunduğu Türkiyənin İstanbul şəhərində vəfat edib.
Rasim Əhməd oğlu Balayev 8 avqust 1948-ci ildə Ağsu rayonunda anadan olub. 1969-cu ildə Azərbaycan Dövlət İncəsənət İnstitutunu bitirib.
Rasim Balayev 1972-ci ildə "Azərbaycanfilm" kinostudiyasında aktyor kimi fəaliyyətə başlayıb.
İlk dəfə "Ulduzlar sönmür" filmində çəkilən aktyor sonradan "Nəsimi", "Babək", "Dədə Qorqud", "Həm ziyarət, həm ticarət", "Otel otağı", "Cavid ömrü" və s. filmlərdə yaratdığı obrazlarla tamaşaçıların rəğbətini qazanıb. O, eyni zamanda onlarla filmdə obrazları səsləndirib.
Rasim Balayevin sənət şöhrəti ölkəmizin hüdudlarını aşıb. Aktyor "Özbəkfilm", "Mosfilm" və başqa studiyalarda da filmlərə çəkilib.
İctimai xadim kimi də tanınan sənətkar
1990-2013-cü illərdə Azərbaycan Kinematoqrafçılar İttifaqının katibi vəzifəsində çalışıb. 2022-ci ildən Azərbaycan Kinematoqrafçılar İttifaqı İdarə Heyətinin sədri idi.
Rasim Balayevin Azərbaycan kinosunun inkişafına verdiyi töhfələr dövlətimiz tərəfindən daim yüksək qiymətləndirilib.
1976-cı ildə "Əməkdar artist", 1982-ci ildə "Xalq artisti" fəxri adlarına, 1986-cı ildə isə respublikanın Dövlət Mükafatına layiq görülüb. Aktyor həmçinin 1998-ci ildə "Şöhrət", 2018-ci ildə "Şərəf", 2023-cü ildə "İstiqlal" ordenləri ilə təltif olunub. 2005-ci ildən Prezidentin fərdi təqaüdçüsü idi.
Mədəniyyət Nazirliyinin kollektivi Xalq artisti Rasim Balayevin vəfatından kədərləndiyini bildirir, mərhumun ailəsinə və yaxınlarına dərin hüznlə başsağlığı verir.
Allah rəhmət eləsin.
29-03-2026, 15:27
İrana qarşı böyük plan - Üç istiqamətdən hücum
İran hakimiyyəti ABŞ və İsrailin “Haman” adlı yeni hərbi plan hazırladığını iddia edir.
Bu barədə məlumatı İranın yarırəsmi nəşri olan Tehran Times yayıb.
İddialara görə, plan İrana qarşı mərhələli hücum ssenarisini əhatə edir və əsas diqqət quru əməliyyatına yönəlib. Bildirilir ki, 9 min nəfərlik xüsusi təyinatlı qüvvənin iştirakı ilə həyata keçiriləcək əməliyyat üç istiqamətdən – şimal-qərb, cənub-şərq və Bəhreyn xətti üzrə aparılacaq.
Məlumata əsasən, hücum çərçivəsində İranın strateji hava limanları əsas hədəf kimi seçilib. Bəndər Abbas, Kermanşah, Təbriz və Urmiya şəhərlərində yerləşən hava limanlarına enişlərin planlaşdırıldığı iddia olunur.
Bununla yanaşı, plana 5-15 nəfərlik kiçik təxribat qruplarının daxil olduğu və bu qrupların İranın nüvə obyektlərinə qarşı diversiya əməliyyatları həyata keçirməsinin nəzərdə tutulduğu bildirilir.
“Haman” adının seçilməsi də diqqət çəkir. Bu ad həm Quranda, həm də Tövratda yer alan fiqurla əlaqələndirilir. Qurani-Kərimdə Haman fironun yaxın çevrəsində yer alan və zülm sisteminin iştirakçısı kimi təqdim olunur. Tövratda isə o, Fars hökmdarının vəziri kimi təsvir edilir və sonda öz qurduğu tələnin qurbanına çevrilir.
29-03-2026, 15:14
Prezident Cəmil Əliyevi "İstiqlal" ordeni ilə təltif etdi
Prezident İlham Əliyev Cəmil Əziz oğlu Əliyevin "İstiqlal" ordeni ilə təltif edilməsi haqqında Sərəncam imzalayıb.
Sərəncamda deyilir:
"Azərbaycan Respublikası Konstitusiyasının 109-cu maddəsinin 23-cü bəndini rəhbər tutaraq qərara alıram:
Azərbaycan Respublikasında tibb elminin və səhiyyənin inkişafında xüsusi xidmətlərinə görə Cəmil Əziz oğlu Əliyev "İstiqlal" ordeni ilə təltif edilsin".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!