ABŞ və Böyük Britaniya öz vətəndaşlarını Kabil aeroportunu tərk etməyə, həyat və sağlamlığa təhlükə səbəbindən oraya getməkdən çəkinməyə çağırıb.

Hər iki ölkə mümkün təhlükə barədə xəbərdarlığı çərşənbə günü gecə saatlarında yayıb. Çünki minlərlə insan hələ də aeroportun daxilində və xaricində uçuş üçün növbə gözləyir.

Əfqanıstanın paytaxtı taliblərin əlinə keçdikdən sonra 82 mindən çox insan Kabili hava yolu ilə tərk edib. Ölkələr vətəndaşlarını son müddət olan avqustun 31-dək təxliyə etməyə tələsir. ABŞ-ın dövlət katibi Entoni Blinkenin sözlərinə görə, taliblər əcnəbilərə və əfqanlara avqustun 31-dən sonra da ölkədən çıxmağa icazə verəcəklərini vəd ediblər.

Hazırda ABŞ və müttəfiqləri Əfqanıstanı tərk etmək istəyən mülki şəxslərin təxliyəsi üzrə Kabil aeroportunda əməliyyat keçirir. EFE agentliyinin yaydığı xəbərə görə, bu əməliyyat yekunlaşdıqdan sonra “Taliban” hərəkatı Kabildə sərnişin aviakompaniyalarının işinə mane olmayacağını bildirib.

KİV-in bir müddət öncə yaydığı məlumata əsasən, Kabil beynəlxalq aeroportunun sutkalıq işini NATO dövlətlərinin 800-ə yaxın mülki nümayəndəsi təmin edir, qayda-qanunu isə ABŞ, Böyük Britaniya və Türkiyə hərbçiləri dəstəkləyir. Uçuş-eniş zolağına çıxan kütləni dağıtmaq üçün hərbçilər gözyaşardıcı qazdan istıfadə edir, xəbərdarlıq atəşi açırlar. İnsanlar havaya qalxan təyyarələrin şassisindən və füzelyajından yapışırlar. Bu insidentlər nəticəsində azı 20 nəfərin həlak olduğu bildirilir.