2 fevral – Azərbaycan Gəncləri Günü münasibətilə Qəbələ Uşaq və Ailələrə Dəstək Mərkəzinin təşkilatçılığı ilə onlayn görüş keçirilib. Tədbirdə Vətən müharibəsinin iştirakçıları, rayonun fəal gəncləri, dövlət qurumlarının nümayəndələri iştirak ediblər.

Butov.az xəbər verir ki, Uşaq və Ailələrə Dəstək Mərkəzindən AZƏRTAC-ın bölgə müxbirinə bildirilib ki, tədbirin əvvəlində Vətən müharibəsində canlarından keçən qəhrəman şəhidlərin xatirəsi bir dəqiqəlik sükutla yad edilib.

Gəncləri əlamətdar bayram münasibətilə təbrik edən Mərkəzin direktoru Günel Ağayeva gənc nəslin vətənpərvərlik ruhunda tərbiyə edilməsinin mənsub olduğu xalqın rifahının, ölkənin çiçəklənməsinin rəhni olduğunu diqqətə çatdırıb.

Mərkəzin sosial iş üzrə mütəxəssisi Hökumə İsmayılova çıxışında müasir dövrdə Azərbaycanda sosial-iqtisadi sahədə aparılan quruculuq işlərində gənclərin fəal iştirakından bəhs edib.

Tədbirdə Azərbaycan Respublikasının İnsan hüquqları üzrə müvəkkilinin (Ombudsmanın) Şəki Regional Mərkəzinin rəhbəri Pərviz Məmmədov və rayon icra hakimiyyətinin nümayəndəsi Anar Şirinov çıxış edərək, müstəqil Azərbaycanın ən mühüm fəaliyyət istiqamətlərində gənclərin göstərdikləri nailiyyətlərdən söz açıblar. Vurğulanıb ki, hər bir gənc öz həyatını qurarkən, ilk növbədə, ölkəmizin bu gününü və gələcəyini düşünməli, əməli fəaliyyətində vətəndaşlıq borcunu şərəflə yerinə yetirməlidir. Fərəhli haldır ki, bu gün Azərbaycan gəncləri milli-mənəvi dəyərlərimizi, doğma Ana dilimizi, ata-babalardan qalan gözəl adət-ənənələrimizi qoruyub yaşadırlar.