14-04-2024, 17:11
Zakir Həsənov Kralla görüşdü
İordaniya Haşimilər Krallığında rəsmi səfərdə olan Azərbaycan Respublikasının müdafiə naziri general-polkovnik Zakir Həsənov İordaniya Haşimilər Krallığının Kralı Əlahəzrət II Abdullah ibn Al Hüseyn ilə görüşüb.
Bu barədə Azərbaycan Müdafiə Nazirliyindən bildirilib.
Müdafiə naziri Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin salamlarını çatdırıb.
Görüşdə İordaniya ilə bir çox sahələrdə olduğu kimi hərbi sahədə də əməkdaşlığın vacibliyi vurğulanıb.
14-04-2024, 16:35
Ceyhun Bayramov Özbəkistana səfərə getdi
Azərbaycan Respublikasının xarici işlər naziri Ceyhun Bayramov Özbəkistan Respublikasına işgüzar səfərə yola düşüb.
Bu barədə Xarici İşlər Nazirliyindən bildirilib.
Səfər çərçivəsində nazir Ceyhun Bayramovun Körfəz Əməkdaşlıq Şurası ilə Mərkəzi Asiya ölkələri arasında Strateji Dialoqun ikinci nazirlər iclasında fəxri qonaq qismində iştirakı, habelə bir sıra ikitərəfli görüşlər keçirməsi nəzərdə tutulur.
14-04-2024, 15:53
34 mindən çox abituriyent imtahan verdi
Dövlət İmtahan Mərkəzi aprelin 14-də abituriyentlər üçün növbəti imtahanlar keçirib.
Bu barədə DİM məlumat yayıb.
Əvvəlki illərin məzunları üçün ali təhsil müəssisələrinə qəbul imtahanının I mərhələsi, V ixtisas qrupu üzrə ali təhsil müəssisələrinə və 11 illik təhsil bazasında kolleclərə qəbul imtahanı, müsabiqədə buraxılış imtahanında verdiyi xarici dildən fərqli dil üzrə iştirak etmək istəyən cari ilin məzunları üçün əlavə xarici dil imtahanı, qəbul imtahanını buraxılış imtahanında verdiyi dildən fərqli dil üzrə vermək istəyən cari ilin məzunları üçün əlavə tədris dili imtahanı, mart ayında keçirilmiş buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş cari ilin XI sinif şagirdləri üçün buraxılış imtahanı, eksternat qaydasında XI sinif üzrə yekun attestasiyada iştirak etmək istəyən şəxslər üçün buraxılış imtahanı, buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş əvvəlki illərin XI sinif məzunları üçün buraxılış imtahanı keçirilib.
İmtahanlar Bakı, Şəki, Lənkəran, Gəncə, Sumqayıt, Mingəçevir, Şirvan şəhərlərində, Abşeron, Qazax, Şəmkir, Bərdə, Sabirabad, Göyçay, Kürdəmir, Salyan, Cəlilabad, Xaçmaz rayonlarında və Naxçıvan MR-də təşkil olunub.
İmtahanlarda 34 445 nəfərin iştirakı nəzərdə tutulurdu.
İmtahanların idarə olunması üçün 141 ümumi imtahan rəhbəri, 409 imtahan rəhbəri, 3231 nəzarətçi, 433 buraxılış rejimi əməkdaşı və 141 bina nümayəndəsi ayrılıb.
İmtahanda 51 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) şagirdlər də iştirak edəcək. Bu şagirdlərin rahat şəkildə imtahan verməsi üçün imtahan binalarında xüsusi zallar ayrılıb, orqanizmin funksiyalarının 81-100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin edilib.
İlkin məlumatlara əsasən, 8 nəfərdə mobil telefon, 3 nəfərdə isə “ağıllı” saat aşkar olunduğu üçün imtahandan xaric edilib və araşdırma aparılacaq.
Aprelin 15-dən etibarən DİM-də imtahan protokolları və cavab vərəqlərinin emalına başlanılacaq. İmtahanlarda istifadə olunan yazılı cavab tələb edən açıq tipli tapşırıqların yoxlanılması vaxt tələb etdiyindən nəticələrin yaxın 4 həftə ərzində elan olunması nəzərdə tutulur.
Xatırladaq ki, imtahan başa çatdıqdan sonra iştirakçılara sual kitabçalarını özləri ilə aparmağa icazə verilib.
İmtahanda istifadə edilmiş test tapşırıqlarının (qapalı və kodlaşdırıla bilən açıq tipli) cavabları da imtahandan dərhal sonra Mərkəzin saytına yerləşdirilib. İştirakçılar doğru cavab etalonları ilə buradan tanış ola bilərlər.
İmtahanda iştirak edənlər, həmçinin valideynlər, müəllimlər, ekspertlər test tapşırıqlarının izahının elektron versiyasını (pdf formasında) isə DİM-in internet saytının "Xidmətlər" bölməsində > “E-xidmətlər” > "DİM-in nəşrlərinin elektron versiyalarının satışı" > “Test tapşırıqlarının izahı” xidməti vasitəsilə sabah gün ərzində ödəniş etməklə əldə edə bilərlər. (Xidmətə keçid: //eservices.dim.gov.az/ejurnal/).
14-04-2024, 15:30
Dövlət qulluğu üzrə test imtahanı keçirilib
14 aprel 2024-cü il tarixində Dövlət İmtahan Mərkəzi tərəfindən dövlət qulluğunda inzibati icraçı vəzifələrə (B növü) aid olan vəzifə qrupları üzrə test imtahanı keçirilib.
DİM-dən verilən xəbərə görə, imtahan kağız daşıyıcılar vasitəsilə Bakı və Naxçıvan şəhərlərində 10 binada təşkil olunub. İmtahanda iştirak etmək üçün BA qrupu üzrə 506, BB qrupu üzrə 2258 olmaqla, ümumilikdə 2764 namizəd qeydiyyatdan keçib. İmtahanının keçirilməsi üçün 10 ümumi imtahan rəhbəri, 28 imtahan rəhbəri, 239 nəzarətçi və 40 buraxılış rejimi əməkdaşı ayrılıb.
Aprelin 15-dən etibarən DİM-də imtahan protokolları və cavab kartlarının emalı aparılacaq.
İmtahan nəticələri yaxın 2 gün ərzində elan olunacaq.
14-04-2024, 15:17
DSX-nin Xüsusi Məktəbinə imtahan keçirildi
Dövlət Sərhəd Xidmətinin Xüsusi Məktəbinin V sinfinə qəbul imtahanı keçirilib.
Bu barədə Dövlət İmtahan Mərkəzindən məlumat verilib.
İmtahan Bakı şəhərində 5 binada təşkil olunub. İmtahanın idarə olunmasına 11 imtahan rəhbəri, 5 ümumi imtahan rəhbəri, 107 nəzarətçi, 10 buraxılış rejimi əməkdaşı cəlb edilib.
Aprelin 15-dən etibarən DİM-də imtahan protokolları və cavab kartlarının emalı aparılacaq. İmtahan nəticələri yaxın 2-3 gün ərzində elan olunacaq.
13-04-2024, 18:15
Kürdə batan ata və qızı hələ də tapılmayıb
Fövqəladə Hallar Nazirliyinin (FHN) Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri Kürün Ağcəbədi rayonundan keçən hissəsində ata və qızının axtarışlarına cəlb olunub.
Xatırladaq ki, ötən gün axşam saatlarında Zərdabın Qoruqbağı kənd sakini 6 yaşlı Səma Süleymanlı və onun atası Vaqif Süleymanlı Kür çayında batıblar. Yerli sakinlərin sözlərinə görə, əvvəlcə 6 yaşlı Səma suya yıxılıb. Atası övladını xilas etmək üçün onun ardınca suya atılıb. Onların hər ikisi suda boğulublar.
13-04-2024, 17:44
Gələn həftə ölkədə istilik mövsümü bitir
Gələn həftə Azərbaycanda istilik mövsümü bitəcək.
Hər il istilik mövsümü noyabrın 15-də başlayır, növbəti il aprelin 15-də başa çatır.
13-04-2024, 14:59
Şəmkir su anbarındakı torlar yığışdırıldı
Dövlət Ekoloji Təhlükəsizlik Xidmətinin və Su Nəqliyyatında Baş Polis İdarəsinin əməkdaşları tərəfindən Şəmkir su anbarında torların yığışdırılması ilə bağlı növbəti tədbir keçirilib.
Dövlət Ekoloji Təhlükəsizlik Xidmətinin rəsmisi Bəhruz Məhəmmədov açıqlamasında bildirib ki, keçirilən tədbirlər zamanı sözügedən su hövzəsindən 850 metr uzunluğunda 9 ədəd sintetik tor götürülüb.
Məlum olduğu kimi aprel ayının 1-dən "Təmiz hövzələr" şüarı ilə start verilən aksiya çərçivəsində Şəmkir su anbarı ilə yanaşı, digər su hövzələrində də tədbirlər davam etdirilir.
“Layihəyə dəstək olaraq fəallıq nümayiş etdirən və su hövzələrində rast gəldikləri sintetik torlar barədə Xidmətə məlumat verən bütün vətəndaşlara təşəkkür edir, onları hövzələrin mühafizəsində daha aktiv iştirak etməyə, balıq ehtiyatlarının qorunmasına dəstək olmağa çağırırıq” - B.Məmmədov bildirib.
Qeyd edək ki, ötən gün su anbarında torların qurulması ilə bağlı görüntülər yayılmışdı.
13-04-2024, 14:34
“Maşın bazarı”ndakı yanğın söndürüldü
Bakı şəhərinin Nizami rayonu, Babək prospektində yerləşən “Maşın bazarı” adlanan ərazidəki yanğının geniş sahəyə yayılmasına imkan verilməyib.
Bu barədə Fövqəladə Hallar Nazirliyindən məlumat verilib.
Qeyd edilib ki, nazirliyin Dövlət Yanğından Mühafizə Xidməti tərəfindən görülmüş zəruri və təxirəsalınmaz tədbirlər sayəsində “Maşın bazarı”ndakı yanğın qısa müddətdə tam söndürülüb.
12-04-2024, 19:50
Elçin Əmirbəyov Sloveniya rəsmiləri ilə COP29-dan danışdı
Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyovun Sloveniyaya işgüzar səfəri baş tutub.
Səfər çərçivəsində Sloveniya Respublikasının prezidentinin beynəlxalq münasibətlər üzrə müşaviri Zlatko Şabiç, Sloveniya Respublikasının Baş nazirinin Ofisində Beynəlxalq məsələlər üzrə dövlət katibi Voyko Volk, Milli Assambleyanın vitse-prezidenti Daniyel Krivets, Xarici və Avropa İşləri üzrə Nazirliyində siyasi məsələlər üzrə Baş direktor Mateya Norçiç Stamtsar ilə görüşlər keçirilib.
Görüşlər zamanı qarşı tərəf fevralın 7-də Azərbaycan Respublikasında keçirilmiş seçkilərdə qələbə münasibətilə Prezident İlham Əliyevə bir daha təbriklərini çatdırıb.
Keçirilmiş görüşlər zamanı Azərbaycan və Sloveniya arasında mövcud ikitərəfli əlaqələrin səviyyəsindən məmnunluq ifadə olunub. 2026-cı ildə ölkələrimiz arasında diplomatik əlaqələrin otuz illik yubileyinin qeyd olunacağına toxunularaq, iki ölkə arasında iqtisadi, enerji sahələri daxil olmaqla bir sıra potensial sahələr üzrə əməkdaşlığın daha da inkişaf etdirilməsinin, siyasi dialoqun gücləndirilməsinin, qarşılıqlı səfərlərin həyata keçirilməsinin əhəmiyyətinə toxunulub. Bu xüsusda, cari ilin mart ayında Bakıda keçirilmiş Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclaslarında iştirak məqsədilə Sloveniyanın ətraf mühit, iqlim və energetika nazirinin ölkəmizə səfəri məmnunluqla xatırlanıb.
Mövcud əməkdaşlığın parlament ölçüsünə toxunularaq, hər iki parlamentdə mövcud dostluq qrupları arasında təmasların fəallaşdırılmasının və qarşılıqlı səfərlərin həyata keçirilməsinin ikitərəfli münasibətlərin möhkəmləndirilməsinə töhfə verəcəyi qeyd olunub. Eyni zamanda çoxtərəfli beynəlxalq parlament platformaları çərçivəsində qarşılıqlı dəstəyin nümayiş olunmasının əhəmiyyətinə toxunulub.
BMT Təhlükəsizlik Şurasının qeyri-daimi üzvlüyünə seçilməsi və səlahiyyətlərinin icrasına başlaması münasibətilə Sloveniya tərəfinə təbriklər çatdırılaraq, ölkələrimizin beynəlxalq təşkilatlar çərçivəsində əməkdaşlığına dair fikir mübadiləsi aparılıb.
Görüşlər əsnasında Azərbaycanın ev sahibliyi edəcəyi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29), ölkəmiz ilə Avropa İttifaqı arasında əlaqələr, regional və beynəlxalq gündəlikdə duran məsələlərlə bağlı fikir mübadiləsi aparılıb.
Sloveniya tərəfi COP29-a ev sahibliyi etməsi münasibətilə Azərbaycan tərəfinə təbriklərini çatdıraraq, hazırda dünyada müşahidə edilən dəyişikliklər səbəbindən iqlim üzrə konfransın böyük əhəmiyyət kəsb etdiyini vurğulayıb və Azərbaycan tərəfi ilə COP29-a hazırlıq istiqamətində sıx əməkdaşlıq etməyə hazır olduqlarını bildirib. Səfər çərçivəsində sözügedən tədbir ilə bağlı Azərbaycan Respublikasının Prezidenti tərəfindən Sloveniya Respublikasını Prezidentinə ünvanlanmış dəvət məktubu qarşı tərəfə çatdırılıb.
Azərbaycan Respublikası Prezidentinin xüsusi tapşırıqlar üzrə nümayəndəsi Sloveniya tərəfini Azərbaycanla Ermənistan arasında normallaşma və sülh prosesi üzrə aparılan danışıqların inkişafı və mövcud vəziyyət, sülh prosesinin irəlilədilməsi istiqamətində ölkəmizin səyləri barədə ətraflı məlumatlandırıb. Regionda davamlı sülhün və sabitliyin bərqərar olunması üçün tarixi imkanın yarandığı qeyd olunaraq, Ermənistanın sülh prosesinə ciddi yanaşdığını sübut etmək üçün ziddiyyətli bəyanatlar və təxribatçı addımlardan çəkinməli, beynəlxalq hüququn norma və prinsiplərinə hörmət etməli olduğu vurğulanıb. Eyni zamanda Azərbaycan ilə sərhədyanı ərazilərdə hərbi infrastrukturun yaradılması, bölgədə militarizmin təşviqi, 5 aprel 2024-cü il tarixli üçtərəfli Brüssel görüşü, Avropa sülh mexanizmi xətti ilə və ABŞ büdcəsi hesabına Ermənistanın silahlandırılması kimi regionda ayırıcı xətlərin və nəticə etibarilə gərginliyin yaranmasına səbəb ola biləcək xarici təxribatçı, qeyri-şəffaf, qeyri-inklüziv təşəbbüslər və addımların qəbuledilməzliyi vurğulanıb və regionda davamlı sülhün nail olunmasına heç bir töhfə vermədiyi bildirilib.
Keçirilmiş görüşlər əsnasında həmçinin xalqlarımız arasında xüsusi bir bağ rolu oynayan və dostluq rəmzi olan Mehdi Hüseynzadənin “Mixaylo” irsinə toxunulub, qəhrəmanın xatirəsinə göstərilən böyük hörmətə, doğma və xoş münasibətə, habelə illik əsasda təşkil olunan tədbirlərdə dövlət səviyyəsində nümayiş olunan ehtirama görə Sloveniya tərəfinə dərin təşəkkür ifadə olunub.
Səfər çərçivəsində Azərbaycan Respublikası Prezidentinin xüsusi tapşırıqlar üzrə nümayəndəsi E.Əmirbəyov Sloveniya televiziya məkanınn aparıcı kanalı olan RTVSLO-da (TV Slovenija 1) yayımlan “Dnevik” xəbər verilişinə, eyni zamanda Sloveniya media bazarının ən nüfuzlu şirkətlərindən biri olna “Delo” nəşrinə müsahibə verib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!