Donuz qripi insanlar arasında baş versə də, bu infeksiyanın heyvanlara keçmə təhlükəsi daha böyükdür.
Butov.az xəbər verir ki, bunu Teleqraf.com-a Kənd Təsərrüfatı Nazirliyi yanında Dövlət Baytarlıq Xidməti mətbuat katibi Yolçu Xanəli deyib.
O bildirib ki, xəstəlik həm insandan heyvana, həm də heyvandan insana keçir. Buna zoonoz xəstəlik deyilir: ”Bu xəstəlik Gürcüstanda qeydə alınandan və sürətlə yayılandan sonra biz də heyvandarlıq təsərrüfatlarının qapalı şəraitə keçirilməsi barəsində bir daha bütün təsərrüfatlara tapşırıq verdik.
Hazırda təsərrüfatlarda dezinfeksiya tədbirləri aparılır, qara yara və klassik tauna görə peyvəndləmə tədbirləri icra edilir. İnsanların maariflənməsi işlərinə xüsusi diqqət edirik ki, sağlam olmayan insanları təsərrüfata buraxmasınlar və daim nəzarət etsinlər.
Hələlik ölkəmizdə fəaliyyət göstərən donuzçuluq təsərrüfatlarında hər hansı infeksion xəstəlik qeydə alınmayıb, hələlik vəziyyət sabitdir”.
Yolçu Xanəli təkcə Gürcüstanla sərhəd rayonlarında deyil, 7 rayon üzrə tədbirlərin aparıldığını deyib: “Qax, Qəbələ, İsmayıllı, Gədəbəy, Abşeron, Xaçmaz, Oğuz və Ucar rayonlarında donuzçuluqla məşğul olan təsərrüfatlar var. Həmin təsərrüfatlara daim baytarlıq baxışı keçirilir. Sırf baytarlıq baxışından söhbət gedir.
Çünki təsərrüfat sahibləri bilməlidir ki, adi qripin mutasiya nəticəsində xəstəliyin donuz qripinə keçmə ehtimalı çoxdur. Ona görə də, təsərrüfatlara qripli insanların buraxılmasına imkan verməsinlər”.