Azərbaycan Respublikası Prezidentinin Administrasiyası rəhbərinin müavini, Xarici əlaqələr şöbəsinin müdiri Novruz Məmmədov Newtimes.az-a müsahibə verib. Həmin müsahibəni təqdim edirik.

– Novruz müəllim, mart ayının ortalarında Bakıda "Beynəlxalq Təşkilatlarda İşləyən Azərbaycanlıların I Toplantısı''nın keçirilməsi nəzərdə tutulur. Bu təşəbbüs kim tərəfindən irəli sürülüb? Belə bir forumun keçirilməsi ideyası kimə məxsusdur?

– İlk növbədə onu qeyd etməliyəm ki, Azərbaycan artıq dünya birliyində özünəməxsus yeri olan bir ölkədir. Azərbaycan bir çox beynəlxalq və regional təşəbbüslərin ideya müəllifi və əsas icraçısıdır. Azərbaycan Respublikasının Prezidenti cənab İlham Əliyev tərəfindən həyata keçirilən işlərin məntiqi nəticəsi olaraq ölkəmiz 2012-2013-cü illərdə BMT TŞ-nin üzvü olmuşdur. Bu gün Bakıda bir sıra beynəlxalq təşkilatların regional ofisləri açılır. Bütün bunlar Azərbaycanın artan nüfuzunun təzahürüdür.

Məhz belə bir şəraitdə beynəlxalq təşkilatlarda işləyən bir qrup azərbaycanlı tərəfindən bir əlaqələndirmə mexanizmi, vahid şəbəkənin yaradılması təşəbbüsü irəli sürülüb. Bu istiqamətdə onlar ilkin olaraq Bakıda "Beynəlxalq Təşkilatlarda İşləyən Azərbaycanlıların I Toplantısı''nın keçirilməsinə Azərbaycan dövlətinin öz dəstəyini göstərməsini xahiş ediblər. Belə bir tədbirin təşkilinin məqsədəuyğunluğu, onun maraqlarımızın reallaşdırılmasında oynaya biləcəyi rol nəzərə alınaraq, bu toplantının dəstəklənməsi ilə bağlı qərar qəbul edilmişdir. Artıq Azərbaycan Respublikasının Prezidentinin tapşırığı ilə bu istiqamətdə müəyyən tədbirlərin görülməsi nəzərdə tutulub. Martın 17-18-də Bakıda "Beynəlxalq Təşkilatlarda İşləyən Azərbaycanlıların I Toplantısı''nın keçirilməsi bu istiqamətdə atılan ilk addımlardan olacaqdır.

– Belə bir tədbirin keçirilməsinin zəruriliyi nədən qaynaqlanır? Ümumiyyətlə, bu ideya özündə nəyi ehtiva edir?

– Bildiyiniz kimi, dünya siyasətində çoxtərəfli diplomatiyanın əhəmiyyəti çox böyükdür. Beynəlxalq təşkilatlarla iş hər bir ölkənin xarici siyasətində mühüm istiqamətlərdən birini təşkil edir. Burada ölkənin beynəlxalq təşkilatlarda üzvlüyü ilə yanaşı, onun vətəndaşlarının fərdi qaydada həmin təşkilatların idarə olunmasındakı iştirakı da bir reallıqdır. Əksər ölkələr beynəlxalq təşkilatlarda öz kadrlarını yerləşdirməyə çalışır, onlar arasında əlaqələndirməni təmin edir və bunun üçün müvafiq mexanizm yaradırlar.

Yenidən müstəqillik əldə etdikdən sonra Azərbaycanın üzləşdiyi əsas çətinliklərdən biri də ölkəni beynəlxalq səviyyədə təmsil edə biləcək kadrların azlığı idi. Ulu Öndər Heydər Əliyevin məqsədyönlü siyasəti nəticəsində ölkəmiz davamlı şəkildə inkişaf etdikcə və dünyada tanındıqca, beynəlxalq təşkilatlarda işləyən azərbaycanlıların da sayı artmağa başladı. İllər ötdükcə müxtəlif təşkilatlarda yardımçı vəzifələrdə çalışan Azərbaycan vətəndaşları ardıcıl olaraq təcrübə və bacarıq əldə edərək beynəlxalq təşkilatlarda daha əhəmiyyətli vəzifələrə çəkilməyə başladılar.

Azərbaycan Respublikasının Prezidenti cənab İlham Əliyevin rəhbərliyi altında qazanılan böyük uğurlar sayəsində Azərbaycan artıq dünya siyasətinin yüksək imicə malik iştirakçısı kimi qəbul edilir. Sözsüz ki, bu imic vətəndaşlarımızın beynəlxalq təşkilatlarda işləmək imkanlarına da müsbət təsir göstərir. Hazırda bir sıra beynəlxalq və regional təşkilatlarda, o cümlədən, BMT, BMT-nin müxtəlif ixtisaslaşmış qurumları və missiyaları, Dünya Bankı, Beynəlxalq Valyuta Fondu, ATƏT, Avropa Şurası və digər təşkilatlarda Azərbaycan vətəndaşları müxtəlif vəzifələrdə fəaliyyət göstərirlər. Bu gün dünyanın müxtəlif yerlərində, hətta beynəlxalq təşkilatların Okeaniyanın müxtəlif dövlətlərindəki nümayəndəliklərində belə Azərbaycan vətəndaşları təmsil olunurlar. Lakin qeyd etməliyik ki, bu insanların bir çoxu məhz öz təşəbbüsləri ilə müxtəlif beynəlxalq təşkilatlarda işə düzəlmişlər. İndiyədək bu istiqamətdə sistemli bir iş aparılmamışdır və buna görə də hazırkı təşəbbüs yeni bir mərhələnin başlanğıcıdır.

Beynəlxalq təşkilatlarda fəaliyyət göstərən vətəndaşlarımız arasında bu gün bir əlaqələndirmə mövcud deyil. Onlar vahid şəbəkədə birləşməyiblər, əksər hallarda bir-birindən xəbərsiz halda fəaliyyət göstərirlər. Üzləşdikləri problemlər qarşısında tək qalırlar. Bəzən hansısa bir vətəndaşımız müəyyən səbəblərə görə layiq olduğu vəzifəyə yüksələ bilmir, digər ölkələrin vətəndaşlarına üstünlük verilir. Bütün bunlar isə mövcud kadrların fəaliyyət göstərdikləri beynəlxalq təşkilatlar çərçivəsində təşviq olunmasını, onların köməkliyi ilə yenilərinin həmin təşkilatlarda işə cəlb olunmasını çətinləşdirir.

Bir faktı da diqqətinizə çatdırmaq istərdim. Azərbaycana qarşı qərəzli münasibət bəsləyən, Ermənistanı haqsız şəkildə müdafiə edən təşkilatların tərkibinə nəzər yetirsək, onların idarə olunmasında ermənilərin, erməni lobbisinə yaxınlığı ilə seçilən şəxslərin təmsil olunduğunu görərik. Bu baxımdan, beynəlxalq təşkilatlarda fəaliyyət göstərən Azərbaycan vətəndaşlarının vahid şəbəkədə birləşdirilməsi, yenilərinin işə cəlb olunması istiqamətində məqsədyönlü fəaliyyət Azərbaycanın bu qurumlarda maraqlarının müdafiə olunmasına, ölkəmiz haqqında həqiqətlərin çatdırılmasına və ölkəmizə qarşı yönələn qərəzli mövqeyə qarşı mübarizə aparmağa da yardım edə bilər.

– Novruz müəllim, toplantıda hansı məsələlərin müzakirə olunacağı gözlənilir?

Təşəbbüs Qrupunun əsas məqsədi beynəlxalq təşkilatlarda fəaliyyət göstərən azərbaycanlıların vahid şəbəkədə birləşdirilməsi, onlar arasında əlaqələndirməni təmin edəcək daimi mexanizmin formalaşdırılmasıdır. Tədbir bu məqsədlərin reallaşdırılması baxımından geniş fikir mübadiləsinin aparılması üçün nəzərdə tutulur.

Artıq Təşəbbüs Qrupu beynəlxalq təşkilatlarda fəaliyyət göstərən Azərbaycan vətəndaşlarının məlumat bazasını yaradıb və onları forumda iştiraka dəvət edib. Həmin vətəndaşlarımız da bu prosesə böyük maraq göstəriblər. Burada xüsusi vurğulamaq istərdim ki, bu zaman vətəndaşlarımızın fəaliyyət göstərdikləri beynəlxalq təşkilatlarda hansı vəzifəni tutmaları əsas meyar rolunu oynamayıb. İştirakçılar arasında istər rəhbər vəzifədə, istərsə də texniki işçi vəzifəsində fəaliyyət göstərən vətəndaşlarımız var.

Toplantıda müzakirə olunacaq məsələlərə gəlincə, bu sahədə daha öncə sistemli bir iş görülmədiyindən mövcud vəziyyətin təhlili mühüm əhəmiyyət kəsb edir. Beynəlxalq təşkilatların kadr siyasəti, bu istiqamətdə iş prinsipləri, Azərbaycan vətəndaşlarının fəaliyyət göstərdikləri təşkilatlardakı mövqeyi, qarşılaşdıqları çətinliklərin müzakirəsi gələcək addımların müəyyənləşdirilməsi baxımından vacibdir. Eyni zamanda, azərbaycanlı kadrların vahid şəbəkə çərçivəsində birləşdirilməsinin mümkün alət və vasitələrinə dair fikir mübadiləsi aparılacaq. Digər tərəfdən, mövcud kadrların öz vəzifələrində irəli çəkilməsi və yenilərinin işə cəlb olunması imkanları araşdırılacaq, göstərilə biləcək dəstəyin forma və xarakteri müzakirə olunacaq. Ümumiyyətlə, bu tədbirdə qarşıda duran problemlərin və gələcək planların hərtərəfli şəkildə müzakirə olunması nəzərdə tutulur.

– Gələcək planları qeyd etdiniz. Bu sahədəki gələcək planlar nədən ibarətdir?

Bildiyiniz kimi, Azərbaycanın dövlət siyasətinin ən mühüm prioritetlərindən biri "qara qızılın insan kapitalına'' çevrilməsidir. İnformasiya və biliyə əsaslanan insan kapitalını inkişaf etdirmək məqsədilə dövlət tərəfindən ardıcıl işlər görülür. Ölkə daxilində yeni, müasir təhsil ocaqları yaradılır, təhsil və elm sistemi təkmilləşdirilir, eyni zamanda xaricdə təhsillə bağlı dövlət proqramları həyata keçirilir. Belə bir toplantının keçirilməsinə dəstək də məhz bu prioritetdən irəli gəlir.

"Beynəlxalq Təşkilatlarda İşləyən Azərbaycanlıların I Toplantısı''nda aparılacaq fikir mübadiləsi və müzakirələrdən sonra yeni bir mənzərənin açılacağını düşünürük. Azərbaycanlı kadrları vahid şəbəkədə birləşdirəcək mexanizm çərçivəsində hər bir beynəlxalq təşkilata münasibətdə xüsusi yanaşmanın tətbiq olunması, azərbaycanlı kadrların irəli çəkilə biləcəyi və yenilərinin cəlb oluna biləcəyi vəzifələrin müəyyən edilməsi, bu vəzifələr üçün tələb olunan peşəkar keyfiyyətlərin artırılması üçün müvafiq təlim və təcrübələrin təmin olunması və s. prioritet istiqamətləri təşkil edir. Bütövlükdə, belə bir mərkəzləşdirilmiş sistemin yaradılması beynəlxalq təşkilatlarda fəaliyyət göstərən azərbaycanlı kadrların əlaqələndirilməsi və təşviq olunması baxımından böyük əhəmiyyət kəsb edir.

Newtimes.az