Azərbaycanda Hərbi prokuror təyin edildi

Azərbaycanda yeni Hərbi prokuror təyin edilib.
Bu barədə Prezident İlham Əliyev Sərəncam imzalayıb.
Sərəncama əsasən, Bəhruz Əhmədov Baş prokurorun müavini – Azərbaycanın Hərbi prokuroru təyin edilib.
Qeyd edək ki, bundan əvvəlki Hərbi prokuror Xanlar Vəliyevin səlahiyyət müddəti ötən ay başa çatıb.

Gənc əsgərlər and içdilər - FOTO

Müdafiə naziri general-polkovnik Zakir Həsənovun təsdiq etdiyi 2025-ci ilin hazırlıq planına uyğun olaraq, mayın 10-da Azərbaycan Ordusunda gənc əsgərlərin andiçmə mərasimləri keçirilib.
Hərbi orkestrlərin müşayiəti ilə döyüş bayraqları təntənəli surətdə sıra meydanlarına gətirildikdən sonra tədbirlər açıq elan olunub.
Əvvəlcə xalqımızın Ümummilli Lideri Heydər Əliyevin, həmçinin ölkəmizin müstəqilliyi, ərazi bütövlüyü və suverenliyi uğrunda həlak olanların xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.
Təntənəli surətdə Hərbi andı qəbul edən gənc əsgərlər Vətənə sadiq olacaqlarına söz veriblər.
Tədbirlərdə Müdafiə Nazirliyinin nümayəndələri və hərbi hissə komandirləri çıxış edərək andiçmə mərasiminin 10 May tarixinə - Xalqımızın Ümummilli Lideri Heydər Əliyevin anadan olmasının 102 illiyinə təsadüf etməsini xüsusi vurğulayaraq, Ulu Öndərin şərəfli ömür yolu və çoxşaxəli fəaliyyətindən, xalqımız və dövlətçiliyimiz üçün gördüyü əvəzsiz xidmətlərdən danışıb, gənc əsgərləri əlamətdar gün münasibətilə təbrik edib, onlara Vətənə, dövlətə və Ali Baş Komandana, hərbi anda sadiq olmalarını, nümunəvi xidmət etməyi, silah və texnikanın sirlərini dərindən öyrənərək döyüş hazırlıqlarını daim yüksəltmələrini, komandir-rəis heyətinin əmr və göstərişlərini dəqiq və vaxtında yerinə yetirmələrini, torpaqlarımızın müdafiəsi naminə hər an hazır olmalarını tövsiyə ediblər.
Andiçmə mərasimləri hərbi qulluqçuların təntənəli marşlarla tribunaların önündən keçidləri ilə başa çatıb.

Hərbçilərə Sumqayıtda mənzillər verildi - FOTO

Əsası Ümummilli Lider Heydər Əliyev tərəfindən qoyulan ordu quruculuğumuzun bu gün Ulu Öndərin siyasi xəttinin layiqli davamçısı, Müzəffər Ali Baş Komandan İlham Əliyev tərəfindən qətiyyətlə davam etdirilməsi nəticəsində Azərbaycan Ordusu gün keçdikcə qüdrətlənməkdədir.
Ölkə rəhbərliyinin diqqət və qayğısı sayəsində hərbi qulluqçuların sosial məişət şəraitinin daha da yaxşılaşdırılması istiqamətində müvafiq tədbirlər görülür.
Azərbaycan Respublikası Prezidentinin «Azərbaycan Respublikası Silahlı Qüvvələrinin hərbi qulluqçularının sosial müdafiəsinin gücləndirilməsi tədbirləri barədə» müvafiq Fərmanının icrasının təmin edilməsi məqsədilə hərbi qulluqçulara daimi mənzillərin verilməsi üzrə həyata keçirilən fəaliyyətlər davam etdirilir.
Müdafiə Nazirliyindən verilən məlumata görə 20 təqvim ili və daha çox qüsursuz xidmət etmiş bir qrup hərbi qulluqçuya (hərbi xidmətdə olan, ehtiyata buraxılmış hərbi qulluqçulara və ya onların varislərinə) Sumqayıt şəhərində yerləşən MİDA Yaşayış Kompleksindəki mənzillər təqdim olunub.
Qeyd edək ki, mənzil təminatı proqramı mərhələli şəkildə həyata keçirilir və hərbi qulluqçuların sosial rifahının yaxşılaşdırılması istiqamətində görülən işlər bundan sonra da davam etdiriləcəkdir.

QƏLƏBƏ – 80


Hər şey cəbhə üçün, hər şey qələbə naminə...



Müharibə! Müharibə bəşər övladının lənət yağdırdığı, insanın - insan tərəfindən məhvinə hakim kəsilən vəhşətli savaş meydanıdır!
O cümlədən, müharibələr milyonlarla günahsız insanların qırğını ilə nəticələnir.
Sivilizassiyalı dünyamız xalqları bir - birinə yaxınlaşdırsa da, qaraguruhçu təcavüzkar qüvvələr müharibə ideyasından əl çəkmək istəmirlər. Bu səbəbdən də minilliklərin yaddaşında müharibə kəlməsi mütərrəqi, sülhpərvər insanlar tərəfindən daimi nifrət və qorxu hissi ilə yad edilir.
Ötən əsrin 60 - cı illərində Norveç Elmlər Akademiyasının alimləri tərəfindən elmi tətqiqt araşdırmalarında müharibələr və onun dağıdıcı təsirlərinə dair maraqlı nəticələr əldə edilmişdir. Məlum olmuşdu ki, bəşər cəmiyyəti eramızdan əvvəl 3600 - cı ildən bəri cəmi 292 il müharibəsiz keçib. Bu illər ərzində 14531 müharibə olub.
Müharibələr zamanı 3,6 milyard insan həlak olub, aclıqdan, xəstəlikdən və səfalətdən əziyyətlər çəkib. Halbuki müharibələrin törətdikləri dağıntıların yenidən bərpasına sərf edilən vəsaitlər hesabına 156 metr enində və 10 metr qalınlığında evimiz olan planetmizin əhatəsində qızıldan nəhəng kəmər çəkmək olardı...
Zaman - zaman səngiməyən müharibələrin ən dəhşətlisi 1939 - 1945-ci illərdə Hitler almaniyası tərəfindən törədilən İkinci Dünya Müharibəsidir. Bu müharibədə 60 milyonda çox insan məhv edilmiş, bir o qədər də insan evsiz - eşiksiz qalıb dağıntılar arasında rəzalətlə yaşamağa məhkum olunmuşdu.
Faşizm üzərində qələbənin 80 - ci ildönümünə tarixi baxış
Tarixdə qanlı müharibə kimi yadda qalan İkinci Dünya Müharibəsi Hitler almaniyası 1939 - cu il sentyabrında Avropanın dinc dövləti Polşanı işğal etdi. Müharibəyə tərəflər arasından 110 milyon hərbçi cəlb edilmiş, Avropa, Asiya və Afrika qitələrində yerləşən 61 dövləti öz “caynağına” almışdı. Avropanı istila edən Hitler ordusu işğalçı yürüşləri ilə kifayətlənmədi. Yeni cəmiyyət kimi tanınan SSRİ dövlətini sarsıtmaq istəyirdi. 22 iyun 1941 - ci ildə müharibə elan etmədən SSRİ üzərinə qəflətən hücum edən Hitler bütün hərbi kontingetini cəlb etmişdi. Coğrafii mövqeyi və zəngin resruslara malik olan SSRİ dövlətini məğlub edib dünyaya ağalıq etmək xülyası ilə meydan oxuyurdu. Lakin, 6 ilə yaxın davam edən müharibə, 1945 - ci ilin mayın 9 - da Alman Reyxinin məğlubiyyəti ilə sona çatdı...
Müharibədə qazanılmış qələbə SSRİ ərazisində yaşayan xalqların cəsur övladlarının döyüş meydanında göstərdikləri rəşadəti tarixə qızıl hərflərlə yazılmış oldu...
Azərbaycan Böyük Vətən Müharibəsi illərində
Sovet dönəmində Böyük Vətən Müharibəsi adı altında İttifaq ərazisindən milyonlarla insan, o cümlədən 650 min Azərbaycan övladları da səfərbər edilib döyüş meydanına, ön cəbhəyə göndərildi. Arxa cəbhədə isə iki milyondan çox Azərbaycan vətəndaşı gecə - gündüz yorulmaq bilmədən ordunu ərzaq, döyüş sursatı, geyim, silah, hərbi texnika, yanacaq sursatı ilə təmin edirdi.
Vəhşət doğuran bu amansız müharibədə döyüşən həmyerlilərimizin bir qismi qəhrəmancasına həlak oldu, bir qismi isə ağır yaralanıb şikəst halında ordudan tərxis edildi.
Müharibə zamanı naməlum ad altında itkin düşənlərimiz də çox oldu...
Böyük güc dövlətlərin strateji planlarında əsas hədəfə çevrilən və 1939 - cu ildən iqtisadi, canlı qüvvələri ilə Azərbaycan Respublikası müharibədə iştirakı zəruri sayılırdı. Sovet tarixşünaslığında Böyük Vətən Müharibəsi dövründə Azərbaycanın ön və arxa cəbhədə xidmətləri geniş işıqlandırılmışdır və bu həqiqət danılmazdır. Müharibənin başlanmasının əsas səbəbkarı olan Hitler almaniyası Bakı neftini ələ keçirmək, Azərbaycanın bütün təbii sərvətlərinə sahib çıxmaq adı altında xüsusi plan hazırlatmışdı.
“Qafqazın idarə olunması planı” bilavasitə Azərbaycana və onun paytaxtı Bakı şəhərinə yönəldilmişdi. Faşizmin məkrli planının həyata keçirilməsinə yol verməyən Sovet rəhbərliyi sərt və inadkarlığı ilə yeni hazırlıq metodlarından istifadə etməyə başladı. Düşmənin hücum planının qarşısı qətiyyətlə dayandırıldı.
Bakı neftinə sahib çıxa bilməyəcəyinin mümkünsüz olduğunu bilən Hitler 1942 - ci ilin iyunun 1 - də Poltava şəhərində keçirdiyi hərbi şurada çıxış edərək; - “Əgər az miqdarda neft emal edən Maykop və Qroznını ələ keçirə bilməsək müharibəni dayandıracam!”
Müharibənin ön cəbhəsinə səfərbər edilmiş Azərbaycanın oğul və qızları və 40 mindən çox könüllülər dəstə halında cəbhəyə, düşmənlə döyüşməyə yollandı. Azərbaycan sözün əsil mənasında Sovet imperiyasının cəbhəxanasına çevrilmişdi. Ərzaqdan məişət əşyalarına qədər, yanacaqdan hərbi texnikalara qədər, geyimdən silah sursatlarına qədər cəbhənin təchizatını öz üzərinə götürüb gecə - gündüz təəmin edən Azərbaycan müharibənin taleyində əsas faktora çevrilmişdi...
İmişli rayonu müharibə illərində
İkinci Dünya müharibəsində İmişli rayonundan 4047 nəfər cəbhəyə səfərbər edilmişdi. Krım, Odessa, Kiyev, Moskva, Stalinqrad, Leninqrad və başqa cəbhə bölgələrində gedən döyüşlərdə qəhrəmancasına döyüşən həmyerlilərimizin keçdiyi zəfər yolu unudulmazdır.
Müharibə zamanı onlardan 1545 nəfəri həlak olmuş və itkin düşmüşdü. Ötən əsrin 60 - cı illərində rayonun mərkəzi meydanında “Naməlum əsgər” in xatirəsini əbədiləşdirən monumental heykəl ucaldılmışdı. Abidənin podstamentində müharibədə həlak olmuş 23 nəfərin adı həkk olunmuşdu. Onlardan yalnız 7 nəfəri azərbaycanlı, qalanları isə rus və tatar xalqının nümayəndəsi olduğunu təmsil edirdi. Aradan xeyli müddət keçəndən sonra, 1979 - cu ildə rayonda yeni rəhbərin, Rayon Partiya Komitəsinin I katibi seçilən Qadir İsmayılzadə, qısa zaman kəsiyində memarlıq baxımından rayon mərkəzinin abadlaşdırılmasına xüsusi diqqət göstərdi. Göz oxşayan yeni yaşıllıq meydançaları, parklar və küçəllər müasir şəhərsalma qaydalarında simasın dəyişdi. Bu dövrdə Azərbaycan Respublikası Mərkəzi Komitəsinin birinci katibi Heydər Əliyev rayon sakinlərinin görüşünə gəlmişdi. Dəmir yolu vağzalında sakinlərin alqışları ilə qarşılanan Heydər Əliyev ilk görüşdə şəhərdə görülmüş abadlıq işlərini razılıqla qiymətləndirmişdi. Sonra meydanın mərkəzində “Naməlum əsgər” abidəsinə doğru hərəkət edərək rayon zəhmətkeşləri ilə görüşüb şəxsi məsələləri ilə maraqlandı. O, abidə önündə həkk olunmuş adları diqqətlə oxudu. Bu an sinəsində orden - medalları ilə seçilən, müharibə iştirakçısı, rayon müharibə veteranlar şurasının sədri Ağası Nəsirov irəli keçdi.
Heydər Əliyev onunla səmimi görüşəndən sonra, təbəssümlə: - Görürəm, orden - medallarından bilinir ki, müharibədə vuruşmusunuz!
Ağası Nəsirov: - Bəli, yoldaş Heydər Əliyev. Bakıdan - Berlinə qədər 1941 - 1945 - ci illərdə hərbiçi zabit kimi döyüş yolunu keçmişəm. Tərxis olunandan sonra, hazırda, rayon müharibə veteranlar şurasının sədri vəzifəsini icra edirəm.
Heydər Əliyev: - İmişlidən neçə nəfər müharibəyə səfərbər olunmuşdu?
Ağası Nəsirov: - Rayon Hərbi komissarlığının rəsmi sənədi əsasında 4047 nəfər müharibəyə səfərbər edilib. Onlardan 1545 nəfəri cəbhə bölgələrində həlak olub, itkin düşüb. Apardığımız araşdırma və yazışmalar zamanı onlardan 360 nəfərin həlak olduğu yerləri və uyduğu qardaşlıq məzarlarını məlum etmişik.
Heydər Əliyev: - Aydındır, Burada onların adları az göstərilir. Gələcəkdə bunları nəzərə almaq lazımdır.
Qadir İsmaylzadə: - Yoldaş Əliyev, yaxın zamanda bu məsələnin həllinə çalışacağıq.
Heydər əliyev: - Görürəm! Az bir müddətdə fəaliyyətinizlə rayonun abadlıq işlərində xeyli iş görümüsünüz. Bu təqdirə layiqdir.
Heydər Əliyevin 1979 - cu ildə İmişli sakinləri ilə görüşündən sonra rayon mərkəzi abadlıq sahəsində öz simasını dəyişdi. Eyni vaxtda Tarix Diyarşünaslıq muzeyi, Şöhrət Muzeyi və Dövlət Rəsm Qalereyası, Şahmat məktəbi, Mədəniyyət sarayının inşasına başlanıldı. Ticarət yarmarkası, beşmərtəbəli binalar, müasir məktəblər, Araz çayı üzərində körpü, Kitab evi, Mərkəzi kitabxana binası, və onlarla infrastruktur mərkəzləri yaradıldı, prospektlər abadlaşdırıldı. Sözün əsil mənasında, tarixi Kür - Araz mədəniyyətinin Mil - Muğan düzündə ikinci Şəhərgah sayılan İmişli rayonu özünün intibah dövrünə qədəm qoydu.
Bütün bunlarla yanaşı mövzunun mahiyyətini zənginləşdirən və İkinci Dünya Müharibəsində döyüş yolu keçmiş İmişli sakinlərinin xatirəsini əbədiləşdirən Döyüş Şöhrəti kompleksindən bəhs etmək yerinə düşərdi.
Sov. İKP MK - nın qərarı ilə 1984 - cü ilin iyun ayında “1941-1945 - ci illərdə Böyük Vətən Müharibəsində sovet xalqının faşizm üzərində qələbəsinin 40 illiyi şərəfinə Ümumittifaq Baxışının keçirilməsi ilə tədbirlərə başlanıldı. Rayon Partiya Komitəsinin tapşırığı ilə şəhərin giriş hissəsində müasir memarlıq üslubunda Şöhrət Muzeyi Xatirə kompleksinin tikinti işləri aparıldı.
Kompleksin memarı Hafiz Qənbərov, Heykəltaraş professor İbrahim Zeynalov və Şöhrət Muzeyinin ekspozisya tərtibatçısı Mədəniyyət Nazirliyinin studiya rəhbəri Cahangir Məmmədov fəaliyyət göstərirdilər. Bu taleyüklü məsələdə rayon Tarixşünaslıq Muzeyinin əməkdaşları müharibə iştirakçılarının arxiv sənədlərini toplayıb muzeyin ekspozisiyasında xronoloji ardıcıllıqla yerləşdirdi. İki hektar sahəni əhatə edən kompleksdə Su Təssərrüfatı - Meliorasiya təşkilatının rəhbəri Fəyyaz Həşimov və bir çox təşkilatların işçiləri çalışırdı. 1985 - ci ilin aprelində Professor İbrahim Zeynalovun rəhbərliyi ilə 18 metr hündürlükdə “İki od arasında” memorial xatirə abidəsi ucaldıldı. Gündəlik işlərə nəzarət edən rayon Partiya Komitəsinin ideoloji sahə üzrə katibi Gözəl xanım Səfərovanın xidmətləri danılmazdır.
Müharibədə həlak olan həmyerlilərimizin əzizləri İttifaqın müxtəlif yerlərində döyüşdə həlak olmuş və “Qardaşlıq məzarında” uyuyan döyüşçülərin məzarından gətirdikləri torpaq və urnaları abidənin potstamentinin alt tərəfində xüsusi qablarda yerləşdirdilər. Muzeydən abidəyə qədər yeraltı kabel çəkildi. Abidədə dinamik vasitəsi ilə bəstəkar Qara Qarayevin Müharibədə həlak olanların şərərəfinə bəstələdiyi “Rekviyim” musiqisi gecə - gündüz xüsusi muzeydə yerləşdirilmiş maqnitofanla səsləndirilməsi üçün hazırlıq işləri aparıldı.
Şöhrət muzeyi və Kompleksi 1985 - ci il mayın 5 - də rayon sakinlərinin iştirakı ilə açılışı oldu. Mərasimi Moskva “Zaman” xəbərlər proqramı yayımının telejurnalisti Mais Məmmədov tərəfindən çəkiliş apardı.
Mayın 6 - da Moskvadan “Zaman” proqramında geniş reportaj verildi. Bu reportajın sədası qısa zaman kəsiyində ittifaqın hər yerində yad edildi. !985-ci ilin noyabrında Moskvadan birbaşa İmişliyə gələn V.İ. Leninin qardaşı qızı, professor Olqa Dimitrovna Ulyanova və həyat yoldaşı general polkovnik, akademik A.Y. Maltsev Şöhrət Muzeyi və Xatirə Kompleksini ziyarət etdilər.
!985 - ci ilin noyabrında Alman faşizm üzərində Sovet Ordusunun Qələbəsinin 40 illiyinə həsr olunmuş Ümumittifaq baxışı yekunlaşdı. Bu baxış zamanı İmişli Şöhrət muzeyi və Xatirə Kompleksi qalib sayıldı.
Yarışın sədri SSRİ Mədəniyyət Naziri P.N. Demiçev və sədr müavini SSRİ Həmkarlar İttifaqının sədri Y.İ. Naumenkonun imzası ilə II dərəcəli Diploma layiq görüldü.
İndi, ötən dövrdən artıq 80 il keçib. Artıq Azərbaycan xalqı azğınlaşmış, bədnam erməni silahlı qüvvələri ilə çarpışmalı oldu. Vətənimizin ayrılmaz parçası olan Qarabağ diyarı silahlı erməni qüvvələri tərəfindən işğal olunmuşdu. Xəyanətkar əməllərindən peşiman olmayan erməni neofaşistləri silahı yerə qoymaq istəmirdi.
Nəhayət Beynəlxalq Aləmdə haqq səsimizə biganə yanaşmanın və Ölkə başçısı, Ali Baş Komandan cənab İlham Əliyevin qətiyyətli addımı nəticəsində erməni silahlı qüvvələri əzəli yurdumuz Qarabağ diyarında məhv edilərək rusvaycasına qovuldu.
Qarabağ diyarında həyat yenidən öz məcrasına düşdü. Müasir memarlıq üslubunda yeni qəsəbə və şəhər mərkəzləri salınır. Yollar çəkilir, yeni infrastrukturlar, sənaye mərkəzləri yaradılır. İnsan amili üçün göz oxşayan mərkəzlər istifadəyə verilir. Sakinlər öz əzəli yurdlarına köçürülür və inşa edilmiş evlərdə yerləşdirilir. Bir sözlə hər nə varsa insanların normal həyat tərzinə həsr olunur...
Artıq arxada qalmış bu müharibədə İmişli sakinlərinin rəşadəti tarixdə qızıl hərflərlə qeyd olunur. İmişli Şöhrət Kompleksində uyuyan şəhidlərimizin məzarı müqəddəs məkana çevrilmişdi. Allah bütün şəhidlərimizə rəhmət eləsin. Ruhları şad, məkanları cənnət olsun. Qazilərimizə səbir və sağlam ömür diləyirəm.
İkinci Dünya Müharibəsində Azərbaycan Respublikasının xidmətləri.
Dünya tarixşünaslığında, Avropa dövlətlərinin hərbi, elmi tətqiqat mənbələrində bir fikir bu gün də aktuallığını qüvvədə saxlayır.
Həqiqətən də Azərbaycan dövləti İttifaqın hərbi potensialının əsas bazası kimi müharibədə fəaliyyəti genişdir. Müharibənin taleyində isə paytaxtımız Bakı şəhəri “Qəhrəman şəhər” siyasi stasusunu bu günə qədər almamış və yad edilmir.
Bütün bunlarla yanaşı ittifaqda hər bir sahədə seçilən respublikamızın igid oğul - qızları inamla vuruşmuşdular. Cəbhə bölgəsində bir - birinin ardınca yaradılmış 77 - ci diviziya “Simferopol diviziyası”, 223 - cü diviziya “Belqrad diviziyası”, 271 - ci divizya “Qarlov diviziyası”, 416 - cı “Taqanroq diviziyası”nın şücayəti və keçdiyi döyüş yolları azərbaycanlıların Böyük Vətən müharibəsi cəbhələrində göstərdiyi qəhrəmanlıqlar xarici dövlətlərinin də diqqətini cəlb etmişdi. Ölkənin iqtisadiyyatı müharibə dövrünün qanunları ilə idarə olunurdu. İstehsalda iş saatları 10 - 12 saata qaldırılmışdı. “Hər şey cəbhə üçün, hər şey qələbə naminə!” devizi ilə əməkçilər gecə - gündüz çalışırdılar.
Müharibə illərində Bakı ölkə neftinin 80 - 85 faizini, benzin və dizel yanacağının 85 - 90 faizini istehsa edirdi. Mühim silah növləri, mərmilər, patronlar Bakı müəssisələrində istehsal olunurdu. Faşist qüvvələrini vahiməyə salan əfsanəvi “Katyuşa”, BM - 13 hərbi texnika maşını və mərmiləri Bakıda istehsal olunurdu. Xalqımızın tərbiyə edib boya - başa çatdırdığı yüzlərlə oğul və qızlarımız cəbhə bölgəsində qəhrəmanlıq göstərmişdilər. Onlardan 121 nəfəri o dövrün ən ali mükafatı, Sovet İttifaqı Qəhrəmanı adına layiq görülmüşdü. On minlərlə həmyerlimiz isə xidmətlərinə görə orden, medallarla təsis edilmişdi. Müharibə zamanı mühacirətdə olan görkəmli ictimai xadim və ziyalılarımız azərbaycanlıların taleyinə biganə qalmamışdı. Onlar faşizmin mənfur planlarını rədd edərək Azərbaycanı bu müharibədən kənarlaşdırılmasına çalışırdılar.
Müharibə Veteranı Ağası Nəsirov Berlin şəhərində
Müharibənin fəlakətləri...
Faşizmlə döyüşdə Avropa, Asiya, Afrika və nəhayət Amerikada 60 milyondan çox insanın, hərbiçinin ölümü ilə nəticələndi. Birinci Dünya Müharibəsindən 5 - 6 dəfə çox fəlakətlər gətirdi. Bütövlükdə müharibənin törətdiyi ağrılı fəsadlar 5 trilyon dəyərində hesablanmışdı. Bu müharibədə qələbənin əldə olunması on minlərlə soydaşımızın həyatı bahasına başa gəldi. Azərbaycan xalqı 34 ildir ki, öz istiqlaliyyətinin tam sahibidir. Baxmayaraq ki, ərazimizin 20 faizi yadelli erməni militarizmi tərəfindən işğal olunmuşu. Ancaq Azərbaycan dövlətinin Yeni Qurucusu , Ümummilli lider Heydər Əliyevi qlobal siyasəti sayəsində öz ərazi bütövlüyünü, müstəqilliyini bərpa etmiş, yaşamış və dünyanın inkişaf etmiş dövlətləri sırasına çıxmışdır.

Vaqif RÜSTƏMOV,
İmişli rayon Tarix Diyarşünaslıq və
Şöhrət Muzeyinin sabiq direktoru,
təqaüdçü tarix müəllimi

Macarıstanın Baş Qərargah rəisi Azərbaycanda - VİDEO

Azərbaycanda rəsmi səfərdə olan Macarıstan Müdafiə Qüvvələrinin Baş Qərargah rəisi, professor, general Qabor Böröndinin rəhbərlik etdiyi nümayəndə heyəti Hərbi Hava Qüvvələrinin (HHQ) Mərkəzi Komanda Məntəqəsi, Kibertəhlükəsizlik Mərkəzi və komando hərbi hissələrindən birini ziyarət edib.
Bu barədə Müdafiə Nazirliyindən məlumat verilib.
Bildirilib ki, əvvəlcə HHQ-nin Mərkəzi Komanda Məntəqəsinə gələn nümayəndələrə müdafiə nazirinin müavini - Hərbi Hava Qüvvələrinin komandanı general-polkovnik Namiq İslamzadə müasir standartlara cavab verən, yüksək texnoloji imkanlarla təchiz edilmiş komanda məntəqəsinin strukturu və fəaliyyəti barədə məlumat verib. Qonaqlara Azərbaycanın hava məkanına nəzarət, uçuş əməliyyatlarının koordinasiyası və qərargah səviyyəsində idarəetmə prosesləri barədə ətraflı brifinq təqdim olunub.
Sonra Kibertəhlükəsizlik Mərkəzinə gələn nümayəndələr Azərbaycan Ordusunun silahlanmasına daxil olan müasir silah sistemi və informasiya texnologiyaları vasitələrinin kibertəhlükəsizliyinin təmin edilməsi istiqamətində həyata keçirilən fəaliyyətlər, eləcə də Mərkəzdə yaradılmış şəraitlə yaxından tanış olub. Nümayəndə heyətinə müasir kibertəhdidlərə qarşı süni intellekt əsaslı kibermüdafiə vasitələri barədə ətraflı məlumat verilib.
Daha sonra hər iki ölkənin Baş Qərargah rəisləri komando hərbi hissələrindən birini ziyarət edərək hərbi hissədə yaradılan şəraitlə tanış olublar. Hərbi qulluqçuların dağ komando qülləsində və kəşfiyyat cığırında fəaliyyətləri izlənildikdən sonra Azərbaycan Ordusunun istifadəsində olan silah-sursat, təchizat və döyüş texnikasından ibarət sərgi nümayiş olunub, onların taktiki-texniki xüsusiyyətləri, düzgün istifadə qaydaları ilə bağlı məlumat verilib.

Hərbçimiz vəfat edib - FOTO

Azərbaycan Ordusunun hərbçisi vəfat edib.
Müdafiə Nazirliyinin təsdiqlədiyi məlumata görə, müddətdən artıq həqiqi hərbi xidmət hərbi qulluqçusu Fərid Elşən oğlu Nağıyev dünyasını dəyişib.
Onun ağır gedişli meningoensefalit xəstəliyi səsəbindən vəfat etdiyi qeyd olunur.
Faktla bağlı araşdırma aparılır.

Allah rəhmət eləsin!

Zakir Həsənov xüsusi təyinatlılarla görüşdü - FOTO

Aprelin 30-da Müdafiə Nazirliyinin rəhbər heyəti Xüsusi Təyinatlı Qüvvələrin yaradılmasının 26-cı ildönümü münasibətilə "N" hərbi hissəsində keçirilən mərasimdə iştirak edib.
Müdafiə Nazirliyinin Mətbuat Xidmətindən bildirilib ki, əvvəlcə Ulu Öndər Heydər Əliyevin hərbi hissənin ərazisindəki büstü və şəhidlərimizin xatirəsinə ucaldılmış abidə kompleksinin önünə gül dəstələri düzülüb.
Sonra müdafiə naziri general-polkovnik Zakir Həsənov xüsusi təyinatlılarla görüşüb.
Müdafiə naziri Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev və Birinci vitse-prezident Mehriban xanım Əliyevanın diqqət və qayğısı sayəsində hərbi qulluqçuların sosial-məişət şəraitinin yaxşılaşdırılması, qayğı və problemlərinin həlli istiqamətində atılan mühüm addımlardan danışıb.
44 günlük Vətən müharibəsində, eləcə də digər əməliyyatlarda xüsusi təyinatlıların göstərdiyi qəhrəmanlıq nümunələrini qeyd edən nazir onların fəaliyyətinin Azərbaycan Respublikasının Prezidenti tərəfindən hər zaman yüksək qiymətləndirildiyini xüsusi vurğulayıb.
Nazir xüsusi təyinatlıları təbrik edib, onlara gələcək xidmətlərində uğurlar arzulayıb və müvafiq tövsiyələr verib.
Tədbirdə Azərbaycan Ordusunun digər hərbi qulluqçuları kimi XTQ mənsublarının da sarsılmaz əzmi və yüksək peşəkarlığının ölkəmizin qürur nişanəsi olduğu diqqətə çatdırılıb.
Xüsusi təyinatlılar adından çıxış edən XTQ mənsubu göstərilən diqqətə görə dövlət başçısına və nazirliyin rəhbərliyinə minnətdarlığını bildirib. Ali Baş Komandanın istənilən əmr və tapşırıqlarına daim hazır olduqlarını qeyd edib və xüsusi təyinatlıların hər zaman olduğu kimi bundan sonra da Vətənə şərəflə xidmət edəcəklərini və göstərilən etimadı doğruldacaqlarını əminliklə vurğulayıb.
Sonda hərbi xidmətdə fərqlənən bir qrup hərbi qulluqçu mükafatlandırılıb.

Hərbçilərimiz Gürcüstandakı NATO təlimində - FOTO

Azərbaycan Ordusunun bir qrup hərbi qulluqçusu Gürcüstanda keçirilən "NATO-Georgia 2025" kompüter dəstəkli taktiki komanda-qərargah təlimində iştirak edir.
Müdafiə Nazirliyindən verilən məlumata görə, təlimin keçirilməsində əsas diqqət çoxmillətli bölmələrin böhranlara cavab əməliyyatının, eləcə də quruda və kiber məkanlarda kiçikmiqyaslı birgə əməliyyatların planlaşdırılması və təşkili üzrə hazırlığının artırılmasına yönəldilib.
Qeyd edək ki, NATO-ya üzv və tərəfdaş olan 17 ölkənin iştirakı ilə keçirilən beynəlxalq taktiki təlim mayın 8-dək davam edəcək.

Azərbaycanın hərb tarixinə dair kitab çapdan çıxıb

Milli Müdafiə Universitetin Hərbi Elmi-Tədqiqat İnstitutunda “Azərbaycanın hərb tarixi. Xronoloji xülasə (1920-1991-ci illər)” kitabının III hissəsi çap olunub. Kitabın müəllifi universitetin Hərbi Elmi-Tədqiqat İnstitutunun Humanitar elmlər şöbəsinin professoru, “Dərbənd” Xeyriyyə İctimai Birliyinin sədri, ehtiyatda olan birinci dərəcəli kapitan, tarix elmləri doktoru, professor Nurulla Əliyevdir.
Zəngin tarixi mənbələr əsasında dörd hissədən ibarət olan bu əsərdə Azərbaycan hərb tarixinin ən mühüm hərbi-siyasi hadisələrinin xronoloji xülasəsi (1920-1991-ci illər) verilib.

Kitabın üçüncü hissəsində 1920-1945-ci illərdə sovet Azərbaycanında mövcud olan hərbi-siyasi vəziyyət, yeni ordu quruculuğunun xüsusiyyətləri, onun məzmun və mahiyyəti, həmçinin Azərbaycanın 1941-1945-ci illərdə İkinci Dünya müharibəsində Sovet İttifaqının qələbəsinə verdiyi töhfələr açıqlanır, azərbaycanlıların Qırmızı Ordu sıralarına səfərbər edilməsi, onların milli hərbi birləşmələrin tərkibində İkinci Dünya müharibəsi cəbhələrində iştirakı məsələlərinə mühüm yer ayrılır. Burada milli bölmələrin formalaşması prosesi və döyüş yolu, onların Qafqazın müdafiəsində ən mühüm rolu, Ukrayna, Belarus, Baltikyanı ölkələr və Sovet İttifaqının digər işğal olunmuş ərazilərinin, eləcə də Şərqi və Mərkəzi Avropanın azad edilməsində Sovet Silahlı Qüvvələrinin digər birlik və birləşmələri ilə sıx əməkdaşlığı göstərilir.
Eyni zamanda, vəsaitdə 1946-1991-ci illərdə sovet Azərbaycanında milli tərkibli ordu hissələrinin təşkili, milli hərbi kadrlar hazırlığı, Azərbaycanın İkinci Dünya müharibəsində iştirakı, Ümummilli Lider Heydər Əliyevin rəhbərliyi altında XX əsrin 70-80-ci illərində Azərbaycanda aparılan böyük hərbi quruculuq işləri barədə faktlar yer alıb.
Kitab Milli Müdafiə Universitetinin xüsusi təyinatlı təhsil müəssisələrində “Azərbaycan hərb tarixi” fənnini öyrənən kursantlar və geniş oxucu kütləsi üçün nəzərdə tutulub.

Prezidentdən ehtiyata buraxılan hərbçilərlə bağlı SƏRƏNCAM

Hərbi xidmətdən ehtiyata buraxılanların geyim formalarını daşıya biləcəyi günlər müəyyyənləşib.
Prezident İlham Əliyev bununla bağlı “Hərbi xidmətkeçmə haqqında” Əsasnaməyə dəyişikliyi təsdiqləyib.
Belə ki, həqiqi hərbi xidmətdən ehtiyata və ya istefaya buraxılarkən hərbi geyim formasını daşımaq hüququ verilmiş şəxslər həmin geyim formasını yalnız rəsmi dəvət olunduqları tədbirlərdə, peşə bayramı günlərində, habelə Azərbaycan Silahlı Qüvvələri Günü, Zəfər Günü və Anım Günündə daşıya biləcəklər.