1-07-2026, 23:46
Romada Azərbaycanın Birinci
Qadın Jurnalisti ilə bağlı
kitab nəşr olunub!
Azərbaycan Milli Mətbuat və Jurnalistika 151 ci ildönümü erifesinde İtaliyada Azərbaycanın ilk maarifpərvər qadınlarından biri, jurnalist, publisist, yazıçı, pedaqoq Şəfiqə Əfəndizadə (1983-1959) ilə bağlı kitab nəşr olunub.
Romanın Bastogi Libri nəşriyat evi tərəfindən 30 iyun 2026 tarixində 5000 nüsha tiraj ilə
çaptan buraxılan: "Kölgələrdən gələn səslər və baxışlar. Lina Pietravalle - Şəfiqə Əfəndizadə. Gözlənilməz yaxınlıqlar" adlı kitabın müəllifləri İtaliyan ve Azərbaycanlı iki ziyalı qadındır.
İtalyan jurnalist və yazıçı Maria Stella Rossi və həmyerlimiz, tarixçi, publisist Melaike Hüseyn, Avropadakı müəyyən sosial münaqişələrə yeni bir perspektiv gətirmək və cəmiyyətlərdə təhsil və hüquq bərabərliyinə nail olma prosesinə qadınların müsbət töhfələrini xatırlatmaq məqsədi ilə bu qeyri-adi əsəri hazırlayıblar.
Bunula belə, İtalıya'da nəşr olunan kitab haqda danışan müəllifi həmvətənimiz Melaike Huseyin, kitab haqda məlumat verərkən Şəfiqə Əfəndizadəni İtaliyan yazıçı Lina Pietravalle (1887-1956) ilə birgə tanıdmaqla dövründə fəallığı ilə təsiri yüksək olan iki qadını, coğrafi və mədəni konteksttən asılı olmayaraq oxşar şəkildə yaşadıqları zaman və mekənlara inqılab təsiri yaradan, amma sonra unudulub, ümumiyyətlə beynəlhalq miqyasda qeniş çaplı tanınmayan taleylərindən ötrü bir arada təqdim etməyi uyğun gördüklərini bildirip.
Melaike Huseyın qeyd edib ki: tarixi şəxsiyyətlər haqqında kitablar çox vaxt onların yaşadıqları sosial və coğrafi kontekstdə qalır. Lakin, digər müəllif Maria Stella Rossi ilə birlikdə biz işimizi çox fərqli, hətta gözlənilməz və özünə məhsus cəsarətli bir şəkildə təqdim edirik.
Kitabda yer alan iki qadın həm öz mühitində göstərilir, həm də dünyanın digər tərəfində fundamental hüquqlar uğrunda mübarizə aparan başqa bir qadının mövcud ola biləcəyini göstərmək üçün ikinci aktiv bir şəxs kimi təqdim olunur.
Maraqlıdır ki, bu iki qadın heç vaxt görüşməyiblər; onları birləşdirən yeganə şey yaşadıqları dövr idi. Buna görə də, istər Avropada, istərsə də Qafqazda yaşamalarından asılı olmayaraq, onların dövrünü bu ikili perspektivdən yenidən araşdırmaq olduqca maraqlıdır.
Çox vaxt sosial problemlərin coğrafi yerlərin yerli xüsusiyyətlərindən qaynaqlandığı düşünülür. Lakin, qadınlar üçün keçmişi zaman və məkan baxımından mücərrədləşdirmədən qiymətləndirmək vacibdir ki, bir vaxtlar böyük çətinliklə qazanılan hüquqların bu gün necə getdikcə daha çox dəyərsizləşdirildiyini başa düşə bilək.
Ümid edirik ki, fəaliyyətləri, dünyagörüşü, istəkləri və nailiyyətləri ilə dövrünün şərtlərini nəzərə alaraq misilsiz dözümlülük nümayiş etdirən bu iki qadının hekayələrini oxumaq, oxucularımızın qadın kontekstındə kimi tarixi və intellektual proseslerin əhəmiyyətini anlamasına dərin təsir göstərəcəktir.
Qeyd edək ki, dövrün nüfuzlu mətbuat orqanlarında ("Şərqi-Rus", "Həyat", "İrşad", "Molla Nəsrəddin", "Diriliş", "Məktəb") məqalələr və mühtəlif publisistik yazıları ilə çıxış etmiş Şəfiqə Əfəndizadə haqda indiyə kimi Azərbaycan xaricində kitab nəşr edilməyib.
1-07-2026, 23:37
"Azərbaycan Mədəniyyət Səfirləri"
Assosiasiyası təsis olunub
“Azərbaycan Mədəniyyət Səfirləri” Assosiasiyasının təsis yığıncağı keçirilib. Yeni qurumun təsisçiləri mədəniyyət sahəsində fəaliyyət göstərən nüfuzlu qeyri-hökumət təşkilatlarıdır: “Sönməz Məşəl” Mədəni Əlaqələr İctimai Birliyi, “Turan” Türk Xalqlarının Mədəniyyətinin İnkişafına Dəstək İctimai Birliyi, “İz Mədəniyyətin İnkişafına Dəstək” İctimai Birliyi, “Azərbaycan milli kulinariyasının araşdırılması, təbliği və dünyaya inteqrasiyası” İctimai Birliyi və “Mirvarid Dilbazi Poeziya Məclisi” İctimai Birliyi.
Assosiasiyanın yaradılmasında əsas məqsəd Azərbaycanın zəngin maddi və qeyri-maddi mədəni irsinin qorunması, milli ədəbiyyatın, musiqinin, poeziyanın, xalq sənətkarlığının, milli kulinariyanın və türk xalqlarının ortaq mədəni irsinin ölkə daxilində və beynəlxalq aləmdə daha geniş təbliği, mədəni diplomatiyanın inkişaf etdirilməsi, mədəniyyət sahəsində fəaliyyət göstərən təşkilatlar arasında əməkdaşlığın gücləndirilməsi və Azərbaycanın mədəni irsinin qlobal miqyasda tanıdılmasına töhfə verməkdir.
Assosiasiya Azərbaycan mədəniyyətinin beynəlxalq platformalarda tanıdılması məqsədilə "Mədəniyyət günləri", beynəlxalq festivallar, sərgilər, ədəbi-bədii tədbirlər və yaradıcılıq layihələrinin təşkilinə xüsusi önəm verməyi nəzərdə tutur.
Assosiasiya nizamnaməsinə uyğun olaraq tarixi-mədəni irsin qorunması və bərpası, milli kulinariyanın elmi əsaslarla araşdırılması, mədəni irsin rəqəmsallaşdırılması, milli musiqinin, kəlağayı da daxil olmaqla milli geyimlərin, xalq tətbiqi sənəti nümunələrinin və digər qeyri-maddi mədəni irs elementlərinin təbliği istiqamətində layihələr həyata keçirəcək.
Assosiasiya öz fəaliyyətində UNESCO, ICESCO və digər beynəlxalq təşkilatlar, xarici ölkələrin mədəniyyət mərkəzləri, ali təhsil müəssisələri, yaradıcı birliklər və dövlət qurumları ilə əməkdaşlığın genişləndirilməsini, beynəlxalq mədəni dialoqun inkişafını və Azərbaycanın mədəniyyətinin dünyada daha geniş tanıdılmasını prioritet istiqamətlər kimi müəyyən edib.
Təsis yığıncağında Assosiasiyanın Nizamnaməsi təsdiq olunub, idarəetmə orqanları formalaşdırılıb və “Sönməz Məşəl” Mədəni Əlaqələr İctimai Birliyinin sədri Şəhla Nağıyeva üç il müddətinə “Azərbaycan Mədəniyyət Səfirləri” Assosiasiyasının prezidenti seçilib.
21-06-2026, 19:36
“Vətənimdir Azərbaycan!”
layihəsinə yekun vurulub
20 iyun 2026-cı il tarixində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Mirvarid Dilbazi Poeziya Məclisi İctimai Birliyi tərəfindən həyata keçirilən “Vətənimdir Azərbaycan!” layihəsinin yekun tədbiri Bakı şəhərində Gəncliyə Yardım Fondunda təşkil olunub.
Tədbir iştirakçıları əvvəlcə Azərbaycan milli geyimlərinin və qədim kəlağayı nümunələrinin nümayiş olunduğu sərgi ilə tanış olublar. Sərgidə xalqımızın zəngin milli-mədəni irsini əks etdirən eksponatlar nümayiş etdirilib, onların tarixi, hazırlanma xüsusiyyətləri və estetik dəyərləri barədə ətraflı məlumat verilib. Eyni zamanda, layihə çərçivəsində hazırlanmış rəqəmsal kataloq təqdim olunaraq qonaqlara milli geyimlərimiz və kəlağayı sənəti haqqında geniş məlumat çatdırılıb.
Tədbiri giriş sözü ilə açan Mirvarid Dilbazi Poeziya Məclisi İctimai Birliyinin sədri, layihə rəhbəri Güllü Eldar Tomarlı çıxışında milli irsin yaşadılması və gələcək nəsillərə ötürülməsi istiqamətində həyata keçirilən layihələrin əhəmiyyətindən bəhs edib. O bildirib ki, milli geyimlər və kəlağayı xalqımızın tarixini, mədəniyyətini və mənəvi dəyərlərini yaşadan mühüm irs nümunələrindəndir. Layihənin əsas məqsədinin milli dəyərlərimizin təbliği, xüsusilə gənc nəslin bu irsə marağının artırılması olduğunu vurğulayan layihə rəhbəri, göstərdiyi dəstəyə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə təşəkkürünü bildirib.
Sonra şəhid Müşfiq Orucovun anası Aygün Məmmədliyə söz verilib. Şəhid anası qeyd edib ki, milli dəyərlərimizin təbliği vacibdir. Kəlağayımız xanımlara çox yaraşır. O bildirib ki, xalqımızın milli-mənəvi irsinin yaşadılması, gənc nəslə düzgün şəkildə çatdırılması hər bir vətəndaşın mənəvi borcudur. Aygün Məmmədli vurğulayıb ki, milli geyimlərimiz və kəlağayımız Azərbaycan qadınının zərifliyini, mənəvi zənginliyini və milli kimliyini özündə əks etdirir. Şəhidlərimizin canı bahasına qoruduqları Vətənin dəyərlərinin yaşadılmasının onların xatirəsinə ən böyük ehtiram nümunələrindən biri olduğunu qeyd edən şəhid anası, bu istiqamətdə həyata keçirilən layihələrin böyük əhəmiyyət daşıdığını bildirib və belə tədbirlərin davamlı olmasını arzulayıb.
Daha sonra Mirvarid Dilbazi Poeziya Məclisi İctimai Birliyinin idarə heyətinin üzvləri Səringül Sadə, Lalə İsmayıl, Səyalı Dadaşova, Qulu İsmayılov, Vətəndaş İştirakçilıgının Təşviqinə Dəstək İB- nin sədri Taleh Əliyev, Ailələrə Sosial Dəstək
İB- nin sədri Esmira Rəhimova, Nadir Xəstəliklər Təşkilatları İttifaqının sədri Səadət Bayramova, AMEA- nın dosenti Səkinə Hacıyeva, şair, qazi Nadir Həsənoglu və Vüsal Sehranoğlu çıxış edərək layihənin əhəmiyyətindən, milli geyimlərin və kəlağayının Azərbaycan xalqının milli kimliyinin formalaşmasında oynadığı roldan danışıb, bu cür layihələrin davamlı şəkildə həyata keçirilməsinin vacibliyini qeyd ediblər.
Çıxışlarda vurğulanıb ki, milli-mənəvi dəyərlərin qorunması və təbliği cəmiyyətin inkişafı baxımından mühüm əhəmiyyət daşıyır. Qeyd olunub ki, milli geyimlər və kəlağayı yalnız maddi mədəniyyət nümunələri deyil, həm də xalqımızın tarixini, adət-ənənələrini və estetik dünyagörüşünü özündə əks etdirən dəyərli irs nümunələridir.
Tədbirin bədii hissəsində aşıq İsmayıl İncəli, aşıq Xədicə Göycəli və aşıq Samir Borçalı maraqlı musiqi nömrələri ilə çıxış ediblər. Zəhra Əzimova isə tədbirdə milli-mənəvi dəyərlərə və vətənpərvərlik mövzusuna həsr olunmuş şeirlər səsləndirib. Səsləndirilən aşıq havaları, xalq musiqisi nümunələri və şeirlər iştirakçılar tərəfindən böyük maraq və alqışlarla qarşılanıb.
Layihənin məqsədi Azərbaycan milli geyimlərinin, xüsusilə milli baş örtüyümüz olan kəlağayının təbliği, onun tarixi və hazırlanma texnologiyası barədə ictimaiyyətin məlumatlandırılması, həmçinin gənc nəsildə milli-mənəvi dəyərlərə marağın artırılmasıdır.
Bununla da “Vətənimdir Azərbaycan!” layihəsi çərçivəsində nəzərdə tutulan tədbirlər uğurla yekunlaşıb.
15-06-2026, 13:40
Xankəndi Mədəniyyət
Mərkəzində ilk konsert
Xankəndi Mədəniyyət Mərkəzində əsaslı təmirdən sonra ilk dəfə tədbir keçirilib. İyunun 14-də Xankəndi Mədəniyyət Mərkəzində
Milli Qurtuluş Gününə həsr olunmuş konsert proqramı təşkil olunub.Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, Mədəniyyət Nazirliyinin təşkilatçılığı ilə baş tutan konsert proqramında Müslüm Maqomayev adına Azərbaycan Dövlət Akademik Filarmoniyasının Bakı Dövlət Kamera Orkestri həm yerli, həm də dünya bəstəkarlarının əsərlərini ifa edib. Xatırladaq ki, Prezident İlham Əliyev mayın 28-də Xankəndi şəhərində əsaslı şəkildə yenidən qurulmuş Mədəniyyət Mərkəzinin açılışında iştirak edib. Mərkəz əhalisi artan, o cümlədən tələbələrlə dolu Xankəndinin mədəni mühitinin canlandırılmasında mühüm rol oynayacaq, kütləvi tədbirlərin keçirilməsində əsas məkanlardan biri olacaq.
2-06-2026, 14:38
III Kəlağayı Festivalı
Sumqayıtda keçirildi
"Şəhərsalma və Memarlıq İli" çərçivəsində təşkil olunan III Kəlağayı Festivalı Sumqayıt şəhərinin Heydər Əliyev parkında keçirildi. Festival Sumqayıt Şəhər İcra Hakimiyyəti, Mirvarid Dilbazi Poeziya Məclisi İctimai Birliyi, Kəlağayı Ev Muzeyi və “İstedadları Tanıyaq və Tanıdaq” İctimai Birliyinin birgə təşkilatçılığı ilə reallaşdırıldı.
Tədbir Azərbaycan Respublikasının Dövlət Himninin səsləndirilməsi ilə başladı. Daha sonra Vətənimizin azadlığı, suverenliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edildi.
Mirvarid Dilbazi Poeziya Məclisi İB-nin sədri Güllü Eldar Tomarlı çıxış edərək bildirdi ki, artıq ənənəyə çevrilən Kəlağayı Festivalı milli-mənəvi dəyərlərimizin yaşadılması, təbliği və gələcək nəsillərə ötürülməsi baxımından mühüm əhəmiyyət daşıyır. O, kəlağayının Azərbaycan qadınının mənəvi dünyasını, zərifliyini və milli kimliyini özündə əks etdirən nadir irs nümunəsi olduğunu vurğuladı.
Sumqayıt Şəhər İcra Hakimiyyətinin humanitar məsələlər üzrə şöbə müdiri Fərman Kazımov çıxışında qeyd etdi ki, kəlağayı Azərbaycan xalqının qədim tarixini, adət-ənənələrini və milli dəyərlərini yaşadan mənəvi sərvətlərimizdən biridir. O bildirdi ki, bu sənət nümunəsinin qorunması və gələcək nəsillərə çatdırılması hər birimizin mənəvi borcudur. Fərman Kazımov həmçinin kəlağayı sənətinin təbliğinin milli-mədəni irsimizin beynəlxalq səviyyədə tanıdılmasında mühüm rol oynadığını vurğuladı.
Festivalda Sumqayıt Poeziya Evinin direktoru, şair İbrahim İlyaslı, “İstedadları Tanıyaq və Tanıdaq” İB-nin sədri Vüsalə Qələndərli, Prezident təqaüdçüsü, Əmək Qəhrəmanı Tərlan Musayeva, şairlər Cığatel İsaqızı, Lalə İsmayıl, Elmira Mahalqızı, Leyla Camal, eləcə də aşıqlar Anar Laçınlı, Rəvanə Lerikli və Avdı Musayev öz şeirləri, musiqi nömrələri və saz havaları ilə çıxış etdilər.
Şəhid anası Maisə Səbuhi çıxışında bildirib ki, belə tədbirlər milli ruhun, vətənpərvərlik hisslərinin və mədəni dəyərlərin yaşadılması baxımından xüsusi əhəmiyyət daşıyır. O qeyd edib ki, kəlağayı Azərbaycan qadınının səbrini, ləyaqətini və mənəvi gücünü simvolizə edən müqəddəs bir dəyərdir. Şəhid anası vurğulayıb ki, Vətən uğrunda canından keçmiş övladların xatirəsi hər zaman uca tutulmalı, onların qəhrəmanlığı gənc nəslə nümunə kimi çatdırılmalıdır. Çıxışının sonunda o, festival iştirakçılarını 1 İyun – Uşaqların Beynəlxalq Müdafiəsi Günü münasibətilə təbrik edərək, uşaqlara göstərilən diqqət və qayğıya görə təşkilatçılara təşəkkürünü bildirib.
1 İyun – Uşaqların Beynəlxalq Müdafiəsi Gününə təsadüf edən festivalda uşaqlar xüsusi diqqət mərkəzində oldular. Tədbir çərçivəsində onlara kitablar hədiyyə edildi, mütaliəyə marağın artırılması və milli-mənəvi dəyərlərə bağlı ruhda yetişmələri istiqamətində xoş arzular ifadə olundu.
Festival çərçivəsində kəlağayı sənətini əks etdirən nümunələr nümayiş olundu, qədim el sənətimizin zəngin ənənələrini yaşadan eksponatlar iştirakçıların böyük marağına səbəb oldu.
Mirvarid Dilbazi Poeziya Məclisi İB-nin təşəbbüsü ilə həyata keçirilən və artıq ənənəyə çevrilən Kəlağayı Festivalı Azərbaycan xalqının zəngin mədəni irsinin ayrılmaz hissəsi olan kəlağayı sənətinin qorunmasına, təbliğinə və gələcək nəsillərə ötürülməsinə xidmət edir. Festival bir daha göstərdi ki, milli dəyərlərimizin yaşadılması və gələcək nəsillərə çatdırılması istiqamətində həyata keçirilən bu cür layihələr böyük ictimai əhəmiyyət daşıyır.
2-06-2026, 08:42
Hacı Nərimanoğlu
QHT layihəsi olan
kitab Ukraynada yayılıb
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin donorluğu ilə “Zəngəzur” Cəmiyyətləri İctimai Birliyinin layihəsi əsasında iki dildə nəşr edilmiş “Oleq Babak, Azərbaycan səni unutmayacaq!” (“Олег Бабак, Азербайджан тебе не забуде!” kitabının Ukraynanın Dnepr şəhərində təqdimatı olub.
Kitab 1991-ci il aprelin 7-də Qubadlı rayonunun Yuxarı Cibikli kənd sakinlərini separatçı erməni silahlı dəstəsinin hücumundan qoruyarkən hərbi vəzifə borcunu yerinə yetirərək həlak olan ukraynalı gənc leytenant Oleq Yakovleviç Babakın ömür yoluna həsr edilib. Leytenant Oleq Babak hərbi vəzifəsini yerinə yetirərkən göstərdiyi cəsarət, qəhrəmanlıq və fədakarlığa görə ölümündən sonra SSRİ prezidentinin 17 sentyabr 1991-ci tarixli fərmanı ilə Sovet İttifaqı Qəhrəmanı adına layiq görülüb. İki ay sonraa SSRİ əbədi olaraq tarixin arxivinə göndərildiyindən Oleq Babak bu adı alan axırıncı şəxs olub.
Nəşrdə Oleq Babakın uşaqlıq, təhsil illəri, Orta Asiya, Baltik, Qafqaz respublikalarında sülhməramlı hərbi qüvvələrin tərkibində fəaliyyəti, son döyüşdə göstərdiyi qəhrəmanlıq, Qubadlıda onu görüb tanıyanların, döyüşçü dostlarının, müəllimlərinin xatirələri yer alıb.
Azərbaycan-Ukrayna münasibətləri, xüsusi olaraq bu kitab üçün yazılmış, Ukrayna mediasında Azərbaycan həqiqətlərinə həsr olunmuş məqalələr, diplomatik və diaspor nümayəndələrimizin Babak ailəsinə göstərdikləri ardıcıl diqqət və qayğınə əks etdirən yazılar, fotolar da kitaba daxil edilib. Kitabın ukrain dilinə tərçüməçisi Ukraynanın tanınmış yazıçı-publisisti, “Вогні Азербайджану” qəzetinin baş redaktoru Andrey Çurkanovdur.
Dnepr şəhərindəki Azərbaycan diaspor mərkəzində keçirilən tədbirdə çıxış edənlər bu kitabın Ukrayna-Azərbaycan dostluğuna layiqli töhfə olduğunu, nüsxələrinin birinci olaraq Oleq Babakın Poltava vilayətinin Viktoriya kəndində yaşayan ata, anasına, adını daşıyan kənd məktəbinə, Poltavadakı muzeyinə də hədiyyə edildiyini, Kiyevdəki kitab sərgisində nümayiş olunduğunu, rəsmilərə, QHT və KİV-ə də paylandığını bildiriblər.
25-05-2026, 20:09
DAHA BİR HESABAT GÜNÜ:
QƏRBİ AZƏRBAYCAN
İCMASINDA GÖRÜŞ
Uzun illər ədəbi yaradıcılığımda rahat yolla yürümədim, qələmə aldığım mövzulara ötəri yanaşmadım. Jurnalistikada bədii düşüncəylə özünüifadəyə meydan açan publisistikaya bağlı olmağımla yanaşı, zərurət kimi qarşıma çıxan tədqiqat axtarışlarına da yol aldım.
1988-ci ildə dədə-baba yurdumuz olan Qərbi Azərbaycandan son nəfərimizə qədər qovulan insanların didərginlik ağrı-acılarını, 1990-cı il Yanvar müsibətlərini göz yaşımla qələmə aldım. Və bu ağrılarla İrəvan ədəbi mühiti, mətbuatı, bu qədim yurdun görkəmli şəxsiyyətləri, tarixi abidələri ilə bağlı illərlə yorulmadan tədqiqatlar apardım. Şükürlər olsun ki, ciddi araşdırmalarımın nəticəsi uğurlu oldu. Xeyli sayda tədqiqat xarakterli publisistik məqalələrlə dövri mətbuatda çıxışlar etdim. İrəvanın ilk anadilli mətbuatı olan “Ləklək” (1914), “Bürhani-həqiqət” (1917) jurnallarını ərəb qrafikasından transliterasiya edərək, genişəhatəli Ön söz və lüğətlə nəşr etdirdim.
Burada mütləqdir xatırladım ki, XX əsr İrəvan ədəbi mühitinin tanınmış ziyalılarından olan “Molla Nəsrəddin” ədəbi məktəbinin nümayəndəsi babam Məmmədəli Nasirin həyat və yaradıcılıq yolunun ilk tədqiqatçısı olaraq onun simasında ədəbiyyatşünaslıq elmini daha bir ədəbi şəxsiyyətlə zənginləşdirdim. Elmi işimi uğurla müdafiə edərək filologiya üzrə fəlsəfə doktoru adını aldım.
Bundan sonra M.Nasirin 1912-ci ildən başlamış əsərlərinin böyük bir qismini 10 il ərzində klassik mətbuat səhifələrindən arayıb-axtarıb ərəb qrafikasından latın əlifbasına çevirərək “İrəvanın müqtədir ziyalıları” seriyasından “Seçilmiş əsərləri” ni nəşr etdirdim. “İdrak işığında” publisistik məqalələr toplusunda genişəhatəli mövzularımla yanaşı, İrəvanın ədəbi mühitini əks etdirən tədqiqat xarakterli yazılarım da yer aldı. Beləliklə, bədii, publisistik və elmi yaradıcılığımda İrəvanın ədəbi mühiti, mətbuatı müstəsna əhəmiyyət kəsb etdi...
22 May 2026-cı il tarixində Qərbi Azərbaycan İcmasında keçirilən “İrəvan ədəbi mühiti Şəfəq Nasirin yaradıcılığında” adlı tədbirdə bəndənizin uzun illər apardığı tədqiqatlar geniş ictimaiyyətin diqqətinə çatdırıldı. Tədbirin təşəbbüskarı və təşkilatçısı, Qərbi Azərbaycan İcması İdarə Heyətinin sədri, millət vəkili hörmətli Əziz müəllim Ələkbərliyə və zəhməti keçən bütün əməkdaşlara təşəkkürümü bildirirəm. Eləcə də ictimaiyyətə təqdim olunan kitablar, ümumən yaradıcılığım haqqında öz fikirlərini bölüşən elm, ədəbiyyat xadimlərinə, tədqiqatçı alimlərə - Auditorlar palatasının sədri prof. Vahid Novruzova, professorlar: Əsgər Zeynalov, Rüstəm Kamal, Abid Tahirli, t.ü.f.d. Cəbi Bəhramov və Nazim Mustafaya minnətdarlığım var...
Təbii ki, kitablarım üzərindən deyilən bütün fikirlər, xoş sözlər elmi, ədəbi yaradıcılığıma olan məsuliyyət hissimi bir qədər də artırdı.
Və sonda: nə qədər ki, qələm əlimdədir, milli, ictimai amalla yazıb-yaradacam. Bir daha tədbirin bütün iştirakçılarına, qələm dostlarıma təşəkkür edirəm.
Hörmətlə: Şəfəq Nasir.
24.05.26.
22-05-2026, 20:18
Yurd harayı
YADDAN ÇIXMIR QARAQIŞLAQ
"Orda uzaqda bir kənd var. Getməsək də, gəlməsək də,əlimiz çatmasa da, ünümüz yetməsə də, o kənd bizim kəndimizdir. QARAQIŞLAQ idi o kəndin adı. İndi xaçpərəst qonşularımız Hayanist adını veriblər ona. Fərqi yoxdur, necə istəyirlər elə çağırsınlar qoy. Amma... daşnak xislətli ermənilər bir şeyi unudurlar: o kənd təpədən-dırnağa müsəlman, türk kəndidir. Ta bineyi-qədimdən o ərazidə oğuzlar yaşayib-yaradıblar. O kəndin hər məhləsində, hər daşında-kəsəyində dədə-babalarımızın-- bizlərin ayaq izi, müqəddəs ruhların gözəgörünməz rüzgarı var..."
Bu sətirlər tanınmıs publisist-yazar, Jurnalistlər və Yazıçılar birliklərinin üzvü Mirzə YUSİFin yenicə işıq üzü görmüş "QARAQIŞLAQ: o kənd bizim kəndimizdir" adlı kitabındandır.
Müəllif özü həmin yurd yerində-Qərbi Azərbaycanın (Ermənistan) Zəngibasar (Masis) rayonunun Qaraqışlaq ( Hayanist) kəndində doğulmuş, burada boya-başa çatmışdır. Bakıda, ADU-nun jurnalistika fakültəsində təhsil aldıqdan sonra (1981) peşə fəaliyyətinə İrəvan (Yerevan) şəhərində, " Sovet Ermənistanı" qəzeti redaksiyasında başlamış, soydaşlarımızın 1988- çi il deportasiyasınadək orada çalışmışdır.
Əzizim vətən yaxsı,
Geyməyə kətan yaxşı.
Gəzməyə qərib ölkə,
Ölməyə vətən yaxşı.
Bax, beləcə kövrək bayatı ruhunda, bədii publisistik janrda qələmə alınmış kitabın hər səhifəsi maraqla oxunur, heç bir tarixi dəlil, heç bir qeyd və haşiyə diqqətdən kənarda qalmır. Müəllifin özünun yazdığı "Ön söz"dəki bu sətirləri oxuyanda duyğulanmaya bilmirsən: " ... Bu kitabı əldə edib, asta-asta vərəqləyəndə çox şeydən agah olacaqsınız: dədə-baba yurd yerlərimizin, Qərbi Azərbaycan torpaqlarının, unudulmaz İrəvan çuxurunun, doğma Zəngibasarın ətrini hiss edəcək, əzəmətli Ağrıdağ rüzgarlarına sevinclə qucaq açan Qaraqışlağı və qaraqışlaqlıları yaxından tanıyacaqsınız..."
Yurd-yuva həsrəti çəkənin ürəyi nazik olar, deyirlər. Mirzə Yusifin öz doğma kəndi, bu kəndin qoynundan çıxmış sayılıb- seçilən ziyalılar, məşhur iş adamları, habelə sıravi peşə sahibi olan həmyerliləri ilə bağlı xatirələri, məqalə və oçerkləri məhz bu mərhəm ovqatın məhsuludur.
Kitabdakı mətnləri müvafiq fotoların müşayiət etməsi nəşrə "kitab-albom" statusu verməklə onun bədii təsir gücünu daha da artırır. Bu mənada, kəndin "köhnə kişiləri"nə aid şəkillər, xüsusilə dəyərli və diqqətə layiqdir.
Atalar sozüdür: "Yurd itkisi elə bir itkidir ki, yerini heç nə ilə doldura bilməzsən." Müəllif də bu deyimdəki dərin məna və hikmətə, öz yurddaşları ilə sıx ünsiyyətdən aldığı təəssürata söykənərək yazır: " ...Pənah gətirdiyimiz, məskunlaşdığımız Azərbaycanda (bölgəsindən asılı olmayaraq) rahatca yaşaya bilərik. Amma həyatda elə kövrək, elə zərif duyğu və hisslər, elə istək və arzular var ki, insanı heç vaxt rahat buraxmır. Bu bir inkaredilməz həqiqətdir: insan harda olur-olsun, hansı şəraitdə yaşayır-yaşasın, daim dünyaya göz açıb boya-başa çatdığı məkana--Vətənə, doğma yuvasına can atır. Bizim qaraqışlaqlılar kimi! Öz sevimli kəndlərinə, Öz halal zəhmətləri bahasına tikdikləri evlərə qayıtmaq, öz dədə-babalarının məzarlarını ziyarət edib, şükranlıqla Allah-Təalaya səcdəyə durmaq onların ən gerçək xəyallarıdır."
"Günəş-MMC" tərəfindən rəngli formada araya-ərsəyə gətirilmiş kitab nəfis tərtibatı, peşəkar dizaynı ilə fərqlənir.
21-05-2026, 06:55
Şəhidlərimizin adını yaşatmağı
özünə borc bilir...
44 günlük şanlı Vətən Müharibəsindən və doğma torpaqlara böyük qayıdışımızdan sonra hər kəs yurduna bacardığı qədər daha çox öz töhfəsini verməyə can atır. Elman müəllim də bir rejissor, sənət adamı kimi Vətənə xidmət yolunda həmişə əlindən gələni edib. Elə bu gün də həmin işləri davam etdirir.
Elman Rəhman oğlu Ağamalıyev 1966-cı ildə Neftçala rayonunun Bankə qəsəbəsində böyük, sadə bir ailədə dünyaya gəlib. Uşaq yaşlarından incəsənətə həvəsi onu Mədəniyyət mərkəzindəki həvəskar rəqs ansamblına aparıb. Elə yeniyetmə yaşlarından da müxtəlif tədbirlərdə kiçik rollarla çıxış etməyə başlayıb. Sonra hərbi xidmətə yollanıb. Xidmətini layiqincə başa vurub qayıtdıqdan sonra doğma rayonda “Bahar” adlı mahnı və rəqs ansamblının bir neçə il solisti olub. Müxtəlif ölkələrdə qastrol səfərlərində iştirak edib. Daha sonra Kalininqrad şəhərində teatr məktəbinə daxil olub. Ancaq sovetlər birliyinin dağılması ilə baş verən proseslər onun təhsilini yarımçıq qoyub. Vətənə qayıdan Elman müəllim bundan sonra şəhid ailələri ilə görüşməyə və onlarla bağlı filmlər çəkməyə başlayıb.
Elman müəllim Aprel döyüşlərinin iştirakçısı və 2017-ci il dekabrın 13-də cəbhənin Füzuli bölgəsində erməni silahlı qüvvələrinin təxribatının qarşısını alarkən şəhidlik zirvəsinə ucalmış Fizuli Süleyman oğlu Salahov, Aprel şəhidləri Əlizaman Fərrux oğlu İslamov, Rəvan İsmayıl oğlu Nurayev, Qarabağ müharibəsi qazisi, tibb bacısı Rüxsarə Cumayevaya həsr edilmiş filmlər kimi 10-dan çox ekran işinə imza atıb.
Qeyd edək ki, Elman Ağamalıyevin özünün də doğmalarından, ailə şəcərəsindən dörd nəfər şəhidi var. Qardaşı oğlu şəhid Rövşən Baloğlan oğlu Ağamalıyev haqqında illər sonra film çəkib. Qeyd edək ki, Rövşən 1993-cü ildə 16 yaşında Ağdamın Mərzili kəndində şəhid olub.
Əmisi nəvəsi İbrahim Möhsün oğlu Mənəfov 2018-ci ildə Ermənistan silahlı birləşmələri tərəfindən atəşkəs rejiminin kobud şəkildə pozulması nəticəsində şəhadətə ucalıb. 23 yaşlı İbrahim Mənəfov hərbi xidmətə ali məktəbi bitirdikdən sonra yollanmışdı.
Bibisi nəvəsi Natiq İltifat oğlu Məmmədov İkinci Qarabağ müharibəsində Füzuli, Zəngilan, Laçın və Qubadlı istiqamətlərində rəşadətlə vuruşaraq şəhadətə ucalıb və 4 medalla təltif edilib.
Bir qohumu - Rafail Rüfət oğlu Fətullayev isə 2022-ci il sentyabrın 12-də antiterror əməliyyatı zamanı qəhrəmancasına şəhadətə ucalıb. Rəfail döyüşdə göstərdiyi şücaətə görə “Vətən uğrunda” medalı və III dərəcəli “Vətənə xidmətə görə” ordeni ilə tətif edilib.
Elman müəllim hazırda tanınmış bəstəkar Məzahir Səmədoğlunun rəhbərlik etdiyi studiada könüllü olaraq çalışır. Burada uşaqlar üçün “Şirin yuxular” verilişində operator olmaqla yanaşı, həm də o personajlardan birini - Tural adlı kuklanı səsləndirir. Onu da bildirək ki, Elman Ağamalıyev bir aktyor kimi “Ata ocağı”, “Nazlı taksi”, “Vaxtsız sevgi”, “Bal ayı”, “Satılmış ruhlar”, “Çarəsiz” kimi seriallarda, həmçinin Azərbaycan televiziyasının layihələri əsasında çəkilmiş bir neçə bədii filmdə epizodik rolları məharətlə oynayıb.
Elman müəllim deyir ki, işindən danışmağı yox, iş görməyi üstün tutub həmişə: “Bu günədək başqalarına özüm sual vermişəm. Amma indi baxıram ki, suallara cavab vermək nə qədər çətin imiş... Torpaqlarımızın işğaldan azad olunması ən böyük arzum idi. Sonra da gedib azad Şuşada torpağı öpmək... Şükür, Allah mənə onu da qismət elədi. Demək olar ki, azad edilmiş rayonlarımızın hamısında olmuşam. Bircə Kəlbəcər qalıb, inşallah, tezliklə onu da görmək nəsibim olar. Çox xoşbəxtəm ki, torpaqlarımız azad edildi, xalqımız Zəfər qazandı. Dünyanın ən gözəl bayrağı olan üçrəngli bayrağımız Şuşada, Qarabağda qürurla dalğalanır indi...”
Elman müəllim bir sənət adamı kimi çox kövrək insandı. Deyir ki, Prezidentimiz torpaqlarımızın azadlığı ilə bağlı xəbərləri deyəndə ağlamışam. Bəzən də sevincimdən durub rəqs etmişəm. Allah şəhidlərimizə rəhmət eləsin, qazilərimizə can sağlığı versin. Şəhidlərimizlə bağlı çəkiliş etməyi, nəsə bir iş görməyi özümə borc bilirəm: “Arzum budur ki, dünyanın heç yerində müharibə olmasın. Televiziyadan, radio dalğalarından heç vaxt şəhid xəbərini eşitməyək. Vətən, Qarabağ adına yeni layihələrimiz uğurlu olsun. Nə qədər ömrüm var, Allah şərəflə yaşamağı qismət eləsin. Hamı kimi, mənim də nəvələrim xoşbəxt olsunlar...”
Mina RƏŞİD
17-05-2026, 10:09
Avroviziyanın qalibi Bəlləndi
Avroviziyanın builki qalibi Bolqarıstan oldu
"Eurovision" mahnı müsabiqəsi 2026-nın qalibi müəyyənləşib.
Butov.az xəbər verir ki, final gecəsində keçirilən səsvermənin nəticələrinə əsasən, bu ilin qalibi Bolqarıstan seçilib.
Qalib ölkənin ifaçıları həm tamaşaçı, həm də münsif səslərinin yekununda ən yüksək - 516 xal toplayaraq yarışmanın kubokunu qazanıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!