17-05-2026, 10:09
Avroviziyanın qalibi Bəlləndi
Avroviziyanın builki qalibi Bolqarıstan oldu
"Eurovision" mahnı müsabiqəsi 2026-nın qalibi müəyyənləşib.
Butov.az xəbər verir ki, final gecəsində keçirilən səsvermənin nəticələrinə əsasən, bu ilin qalibi Bolqarıstan seçilib.
Qalib ölkənin ifaçıları həm tamaşaçı, həm də münsif səslərinin yekununda ən yüksək - 516 xal toplayaraq yarışmanın kubokunu qazanıb.
15-05-2026, 07:34
Bakıda ənənəvi III Kəlağayı
Festivalı keçiriləcək
22 may 2026-cı il tarixində saat 18:00-da Bakı şəhəri, Xətai rayonunda yerləşən Heydər Əliyev adına istirahət parkının amfiteatr səhnəsində III Kəlağayı Festivalı keçiriləcək. Festival Bakı Şəhəri Mədəniyyət Baş İdarəsi, Xətai Rayon İcra Hakimiyyəti, Mirvarid Dilbazi Poeziya Məclisi İctimai Birliyi və Kəlağayı ev muzeyinin birgə təşkilatçılığı ilə həyata keçirilir.
Mirvarid Dilbazi Poeziya Məclisi İctimai Birliyinin təşəbbüsü ilə artıq ənənə halını alan festival Azərbaycan xalq tətbiqi sənətinin incilərindən olan milli kəlağayı sənətinin təbliği, yaşadılması və gələcək nəsillərə ötürülməsi məqsədi daşıyır. Bu ilki festival ölkəmizdə elan olunmuş “Şəhərsalma və Memarlıq İli” çərçivəsində təşkil olunaraq milli irsimizin şəhər mədəniyyəti, memarlıq estetikası və şəhərsalma mühiti ilə vəhdəti mövzusuna xüsusi diqqət ayıracaq. Festival çərçivəsində Kəlağayı Muzeyinin qədim kəlağayıları, milli baş geyimləri, zəngin eksponatlarıı və Güllü Eldar Tomarlının dekorativ tətbiqi sənətinə aid əl işləri, rəssam Gülnarə Məmmədovanın rəsm əsərləri nümayiş etdiriləcək, həmçinin milli musiqi və folklor nümunələrindən ibarət konsert proqramı təqdim olunacaq. Tədbirdə eyni zamanda İsmayıllı və Basqal ustalarının istehsal etdiyi müxtəlif çeşidli kəlağayıların sərgisi və satışı təşkil ediləcək. Festival iştirakçıları milli sənət nümunələri ilə yaxından tanış olmaq imkanı əldə edəcəklər.
Festivalın əsas məqsədlərindən biri milli-mənəvi dəyərlərimizin qorunması ilə yanaşı, Azərbaycan mədəniyyətinin estetik zənginliyini və milli sənət nümunələrinin müasir dövrdə yaşadılmasının əhəmiyyətini ictimaiyyətə çatdırmaqdır.
Tədbirdə mədəniyyət nümayəndələri, ictimai xadimlər, sənət adamları, gənclər və media təmsilçilərinin iştirakı nəzərdə tutulur.
10-05-2026, 05:39
Filarmoniya bağında konsert
Azərbaycan Dövlət Xor Kapellası tərəfindən M.Maqomayev adına Azərbaycan Dövlət Akademik Filarmoniyasının 90, kollektivin isə 60 illik yubileyi çərçivəsində 9 May – Faşizm üzərində Qələbə Gününə həsr olunan konsert proqramı təqdim edilib.AZƏRTAC xəbər verir ki, Filarmoniya bağında açıq havada təşkil olunan proqram Xor Kapellasının ifasında Azərbaycan Respublikasının Dövlət Himninin səsləndirilməsi ilə başlayıb.
Sonra dahi bəstəkar Üzeyir Hacıbəylinin “Ey Vətən” əsəri ifa edilib.
Proqram çərçivəsində Azərbaycan xalq mahnıları - "Almanı atdım xarala”, “Həştərxana gedən gəmi”, “Səndən mənə yar olmaz” təqdim olunub.
Qeyd edək ki, yubiley ili münasibətilə keçirilən bu cür konsert proqramları milli musiqi irsinin təbliği, klassik və xalq musiqisinin geniş auditoriyaya çatdırılması, eləcə də gənc nəslin estetik zövqünün formalaşdırılması baxımından mühüm əhəmiyyət daşıyır.
8-05-2026, 11:32
Zamanın Səsində Yaşayan
Nahidə Həndəmova
Bəzən bir səs insanı xəyal aləmində onilliklər əvvələ, ən təmiz, ən parlaq xatirələr dünyasına aparır. Bu, sadəcə musiqi deyil, ruhun keçmişlə görüşüdür. Son zamanlar dinləyicini sehrləyən, onu 80-ci illərin o məlahətli havasına qaytaran bir səs var. Bu səs bizə unudulmaz Şövkət Ələkbərovanın nəfəsini, onun sənətə olan sonsuz sevgisini xatırladır. Söhbət Azərbaycan musiqi sahəsində mədəniyyəti və istedadı ilə seçilən nümayəndələrdən biri olan Nahidə Həndəmovadan gedir.
Nahidə Həndəmova Goranboy rayonunda dünyaya göz açmış, musiqi sahəsində erkən yaşlarından özünü təsdiq etmiş Azərbaycanın gənc və istedadlı xanəndələrindən biridir. Onun yaradıcılıq yolu Goranboyun mədəni mühitindən başlayaraq peşəkar musiqi səhnələrinə qədər uzanmışdır.
Sevimli sənətçimiz Nahidə xanım hələ orta məktəb illərindən ictimai fəallığı və musiqi istedadı ilə seçilmişdir. Məktəblərarası tədbirlərdə iştirak edərək yüksək nəticələr qazanmış, hələ kiçik yaşlarında respublika səviyyəli uşaq müsabiqələrində uğurlu çıxışları ilə diqqəti cəlb etmişdir. Musiqiyə olan sonsuz marağı onu Azərbaycan Milli Konservatoriyasına gətirmişdir. O, burada peşəkar muğam və xalq musiqisi dərsləri alaraq öz ifaçılıq məharətini daha da təkmilləşdirmişdir.
Tələbəlik illəri Nahidə Həndəmova üçün olduqca məhsuldar keçmişdir. O, Azərbaycanın ən nüfuzlu musiqi yarışmalarından sayılan Cabbar Qaryağdıoğlu adına müsabiqənin və milli musiqi irsimizin təbliği baxımından müstəsna əhəmiyyət kəsb edən "Xarıbülbül" festivalının laureatı adını qazanmışdır.
Nahidə xanımı dinləyərkən göz önünə istər-istəməz Azərbaycan musiqisinin korifeyi Şövkət xanım Ələkbərova gəlir. Bu bənzərlik təsadüfi deyil. Üzeyir Hacıbəyov adına Konservatoriyanın məzunu olan Nahidə Həndəmova məhz Şövkət Ələkbərovanın sinfində sənətin sirlərinə yiyələnib. O, ustadından sadəcə ifa texnikasını deyil, həm də səhnə mədəniyyətini, tamaşaçıya olan hörməti və sənətin ali məsuliyyətini miras alıb.
Onun oxuduğu muğamlar, şikəstələr və təsniflər sanki ötən əsrin klassik sənət incilərinin müasir dövrdəki əks-sədasıdır. O, Sara Qədimova, Nəzakət Məmmədova, Qəndab Quliyeva, Tükəzban İsmayılova kimi nəhənglərin yolunu davam etdirərək adını Mələkxanım Əyyubova, Səkinə İsmayılova və Könül Xasıyeva kimi sənət fədailərinin sırasına yazdırmağı bacarıb.
O, əsasən muğam, təsnif və xalq mahnılarının mahir ifaçısı kimi tanınır. Səs tembrinin zənginliyi və milli musiqi ənənələrinə sadiqliyi onu öz həmyaşıdları arasında fərqləndirən əsas amillərdəndir. Deyirlər ki, istedad Tanrıdan gələn paydırsa, əxlaq və etika ailədən gələn tərbiyədir. Nahidə Həndəmovanın şəxsiyyətində bu iki cəhət mükəmməl şəkildə birləşir. Onun səhnə davranışı, təmkinli duruşu və tamaşaçı ilə qurduğu o görünməz, amma səmimi bağ müasir estradamızda nadir rast gəlinən hallardandır.
Nahidə xanım "ucuz populyarlıq" ardınca qaçmayan, sənətin ağırlığını çiyinlərində daşıyan bir ifaçıdır. Tamaşaçı onu sadəcə səsi ilə deyil, həm də ideal səhnə duruşu, xanımlığı və ağır təbiəti ilə xarakterizə edir.
Musiqi tənqidçiləri və sənətsevərlər bu fikirdədirlər ki, Nahidə Həndəmova sənəti yaşadacaq və sənətdə qalacaq səs sahiblərindəndir. Onun ifaları zamanın sınağından keçərək on illər sonra da eyni sevgi ilə dinləniləcək. Çünki o, kökü dərinlərə bağlı olan, lakin budaqları gələcəyə uzanan möhtəşəm çinar kimidir.
Nahidə xanımın səsi bizə təkcə keçmişi xatırlatmır, həm də milli musiqimizin gələcəyinin əmin əllərdə olduğuna ümid verir. Bu məlahətli səs hələ uzun illər qəlbləri riqqətə gətirəcək, Azərbaycan muğamının və mahnılarının saflığını qoruyub saxlayacaq.
Hüseyn İsaoğlu,
yazıçı-publisist,
AYB və AJB üzvü
30-04-2026, 08:04
Araz üstü şəhərim,
Naxçıvanım...
Necə də doğmadır, necə də əziz.. Hər qarış, hər zərrə torpağı, bir damcı suyu, havası...Əsrlərdir adını qoruyan, əzəmətli diyarım...
Qurban olum torpağına, daşına,
Axar çaylarına, buz bulağına,
Badamlı, Sirabı, o saf suyuna.
Naxçıvan əzəldən belə diyardır,
Adını qorumuş bir laləzardır.
Qəhrəmanlıq tarixi, igid oğulları, qələmiylə şah-əsər yaradan şairləri, nəğməli bəstəkarları ilə iz qoyan Naxçıvan... Havanla solqulanan, suyunla, nemətinlə qidalanan, torpağında doğulub məhz elə torpağında ilk addımını atan neçə -neçə igid oğullar yetişdirdin, şairlər, bəstəkarlar yetişdirdin ki, qəlblərində sənə olan sevgilərini şairlərin misralara, bəstəkarların notlara tökdü... Doğma diyara neçə-neçə müdrik ifadələr işlənmiş, neçə-neçə əsərlər, bəstələr həsr olunmuş ki, sanki, şairlər, bəstəkarlar öz qəlblərində alışıb-yanan Naxçıvan sevgisini əks etdirmişlər. O sevginin heç də sönməyəcək bir atəş olduğunu, xatırlatmış, göstərmişlər!
Əcəmi-sənət çələngi,
Mirzə Cəlil söz nəhəngi,
Bəhruz-rənglərin ahəndi,
Hüseyn Cavid-söz çələngim,
Bəxş eyləyən vətəninə,
Heydər Babəktək öndəri
Naxçıvanım, Naxçıvanım!
Bir əsrin simfoniyası...Enişli-yoxuşlu hadisələr, tarixi anlar, tarixə iz qoyan qəhrəman oğulların və onların qəhrəmanlıq salnamələri, sanki, bir simfoniyanı , ahəngdar olaraq notların düzülüşünü xatırladır, və çətinliklərə baxmayaraq bir əsrdir öz varlığını laiqincə qoruyan Naxçıvan...igidlər, onlar ki, torpaq uğruna candan keçən oğullar!
Baxaq Haçadağa necədə əzəmətli duruşu var, Nuhçıxanın simvolu olması bir təsadüf deyil, əsrlərə, tarixə şahid “Haçadağ”.. Sarsılmaz qala, sarsılmaz Naxçıvanın sinvolu “Əlincə”..Hər qayasında, hər zərrəsində bir tarix yatan diyar..
Səndə tarixlərin çox nişanı var,
Hər daşın köksündə ox nişanı var.
Bəli, bu gün müasir Naxçıvanda belə tarix silinməmiş, yaşamaqdadır. Bu gün də, tarix öz izlərini qoruyur...Qədimdən də qədim şəhərimiz, tarix qoxan torpaq, özündə neçə-neçə hadisələri əks etdirib baxdıqda xəyallarda canlandıran, bizlərə də o tarixiliyi yaşadan abidələr... "Gəmiqaya", "Oğlan qala, qız qala", "Əlincə", "Fərhad evi", "Gülüstan", "Qarabağlar türbəsi" “Möminə Xatun” və.s
Bu gün artıq Naxçıvan qalib dövlətin bir parçasıdır, azaddır, hürdür! Əsrlər də keçsə, illər də keçsə, yenə də xalqı yumruqtək birdir! Bu gün Nuhçıxan, öz sözünü demiş bir Muxtar Respublikadır. Bir əsrdir Muxtariyyətini qoruyan diyar, Naxçıvan...Bu gün, əsrlərin, tarixin şahidi “Haçadağ”, “Əlincə”, bu torpaqlar, Nuhçıxan bir əsrin bitişinə, yeni-yeni əsrlərin gəlişinə şahidlik edir!
Qovmusan başından dumanı, çəni,
Toylu, büsatlıdı qoynunda hər yan.
Qəlbimdən süzülən bu şən nəğməni,
Sənə bəxş edirəm, doğma Naxçıvan!
Araz üstü şəhərim, günəşli diyarım! Necəki günəş Arazın üzərindən doğur və parlayır, səndə yaranışınla bir günəş kimi doğdun və parlayırsan, nəinki bir əsr, sən daim yaşa, var ol, hür ol, parla ey Qüdrətli Naxçıvan!
Nuray Qurbanlı (Nuray Qurban)
Bakı Dövlət Universitetinin Jurnalistika fakültəsinin IV kurs tələbəsi
25-04-2026, 18:25
HAFİZƏLƏRDƏ
YAŞAYAN İNSAN
Mərhum radio jurnalisti Heydər Zeynaloğlunun 80 illik yubileyinə
Radioda vaxtilə sayılıb, seçilən, səsi ilə sevilən, qələmi ilə özünə rəğbət, əməlləri ilə hörmət, təmizliyi, saflığı, dürüstlüyü ilə dəyər qazanan, baş redaktorumuz Heydər müəllim. Onu bu gün xatırlatmağımın, yada salmağımın, haqqında danışmağımın özəl səbəbi var...
Əməkdar mədəniyyət işçisi (2001), "Qızıl Qələm" mükafatı laureatı Heydər Zeynaloğlunun aprelin 6-da 80 yaşı tamam oldu. Aprelin 26-da isə vəfatının ildönümüdür. Eyni ayda doğulan və dünyasını dəyişən, bu işıqlı cahanda 69 il, 20 gün ömür sürən, bir yaz günü əzizlərinə vida edən jurnalistin ölüm xəbərini (həmkarım, redaksiyamızın ən gənc əməkdaşı Zaur Rzayevin zəngindən bildim) qəfil eşidən an həyəcan və ürəkağrısıyla Facebook-da (2015) paylaşım edib, bu acı olayı sosial şəbəkədə elan edəndə, haqqında ancaq xoş sözlər deyildi. Ölkənin tanınmış media mənsubları, bir kollektivdə çiyin-çiyinə işləmiş həmkarları bu itkidən təəssüfləndiyini dilə gətirib, onunla bağlı gözəl rəylər yazmışdılar. Əslində təəccüblü də deyildi.
Heydər müəllimlə bir yerdə çalışdığımız illərdə, onun necə bir insan olduğunu hamımız yaxşı bilirdik. Radionun "Xəbərlər" baş redaksiyasında rəhbər olduğu dövrdə onun bütün xarakterik xüsusiyyətləri, fərdi yaradıcılıq potensialı, idarəçilik ustalığı, həmkarları ilə yaxın ünsiyyət qurmaq bacarığı gözümüzün önündəydi. Bütün şəxsi keyfiyyətləri ilə sözün əsl mənasında örnək olan bir insan idi. Şəxsən mənim üçün həm də dərdimi deyəcək, atam qədər güvənəcək yaxın dost, böyük qardaşıydı. Redaksiyamızda İttifaq müəllim (Əməkdar jurnalist İttifaq Mirzəbəyli) ona "baba" deyib, müraciət edərdi. Aralarında elə böyük bir yaş fərqi olmasa da, Heydər müəllim öz şəxsi keyfiyyətləri ilə həmyaşıdları arasında bu böyüklüyə ucalmışdı. Müdrik davranışı, ağayana hərəkətləri, mənalı danışıqları ilə hər kəsin dərin rəğbətini qazanmışdı...
Hər gün sübh tezdən işə gələr, öz növbəsinə düşən günlərdə "Qəzetlərdən özəklər"i efirə hazırlayar, xəbərlərin hər saatdakı buraxılışlarına nəzarət edər, əməkdaşlara gündəlik tapşırıqlarını verər, hazır süjetlərə diqqətlə qulaq asar, sabahkı efirin mövzularını araşdırar, "Səhər" informasiya proqramının ssenari tərtibini gözdən keçirər, radioya dəvət edilən qonaqlarla həmsöhbət olar, öz işçilərinin dərd-sərini dinləyər, bəzən də macal tapanda hərdən otağına çəkilib, düşüncələri ilə baş-başa qalar, yazıçı təxəyyülündəki qəhrəmanları ilə danışar, bədii mövzuda cızma-qaralarını edər, bir sözlə, günbatana kimi öz iş yerini tərk etməzdi.
Yeganə baş redaktor idi ki, xidməti və şəxsi maşını olmazdı. Baxmayaraq ki, ən məsul bir redaksiyanın rəhbəri idi və o zamanlar Azərbaycan radiosu ölkədə tək dalğaydı, yeganə kütləvi audio informasiya vasitəsiydi. Heydər Zeynaloğlu rəhbərliyə işin gərginliyini xatırladıb, sürücü ilə təmin oluna bilərdi. Lakin, bizim Heydər müəllim tam başqa bir dünyanın sakini idi...Kimdənsə qəti təmənna ummaz, heç kəsin əlinə baxmazdı. Könlü, nəfisi tox olduğundan, kimdənsə nəsə umacaq və alacaq bir ixtiyar sahibi deyildi. Heç kəsin yanında gözü kölgəli olmayan bu rəhbər işçi kimi xatırlanır. Radiomuzda ətrafdakılara örnək bir həyat yaşadı. Özünün maddi sıxıtıları, ailəsində böyüyən uç məktəbli uşağın qayğıları belə onu əqidəsindən döndərə bilmədi. Başqaları kimi vəzifə səlahiyyətlərindən istifadə edib, özünə gözəl gün-güzəran qura bilərdi. İstəsəydi yaxşı dəbdəbəli yaşayış yaradardı. Lakin, Heydər müəllim nəfsinə hakim olub, halal zəhməti, gözünün nuru ilə qazandığı pulla özünü xoşbəxt sayırdı.
O tək jurnalist deyildi, arada bir qələmindən iri həcmli əsərlər də yaranırdı. "Qocalar tək olmayanda" adlı bir kitabı da işıq üzü görmüşdü. Günlərin birində ona sual verdim ki, "Heydər müəllim, niyə yazıçı olmadınız, ancaq jurnalistikada qaldınız?". Bir anlıq duruxdu və dedi. "Onda gərək ailəmi unudam, tərki dünya olam, ancaq xəyallar aləmində çabalayam. Bu mənə ağır gəlir, mən hər gün evdəki körpələrimin necə böyüdüyünü, nələr hiss etdiyini görməliyəm, onları heç bir şeyə dəyişmərəm. Mənim dünyam onlardır...".
Heydər Zeynaloğlunun ətrafda gördüklərinə yanaşması tam fərqliydi. Onun təbiəti poetik lövhələrlə təsviri, İlahinin nəqş etdiyi varidatı bədii formada gözəl təcəssüm etdirmək məharəti bədii duyumu ilə bağlı idi. İttifaq Mirzəbəylinin sözləri ilə desək, "Qəbələnin yazı, payızı haqqında, bənövşədən və digər yaz çiçəklərindən əvvəl, uşaq köynəyinin düymələrindən də kiçik olan, üstü ağ xətli xırda göy çiçəkləri, cincilim kimi yerlə sürünən həmin bitkinin çiçəklərinin gün görən kimi açılıb, günəş buludun arxasında qalan kimi bükülməsini, meşənin sıx yerlərində, hündür ağacların altında olan zoğal ağacının öz meyvələrini oktyabrın axırınadək “kimin üçünsə” qoruyub saxladığını Heydər Zeynaloğlu kimi təsvir eləmək çox çətindir…". Soruşacaqsınız ki, niyə bəs Qəbələ? Çünki uşaq vaxtı bir neçə il o torpaqda yaşamışdı. Orda gördükləri nə vardısa, hafizəsinə hopmuşdu. Ağaclarını, şırıltılı və dəlisov çaylarını, quşlarını, kol-kosunu, yağışını, palçıqlı yollarını belə, vəsfində sanki, nağllar aləmin seyrangahına düşürdün. Mənim doğulduğum, böyüdüyüm, hər halına bələd olduğum bu torpağın hər qarışında bir gözəllik var imiş. Necə olub ki, mən bunlardan xəbərsiz olmuşammış? Bəli, sonralar anladım ki, Heydər müəllimin dilindəki qeyri-adi söz boyaları ilə təsvirini görəndə baxın, dərk elədim ki, yazıçı elə bu demək imiş. Duyğularını dilə gətirib yazan, sözdən naxış çəkən, əsər yaradan insan məhz mənim kimi minlərlə fərddən fərqlənən biri imiş…
Heydər müəllim qayğılı bir rəhbər idi. Həm ailəsinin, həm də keçid dövrünün çətinliklərində, redaksiyada çalışan onlarla insanın problemlərini çözməyə cəhd edər, ən azından dinləməyi bacarardı. Qonorar bölgüsündə şəffaflığı təmin etməyə çalışardı. Ondan aslı olmayan səbəblərdən pulumuz kəsiləndə, günahı olmadığı halda, ən böyük vicdan əzabını da özü çəkərdi...
Mən və həmkarım Kəmalə Mikayılzadə, dövrünün tanınmış və nüfuzlu qadın radio jurnalisti Zərxanım Əhmədlinin istəyi və güvəni ilə 1993-cü ildə Heydər müəllimin rəhbərlik etdiyi "Xəbərlər" redaksiyasında işə başladıq. Zərxanım müəllimə, İttifaq müəllim ona isə Zəri xanım deyərdi, bizim hər ikimizə doğma münasibət bəsləyirdi. Heydər müəllimə də bizi yaxından tanıdırdı. Üstümüzdə hər birinin haqqı var. Onlar, bizim tezliklə "Səhər" informasiya proqramında aparıcı olmağımız üçün var gücüylə çalışır, ümumiyyətlə gənclərə kömək etmək üçün əllərindən gələni əsirgəmirdilər. Gənc əməkdaşları peşəkar kimi yetişdirməyə çalışırdılar. Sözün həqiqi mənasında müəllim kimi çıxış edirdilər. Redaksiyada mötəbər insanlar çalışırdı. Yasin Qaraməmmədli, İttifaq Mirzəbəyli, Qulu Kəngərli, Reyhan Rüstəmli, Akif Cabbarlı, Asəf Məhərrəmov və s. onların ardınca gələn yeni nəsil... Beləcə sənət yollarında, efir məkanında Heydər Zeynaloğlunun rəhbərlik etdiyi bir komanda ilə addımlamağa başladıq...
Hər zaman fikirləşirəm ki, Allahdan bəxtim gətirib, qarşıma belə əqidəsi saf, vicdanı təmiz, ləyaqətli insanlar çıxıb. Məhz onların sayəsində, yaxşı dostların əhatəsində mən də jurnalistikada boy atmışam. Heydər müəllim kimi ustadlardan örnək götürərək onların yolu ilə addımlamağa başlamışam.
Elə sözləri var ki, bugünkü gündə, bəlkə də hər gün onları təkrarlayırıq. Süjetlərimizi qısaldanda inciyərdik, “ay Anaş, Quran ayəsi deyil ki”, deyib dodaqaltı gülümsəyərdi. Bütün xanımlara da bu cür müraciət edərdi… Bu gün Heydər Zeynaloğlu ölməyib, o yaddaşlarda yaşayır. Redaksiyamızda hər gün adı çəkilir, duzlu-məzəli söhbətləri, mənalı sözləri yada düşür, xoş ehtiramla xatırlanır. Bundan sonra da dərin hörmətlə anılacaq. Nə qədər ki, onunla birlikdə çalışmış, onu yaxından tanıyan insanlar sağdır, nə qədər ki, onlar yaşayır, Heydər müəllim də var olacaq, xoş təbəssümlə yada düşəcək….
Sizin o cavan ikən ağarmış saçlarınız, işıqlı çöhrəniz, asta-asta yerişiniz, eynəyin üstündən qaşlarınızı çatıb, təəccüblə baxmağınız gözümüzün yaddaşında əbədiləşib, əziz Heydər müəllim. Ruhunuz şad olsun Ustad! Allah sizə rəhmət eləsin, nur içində yatın!
Şəlalə Məhyəddinqızı
Filologiya üzrə fəlsəfə doktoru
25-04-2026, 13:05
Yusif Hüseynov
olduğu kimi
Dost sözü
Bəşər övladı “qanadlı sözləri əsir etdikdən” - yazının kəşfindən bu yana, insan əlinə qələm alıb yazmağa başladığı gündən ta bu günə kimi söz adamı müxtəlif yazı nümunələrinin ünvanına və qəhrəmanına çevrilərək yazının əli və dili ilə şərəflənərək ucalmış, tanınmış və yazının yaddaşında əbədilik qazanmışdır. Lakin az qisim insan var ki, yazılar onların deyil, onların həyatı yazıların bəzəyidir.
Belə insanlar haqqında nə qədər çılğın istək, coşqun həvəs, zəngin təxəyyül və yanar ürəklə yazılsa da, yenə də onların şəxsiyyəti dolğun, olduğu kimi yazılarda özünü tapmır. Sadəcə ona görə ki, o insanlar sözdən ucada dururlar. Və onlar hamıdan varlıdırlar. Var-dövlət baxımımdan demirəm, mənəvi dünyaları ilə çoxundan çox yüksəkdə dayanırlar. Bu isə minnətsiz, təmənnasız, ilahi bir örnəkdir.
O, layiqli Vətən övladıdır.
Nümunəvi ailə başçısı, könül dostudur.
Həyatda nə qazanıbsa, nə əldə edibsə, hamısını biliyi, alnının təri, halal zəhməti ilə qazanıb.
Əsl xalq adamıdır. Biliyi, bacarığı və sevgisi ilə həmişə xalqın yanında yer alıb, dövlətin və dövlətçiliyimizin əsgəri olub, elə bu gün də ön sırada addımlayır.
Şərəflə yaşayıb, ömrünün 70-ci baharını da şərəfləndirib – Yusif Həsən oğlu Hüseynov. 1956-cı ilin mart ayının 10-da Şəki şəhərində anadan olub. Orta təhsilini də doğulduğu şəhərdəki 2 saylı orta məktəbdə alıb. 1978-ci ildə indiki BDU-nun jurnalistika fakültəsini bitirib, ömür yollarında ürəyi və qələmi ilə yoldaşlıq edib, indi də jurnalistikanın sehri ilə baş-başa, onun cazibəsi içindədir. Təhsilini başa vurduqdan sonra respublikanın nüfuzlu mətbuat orqanları ilə əməkdaşlıq etmiş Yusifin qələmindən çıxan bir çox yazıların sədası bu gün də yadımdadır: “Tanrının bizə bəxş etdiyi adam”, “Son görüşün təəssüratları”, “Şəkidən gələn səslər” və adını çəkmədiyim yazıları bu qəbildəndir. Əslən şəkili olub Moskvanın Sakolniki rayonu İK-nın sədri işləmiş P.A. Babayevin (İndi Moskva karamel fabriklərindən biri azərbaycanlı Hakim Babayevin adını daşıyır) fəaliyyəti istiqamətindəki araşdırma və axtarışlarının nəticəsi olaraq Şəkidə P. Babayevin adını daşıyan mədəniyyət və istirahət parkının salınması, büstünün ucaldılması hələ də yaşlı şəkililərin yaddaşında Yusif Hüseynovun “könül işi” kimi daşlaşıb.
Azərbaycan KP MK-nın nəzdində fəaliyyət göstərən Partiya Tarixi İnstitutunda, sonra ölkənin ali icra hakimiyyəti orqanında – Azərbaycan Respublikası Prezidentinin Administrasiyasında və Azərbaycanda ilk ictimai yayım institutunda – İctimai Teleradio Şirkətindəki fəaliyyəti də onun bilik və bacarığının həyata vəsiqə qazandığı ünvanları və fəaliyyət dövrlərini çevrələyir. Amma qarşınızdakı bu kiçik yazımızla Yusif Hüseynovun nə jurnalist kimi peşə fəaliyyətini, nə də tutduğu vəzifələrdəki iş keyfiyyətlərini təhlil etmək, onu gündəmə gətirmək kimi bir məqsəd qarşıya qoymamış, bu istəkdən gələn sətirlər də elə bir missiyanı öz üzərinə götürməyib. Bir dünyagörmüşdən soruşurlar:
–Siz yaş yetirmisiniz, üzlər görmüsünüz, çox adam tanıyırsınız. Bu filankəs necə adamdır, bəlkə, siz deyəsiz?
Müdrikin cavabı qısa və aydın olmuş:
–Mən onunla yoldaşlıq etməmişəm.
Məncə də əlavə şərhə ehtiyac yoxdur.
Sanki Yusif bu dünyaya yaxşılıqlar etmək üçün gəlib. Daimi ünvanı da belədir: xeyirxahlıqlar küçəsi, ürək- yaxşılıqlar məskəni. Təmənnasızlar xiyabanı.
Sözün geniş anlamında Yusif Hüseynovun əlindən heç bir pislik gəlməyib desəm, yanılmaram. Çünki o, yaxşılıq etməyi özünün mənəvi, əxlaqi borcu hesab edir. Ona görə də onun “mən”i daxilindəki Yusiflə həyatdakı Yusifi bərabərləşdirir və eyniləşdirir. Bu mənada belə keyfiyyətləri hər adamda görmək və ya sezmək bu gün çətindir. Cəmiyyətdə tutduğu mövqe, daşıdığı vəzifələr, xarakterindəki mərdanəlik və alicənablıq onu öz-özündən fərqlənməsinə gətirib çıxarmayıb. Necə idisə, elə də qalmağı bacarıb, heç nə onu dəyişə bilməyib. Necə deyərlər, bir ömür boyu olduğu kimi görünüb, həyatda da göründüyü kimi olub. Elə bu keyfiyyəti də onu başqalarından fərqləndirir.
Yusifdə hər adamda olmayan, çoxlarının həsəd apara biləcəyi bir alicənablıq da var. Əgər Yusif Hüseynovu əxlaqi baxımdan, humanist mövqedən qiymətləndirmək mümkün olsaydı, tanıdığım və bir əlin barmaqları ilə sayıla biləcək yaxşıların və təmənnasızların ön sırasında onun adını yazardım. Kiməsə qarşı həsəd aparmaq, paxıllıq hissi kimi emosiyalar onda anadangəlmə olmayıb. Qan və gen yaddaşına, soykökünə sadiqliyini həmişə qoruyub saxlaya bilib. Nəfsini, emosiya və hisslərini idarə etmək gücünü də özündə tapıb. Heç vaxt onları nəyinsə xatirinə bada verməyib. Bu da onun böyüklüyüdür. Ucaldığı o böyüklük zirvəsində bu gün də olduğu kimi görünür. Adam ona yaxşı mənada həsəd aparmaya bilmir.
Yusif Hüseynov ətrafındakıların diqqətini özünə cəlb etmək üçün özünü hər kəsdən və hər şeydən təcrid edən, özünə qapanan, qınına çəkilmiş və ya maskalanmış fərd deyil. Sözün həqiqi mənasında, o, şəxsiyyətdir. Öz “mən”ini təsdiqləyən şəxsiyyət.
Şəxsiyyətin sosial parametrləri var, şəxsiyyətin prinsipləri var; həyati prinsiplər, dünyagörüşü, həyata və dünyaya, gerçəkliyə və təxəyyülə münasibət modeli onda elə formalaşıb ki, onu artıq paradiqma kimi, nümunə kimi göstərməyə imkan verir. Əgər humanizm prinsipi şəxsiyyətin əsasında dayanırsa, onun həyat tərzini, fəaliyyətini tənzimləməklə müşayiət edirsə, deməli, o adam humanistdir. Yusif Hüseynovda bu özünü daha qabarıq göstərir. Cəmiyyət tərəfindən qəbul olunmuş əxlaqi normalar onun həyat norması, fəaliyyət prinsipidir.
Yusif dosta və dostluğa münasibətdə olduğu kimi, dünyaya və zamana münasibətdə də ardıcıl və safdır, ülvidir. Ülviyyət də onda fəaliyyət meyarına, həyat tərzinə çevrilib. Mən heç bir halda onun səsinin ucaldığını eşitmədim, həmişə səbr və təmkinini qoruyub, haqqın yanında dayanan gördüm. Hərdən düşünürsən ki, o, bunu necə bacarır? Sonra da öz-özünə pıçıldayırsan ki, yəqin əsəbləri poladdandır...
Bu gün Yusif Hüseynovun cild-cild kitabları çap olunmasa da, onun bir həyat tərzi nümunəsi var, bir insanlıq obrazı var, şəxsiyyət nümunəsi var. Elə bir nümunə ki, o həyatının böyük hissəsini onu əhatə edən mühitə, mühitin yetirmələri olan insanlara və insanlığa həsr etmişdir.
Ümumiyyətlə, Yusif Hüseynovun mənsub olduğu, təmsil etdiyi nəsil Şəkidə şirin nəsil kimi ad çıxarıb, elə də tanınır. Yusif də, şəkililər demiş, şirin narın köküdür. Bu şirinlik onun qanında və canında, sözündə və özündədir.
70 yaşını çevrələyən Yusif Hüseynov indi müdriklik məqamında və müdriklik ovqatındadır. Dostlara da ona baxıb sevinmək və öyünmək qalır. 70-in mübarək! Müdriklik məqamın və müdriklik ovqatın həmişə səninlə olsun, əziz insan!
Ramiz Orsər
şair-publisist
22-04-2026, 14:38
Onu sevgi və
ehtiramla anırıq
Bu gün tanınmış aktyor və rejissor, bədii qiraət ustası, pedaqoq, Əməkdar artist Həsən Əblucun anadan olmasının 84-cü ildönümüdür.
H.Əbluc Tofiq Kazımov kimi istedadlı rejissorun Azərbaycan Dövlət Akademik Milli Dram Teatrında hazırladığı tamaşalarda ikinci rejissor işləyib, həm də onun kursunda təhsilini davam etdirib. 3-cü kursda oxuyanda Akademik Dram Teatrına işə dəvət olunub. Ona səhnə danışığından Müxlis Cənizadə dərs deyib. O, Həsənin gözəl danışığına, sənətinə, diksiyasına, savadına görə onu assistent götürüb. Həsən Əbluc 30 il Azərbaycan Dövlət Mədəniyyət və İncəsənət Universitetində bir pedaqoq kimi gənclərə sənətin sirlərini öyrədib.
Vaxtilə Moskvada Ümumittifaq Dövlət Kinematoqrafiya İnstitutunda Azərbaycan qrupu yaradılmışdı. Məşhur aktyor, rejissor Yevgeni Motfeyev həmin qrupun rəhbəri idi. Ayda bir həftə səhnə danışığından dərs demək üçün Həsən Əblucu Moskvaya dəvət edirdilər.
Həsən Əbluc gözəl, ecazkar, cəlbedici, inandırıcı səsi ilə qəlbi sözə bağlı olanların sevimlisinə çevrilmişdi. O, radio tamaşalarında da saysız-hesabsız baş rollarda oynamışdır. Dublyaj filmlərində bütün rejissorlar baş rolları səsləndirməyi H.Əbluca həvalə edirdilər. Çünki o, dublyajda da öz möhürünü vurmuşdu.
Həm müəllim, həm rejissor, həm də aktyor olan Həsən Əbluc, eyni zamanda, biri-birindən maraqlı hekayələr, dram əsərləri yazıb.
O, cəmi 52 il yaşadı. Ruhu şad olsun!
20-04-2026, 07:49
Azərbaycan Astanada
Astanada II “NOMAD AWARDS” beynəlxalq müsabiqə-festivalının qala-konserti keçirilir.
Qala-konsert festivalın əsas tədbiridir və MDB ölkələri və uzaq xaricdən yaradıcı qrupları səhnədə bir araya gətirir.
Konsert proqramında dünya xalqlarının unikallığını, adət-ənənələrini və mədəni irsini əks etdirən canlı xoreoqrafik əsərlər təqdim olunur. Xalq rəqslərindən ibarət qala-konsert rəqs mədəniyyətinin zənginliyini və müxtəlifliyini nümayiş etdirir, gənc ifaçılar arasında mədəni qarşılıqlı əlaqənin, yaradıcı mübadilənin və dostluğun simvoludur.
Festivalın qaliblərini beş ölkənin nümayəndələrindən ibarət beynəlxalq münsiflər heyəti müəyyən edir. Fikrət Əmirov adına Dövlət Mahnı və Rəqs Ansamblının xoreoqrafı, Əməkdar artist Ceyhun Qubadov münsiflər heyətində Azərbaycanı təmsil edir.
11-04-2026, 18:27
Tahir Salahovun qəbirüstü abidəsi ucaldıldı
Xalq rəssamı Tahir Salahovun məzarının üzərində yeni abidə ucaldılıb.
Bu abidə sənətkarın üç hissədən ibarət “Odlar yurdu” silsiləsi əsasında hazırlanıb.
Kompozisiyanın mərkəzində “Xəzər bu gün” əsəri yer alır. Sol tərəfdə “Atəşpərəstlərin məbədi”, sağ tərəfdə isə Qız qalasının təsviri təqdim olunub.
“Odlar yurdu” triptixi rəssamın yaradıcılığında mühüm və xüsusi əhəmiyyət daşıyan əsərlərdən biridir.
Qəbirüstü abidənin müəllifi rəssamın 2023-cü ildə vəfat edən qızı Alagöz Salahova olub.
Qeyd edək ki, Tahir Salahov 2021-ci il mayın 21-də, 93 yaşında Almaniyada müalicə aldığı klinikada dünyasını dəyişib. O, Bakıda I Fəxri xiyabanda torpağa tapşırılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!