2016-cı ildə Azərbaycanda 327 tamamlanmış intihar hadisəsi qeydə alınıb.

Butov.az Teleqraf.com-a istinadən xəbər verir ki, bunu Səhiyyə Nazirliyinin Psixi Sağlamlıq Mərkəzinin Təcili psixoloji yardım şöbəsinin müdiri Kəmalə Talıbova bu gün keçirilən mətbuat konfransında deyib.

Onun sözlərinə görə, keçən il ölkə ərazisində 470 nəfər intihara cəhd edib, amma bu intiharlar ölümlə nəticələnməyib. 2015-ci illə müqayisədə ötən il intiharların sayında azalma müşahidə edildiyini deyən Kəmalə Talıbova bildirib ki, 2015-ci ildə 515 intihar faktı olub: “ 2015-ci ildə intihar hadisələrinin artmasına səbəb həmin dövrdə devalvasiya prosesinin olması idi. Çünki insanların dollarla kreditləri çox idi. Keçən il isə bu problem nisbətən sabitləşdi. Həm də maarifləndirici tədbirlər də intihar hallarının sayının azalmasına şərait yaradıb”.

Kəmalə Talıbova deyib ki, bütün dünyada əsas problemlərdən biri olan intiharın səbəbləri müxtəlifdir: “Bura bioloji, sosial faktorlar daxildir. Sosial faktorlar arasında işsizlik, ailə vəziyyətini misal çəkmək olar. İntiharlarda genetik amillər də rol oynayır. İntihar halları kişilərdə qadınlara nisbətən daha çox rast gəlinir. İntihar hallarının baş verməsində cəmiyyətdə, mətbuatda məlumatların düzgün yayımlanması və necə təqdim olunması vacib məsələdir.

Çünki bəzən insanlar sanki həmin məlumatlarda özünün bir problemini görür və çıxış yolunu intiharda tapırlar. İntihar insanın krizis vəziyyətində etdiyi davranışdır.

Azərbaycanda intiharların sayı kritik vəziyyətdən aşağıdır. Bu gün dünyada orta intihar faktlarının sayı hər 100 min nəfərə 7 intihar hadisəsi düşür. Azərbaycanda isə bu göstərici hər 100 min nəfərdən 5-də bu hal qeydə alınır”.