“Məktəbəqədər təhsil haqqında” qanun layihəsinin ilkin forması hazırdır.
Butov.az xəbər verir ki, bu barədə Modern.az-a açıqlamasında Milli Məclisin Elm və təhsil komitəsinin sədri İsa Həbibbəyli deyib. O qeyd edib ki, qanun layihəsinin hazırlanması üçün müxtəlif ölkələrin, UNESCO-nun təcrübəsi öyrənilir.

“Bizim üçün ən əsası Azərbaycan təcrübəsi və reallıqlarıdır. Ona görə də ekspertlərimiz regionlarda, paytaxtda dövlət və özəl bağçaları və onların funksiyalarını öyrənirlər.

Dünyada dövlət bağçaları istiqamətində ən çox inkişaf edən ölkə Finlandiyadır. Orada məktəbəqədər yaşlı uşaqların 60 faizi bağçaya cəlb olunur, onlardan isə 98 faizi məktəbə getməmiş I sinifə hazırlıq kursları keçir.


Dünyada bu ən yüksək göstəricidir. Özəl bağçaların ən çox inkişaf etdiyi yer Estoniyadır. Orada dövlət bağçası yoxdur. Estoniyada ödənişin əmək haqqına müvafiq tutulması qaydası var ki, hər bir ailə övladını məcburi bağçaya qoya bilsin. Orada xüsusi xəstəlikləri olan uşaqlar üçün ayrıca bağçalar var. İnternat tipli, eyni zamanda ailə bağçaları fəaliyyət göstərir”.

Deputat bildirib ki, Azərbaycanda müşahidə olunan hələ dövlət bağçalarının olmasıdır. Bunlar məktəbəqədər yaşlı uşaqları 17-22 faiz həcmində cəlb edə bilir.

“Dövlət bağçasının siyasəti var. Ölkəmizdə yeni bağçalar tikmək prosesi davam edir. Eyni zamanda özəl sektor da inkişaf edir. Bizi narahat edən məsələ isə özəl bağçalarda vahid qiymətləndirmə sisteminin tətbiq edilməsidir.

Hərəsinin imkanları, maddi texniki bazası da müxtəlifdir. Lakin ortaq qiymətləndirmə sistemini tapmaq lazımdır ki, orada şişirdilmiş rəqəmlər olmasın. Əhali öz uşaqlarını bağçaya qoya bilsin”.

İ.Həbibbəyli qeyd edib ki, qanun layihəsi sentyabrda I oxunuş üçün hazırlanıb, komitədə yekun müzakirəyə veriləcək. “Qarşıda çox iş durur. Çalışırıq ki, reallıqları, dövlətin siyasəti və xalqın ehtiyaclarını qanun layihəsində əks etdirə bilək”.