Abşeron bağlarına gedən yollar Binəqədi rayonunun ərazisindən- Rəsulzadə qəsəbəsinin darısqal yollarından keçir. Elə ali məktəblərə, orta təhsil müəssisələrinə dərsə gedənlər, səhər-səhər işə tələsənlər də bu yollardakı tıxaclardan keçməyə məhkum edilirlər. Çünki uzunluğu 15-20 metr olan yük maşınları  günün, gecənin istənilən vaxtı bir-birinin ardınca düzülərək yollara çəpər çəkir. Pirşağıya, Qızılquma, İkinci sovxoza, Görədilə, Fatmayıya, Mehdiabada, Novxanıya, Binəqədiyə gedən marşrut avtobuslarının sürücüləri havalanıb avtobusu hara gəldi sürürlər. Bir də baxırsan ki, ya Biləcəridə, ya Sumqayıt yolunda, ya da hansısa tanımadığın bir yerdəsən. Onda da mərəkə qopur. Ağız deyəni qulaq eşitmir. Dava-dalaş başlayır. Hər kəs ya yolundan,ya dərsindən, ya da işindən olur. Beləcə qan qaraçılıqları axşama qədər davam edir. Axşam da həmin ovqat evlərə, ailələrə daşınır. Təbii ki, əgər adamlar evlərinə salamat gedib çata bilsələr.

   Yolların təhlükəsizliyinə cavabdeh olan şəxslər isə ya hansısa vəzifəlinin qaynanasını mənzilbaşına qədər müşayiət edir, ya da harasa çəkilib qəza gözləyirlər. Qəza törəndimi, buyurun hər kəs başınızın üstündədir. Başı bəlaya düşənin dərdindən hərə öz payını çıxarır. Kimə nə düşə düşə. Bizə düşən isə hər gün eyni dərəcədə ağır  mənzərəni seyr etməkdir. Allah bizə səbr, cavabdehlərə insaf versin! 

Butov.az