Bu gün 10 dekabr "Beynəlxalq İnsan Hüquqları Günü” münasibətilə Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA), "İnsan Hüquqları XXI-əsr Azərbaycan” Fondu və İnsan Hüquqlarına dair Beynəlxalq Standartların Təsbiti üzrə Birgə İşçi Qrupu öz doğma yurd-yuvalarından didərgin düşmüş, əsir, itkin və şəhid olmuş minlərlə vətəndaşımızın, habelə Sərsəng regionunda 400 000-dən artıq insanın ekoloji terrorun qurbanı olmalarının qarşısını almaq və pozulmuş hüquqlarının müdafiəsi məqsədilə jurnalistlərin, Azərbaycan Respublikasında akkreditasiya olunmuş bir neçə səfirin və səfirliklərin nümayəndə heyyəti ilə Tərtər rayonuna və onun bir sıra kəndlərinə səfər ediblər
Səfər zamanı Tərtər rayon Gənclər Mərkəzində yerli icra hakimiyyəti və vətəndaş cəmiyyəti nümayəndələri ilə görüş keçirilib. Görüşdə Tərtər rayon İcra Hakimiyyətinin başçısı Müstəqim Məmmədov, AVCİYA-nın vitse prezidenti Vəli Əlibəyov, İnsan hüquqları XXI əsr Azərbaycan Fondunun prezidenti Şahin Camalov və layihənin əlaqələndiricisi Samir İsayev çıxış ediblər. Qonaqlara və KİV nümayəndələrinə "Sərsəng su bəndinin işğalının Tərtər rayonuna təsiri", "Sərsəng humanitar faciəsinin qarşısının alınması layihəsi" və "Sərsəng su anbarının işğalının insan hüquqlarının vəziyyətinə təsiri" ilə bağlı məlumatlar verildikdən sonra, ünvanlanan suallar cavablandırılıb.
Tərtərçay hidroqovşağı idarəsinin rəisi Böyükkişi Cümşüdov “Sərsəng su bəndinin işğalının Tərtər rayonunun su təchizatına təsiri” barədə məlumat verdikdən sonra jurnalistlər tərəfindən foto və video (Tərtər çayı üzərində yerləşən körpünün girəcəyində) çəkilişləri də həyata keçirilib.
Gün ərzində Tərtər rayonun 2 kəndinə səfər edilib ,orada yaşayan yerli sakinlərlə söhbətlər aparılıb. Yol üstü ekoloji terrorun yaratdığı susuzluq problemindən əziyyət çəkən iri fermer təsərrüfatında fermerlə söhbətlər də keçirilib.
Onu da qeyd edək ki, "Sərsəng yürüş" layihəsi Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Sərsəng humanitar faciəsinin qarşısının alınması məqsədi ilə həyata keçirilən davamlı layihələrindən biridir.
