Toplantı “Bayraq günü” bayramı münasibətilə bağlı təbriklə işinə başladı. İclasda Tərtərdə şəhid olmuş Elşən Məmmədovun 40 mərasimində iştirak üçün Gürcüstana ezam olunmuş nümayəndənin məlumatı dinlənilmiş və müsbət dəyərləndirilərək ən yaxın zamanda rəsmi görüşlər üçün heyət ezam olunması razılaşdırlmış, Azərbaycan Prezidenti İlham Əliyevin Gürcüstan səfəri dəyərləndirilmiş, “Düyna Qarapapaq Türkləri birliyi”nin Qurultayında iştirak etmək məqbul hesab edilmiş və nümayəndə heyyətinin tərkibi təsdiq edilmiş, növbəti Dədə Camal Məclisində “Gürcüstan Pəhləvanları” mövzusunda dinləmənin keçirilməsi haqda qərar verilmiş və 25 dekabr “Gürcüstan Türklərinin Həmrəylik gecəsi” tədbirinə hazırlıqla bağlı təşkilat komitəsinin yaradılması, “Zahid Xəlilov adına “Türklüyə xidmət” mükafatı”nın və “İlin Şərəf Medalı”nın yeni laureatlarının müəyyən edilməsi haqqında müvafiq qərar qəbul edilmişdir.

Eyni zamanda Sınıq Körpü sərhəd keçid məntəqəsində Azərbaycan tərəfdəki acınacaqlı vəziyyət müzakirə olunmuş, soydaşlarımızın incidilməsi qeyd edilmiş və həmin məntəqədə vəziyyəti yerində öyrənmək üçün monitorinq qrupunun ezam olunması haqqında qərar verilmişdir.

Ölkə Prezidentinin Gürcüstana səfərinin nəticələri ilə bağlı ətraflı müzakirələrin nəticəsi olaraq bu səfərinin Azərbaycan və Gürcüstan arasında strateji tərəfdaşlığın möhkəmlənməsində və Gürcüstanda yaşayan soydaşlarımızın problemlərinin həllindəki müsbət rolu qeyd edilmiş və təqdiredici rəsmi açıqlama verilməsi qərarlaşdırılmışdır. Ümid ifadə olunmuşdur ki, bu səfər həm də Zəlimxan Məmmədli haqqında Gürcüstana giriş yasağı qərarının ləğv olunmasını təmin edəcəkdir.

“Borçalı” İctimai Cəmiyyətinin Mətbuat və İnformasiya Xidməti