Qarabağ parkı və Xocalı soyqırımı abidəsinin açılışı ilə bağlı Dənizlidə səfərdə olan Qənirə Paşayeva şəhid ailələri və qazilər cəmiyyətlərini də ziyarət edib.

Butov.az Axar.az-a istinadən xəbər verir ki, millət vəkili Ermənistanın işğal etdiyi Azərbaycan torpaqlarında törətdiyi vandalizm aktları, Xocalı soyqırımı, 20 mindən artıq şəhidimiz barədə geniş məlumat verib.

Ölkəmizi çox sevdiklərini deyən şəhid ailələri və qazilər cəmiyyətlərinin rəhbər və üzvləri hər an Azərbaycan torpaqlarının işğaldan azad edilməsi istiqamətində üzərlərinə düşəni etməyə hazırıq olduqlarını bildirib.

Azərbaycanın erməni terrorundan çox əziyyət çəkdiyini xüsusi vurğulayan millət vəkili bildirib ki, o zaman Azərbaycan türklərinə qarşı terror törədənlər indi də müxtəlif terror təşkilatları içərisində Türkiyəyə qarşı çirkin addımlarını davam etdirirlər: “Azərbaycan bütün məsələlərdə, terrorla mübarizədə hər zaman Türkiyənin yanındadır”.

Millət vəkili Dənizli valisi və bələdiyyə başçısı ilə görüşündə isə Qarabağ həqiqətlərinin daha geniş yayılmasını müzakirə edib.

Dənizlini Azərbaycan bölgələrindən biri ilə qardaş olaraq görmək istədiyini bildirən Q.Paşayeva Azərbaycan-Türkiyə münasibətləri və Dağlıq Qarabağ problemi ilə bağlı konfransların keçirilməsinin vacibliyini vurğulayıb.

Dənizli bələdiyyə başqanı Osman Zolan qardaş bələdiyyələr məsələsi ilə bağlı addımların atılacağını deyib.

Millət vəkili vali ilə söhbət zamanı Ermənistanın işğalçılıq siyasəti barədə geniş məlumat verib: “İnanıram ki, biz Azərbaycan və Türkiyə olaraq əl-ələ verib torpaqlarımızı Ermənistanın işğalından azad edəcəyik”.