Necə gündür ki, Bakının bazar və dükanlarında leş ətlərin satılması və onlardan hazırlanan kolbasa məhsullarının əhaliyə satılması ilə bağlı məsələ diqqət mərkəzindədir.

Butov.az xəbər verir ki, Musavat.com saytının yazdığına görə, leş ətlərdən istifadə edən şirkətlərdən biri “1000 bərəkət, halal nemət” adı ilə satılan məhsulları istehsal edən «Səhliyalı» şirkətidir.

Bəs bu iddia nə dərəcədə doğrudur?

Azad İstehlakçılar Birliyinin sədri Eyyub Hüseynov AzNews.az-a-a açıqlamasında “Şəhliyalı” şirkətinin bu işlə leş ətdən istifadəsinin inandırıcı olmadığını deyib: “Beynəlxalq təşkilatların dəstəyilə Azad İstehlakçılar Birliyi həmin şirkətdə müəyyən iş aparıb və qida təhlükəsizliyi sistemi yaradıb. Onlar əti Hindistandan alırlar, ona görə kolbasaların qiyməti Azərbaycan bazarında ətdən ucuz başa gəlir”.

E.Hüseynov leş ətlərlə bağlı 15 ildən yuxarıdır ki, mübarizə aparıldığını bildirib: “Kolbasalarda leş ətlərdən istifadə edənlərin bizdə əlaqə telefonları və leşi hara gətirdikləri ilə bağlı ünvan var. Biz bununla bağlı dövlət orqanlarına məlumat vermişik. Məsələyə ilk münasibət Daxili İşlər Nazirliyindən gəlib. Deyiblər ki, biz yalnız təhlükəsizliyi qoruya bilərik. Mən istəyirəm ki, dövlət orqanları bu cinayəti ifşa etsinlər. Lakin bu vaxta kimi mümkün olmayıb. Son zamanlar Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi bu məsələ ilə bağlı yaxşı işlər görür. Təəccüblüdür ki, dövlət orqanlarının nümayəndələri rayonlarda bu işi görür, lakin bələdiyyələr və yerli icra nümayəndələri leş alverinə göz yumur. Hamı bilir ki, leş alveri insanların gözü qarşısında baş verir”.

Ekspert leş ətlərinin insan orqanizmi üçün ciddi təhlükə yarada biləcəyini vurğulayıb: “Leş ət ölmüş heyvan ətidir. Özü də həmin heyvanlar çox vaxt xəstəlikdən ölürlər. Onlar xəstəlik, mikrob daşıyıcılarıdır. İnsan ən təhlükəli xəstəliklərə o leş ətlərdən yoluxa bilər. Mədə-bağırsaq, sağalmaz və əlacı olmayan viruslar o ətlərdən yoluxur”.

E.Hüseynov leş əti alveri ilə məşğul olanlara qarşı dəfələrlə cinayət işinin qaldırıldığını deyib: “Lakin onun sifarişçisi müəyyən olunmayıb. Məqsədimiz onları ifşa etməkdir. Deməli tələb var ki, sifariş olunur da”.