Ötən gün axşam saatlarında Cəlilabad Mərkəzi Xəstəxanasının həkiminin evinə oğrular girib.

Butov.az xəbər verir ki, bu barədə Gün.Az-a məlumat verən zərərçəkmiş – həkim Fərəc Bayramov yerli hüquq-mühafizə orqanlarının bu cinayət işinə laqeyd yanaşdıqlarını deyib.

Cinayətin mayın 26-sı axşam saatlarında baş verdiyini bildirən F.Bayramov oğruların onun evdə nə vaxt olub-olmadığını müşahidə etdiklərini, yaxud da bu barədə məlumatlandırıldığını düşünür:

“Hadisə ötən gün axşam saat doqquz radələrində baş verib. Mən xəstə üstünə çağırışa getmişəm, evdə də heç kəs olmayıb.

Evin seyf qapısının sındırılması mümkün olmadığından, oğrular evə eyvandan giriblər. Lakin həkimin evində nə olavaq ki… Rayonda hər kəs mənim necə yaşadığımı bilir.

Ona görə də, oğruların evdəki pulqabında olan təxminən əlli-altmlş manat pul və bir neçə ətirdən başqa əllərinə heç nə keçməyib.

Görünür, mənim evə qayıtmağım haqda onlara xəbər verilən kimi tələsik oranı tərk ediblər”.

F. Bayramov dünən evdə oğurluq olduğunu fərq edən kimi polisə müraciət etdiyini, lakin asayiş keşikçilərinin cinayət işi ilə hələ də maraqlanmadıqlarını deyib:

“Dünən polisə xəbər verdim, ordan gəlib telefonla bir neçə şəkil çəkib getdilər. İndi günorta saat bir olmasına baxmayaraq, hələ də rayon polisindən nə kriminalist, nə müstəntiq gəlib evə baxış keçirib, təhqiqat aparmayıblar.

Bu da belə düşünməyə əsas verir ki, onlar evimdə baş vermiş oğurluğun araşdırılnasında maraqlı deyillər”.

F. Bayramov evinin oğurlanması faktı ilə əlaqədar əlavə şübhələrə əsas yaradan bəzi məqamları da açıqlayıb:

“Mənim evim olan ərazidə, qonşuluqda rayon hüquq-mühafizə orqanlarının rəhbər şəxsləri – polis rəisinin müavini, rayon tol polisinin rəisi, pasport-masa rəisi və başqa vəzifəli şəxslər yaşayırlar.

Yəni bu şəxslərin qonşuluğunda olan mənim evimi yarıblar. Evin yanında marketlər və digər obyektlər var, müşahidə kamerası quraşdırılıb. Evimə girən oğruların həmin kameralara düşməməsi mümkün deyil. Lakin dediyim kimi, yerli polis bu cinayətə laqeyd yanaşır.

Ümumiyyətlə, son vaxtlar Cəlilabad rayonundan ev, mal-qara oğurluğu baş alıb gedir. Lakin cinayətkarların tapılıb cəzalandırılması istiqamətində işlər demək olar, görülmür. Bu da əhalidə oğruların yerli polis tərəfindən himayə edilməsi qənaətini yaradır.

Mən artıq bununla bağlı Daxili İşlər Nazirliyinə də müraciət etməyi düşünürəm”.