Kürdəmir rayonunda soyğunçuluqla məşğul olan şəxslər saxlanılıb. APA-nın məlumatına görə rayon Polis Şöbəsinə müxtəlif vaxtlarda mənzillərin soyulması ilə bağlı məlumat daxil olub. Həmin faktlara əsasən cinayət işi açılıb və axtarış işlərinə başlanılıb. Araşdırma zamanı cinayət hadisələrini törətməkdə şübhəli bilinən Kürdəmir rayon sakinləri, 33 yaşlı Nağdəliyev Cavid və 32 yaşlı Musayev Ceyhun polis tərəfindən saxlanılıb. Aparılan istintaq işləri zamanı məlum olub ki, C. Nağdəliyev bir cinayət faktını tək törədib. Belə ki, C.Nağdəliyev sentyabrın 6-da Kürdəmir şəhər sakini Təranə Xankişiyevaya məxsus mənzildən oğurluq edib. Günorta saatlarına adı çəkilən mənzilə gələn Cavid evdə olan azyaşlı uşaqlara özünü elektrik şəbəkəsinin işçisi kimi təqdim edib.

İçəri daxil olduqdan sonra isə uşaqlara hədə-qorxu gələrək oradan 350 AZN pul və 150 AZN dəyərində qızıl-zinət əşyası ələ keçirərək aradan çıxıb. Cavid digər cinayət faktını isə həmyerlisi C. Musayevlə birgə törədib. Qabaqcadan əlbir olan şəxslər sentyabrın 9-da rayonun Şıxınlı kənd sakini Vüsalə Hüseynovaya məxsus mənzilə basqın ediblər. Onlar tanınmamaq üçün kapron corabdan hazırlanmış maskadan istifadə ediblər. Onlar mənzildəki uşaqları qorxudaraq evdən 310 manat dəyərində 2 ədəd müxtəlif markalı telefon, həmçinin 300 manat dəyərində qızıl-zinət əşyaları aparıblar. Hər iki şəxs əməllərindən peşman olduğunu bildirib.

Faktla bağlı Kürdəmir rayon Polis Şöbəsi tərəfindən araşdırma aparılır.