Bu gün Azərbaycan Milli Elmlər Akademiyasının (AMEA) ümumi yığıncağı və Təhsil Nazirliyinin kollegiyasının birgə elmi sessiyasında çıxış təhsil naziri Mikayıl Cabbarov deyib ki, onlara verilmiş yeni səlahiyyətlərə uyğun olaraq, Təhsil Nazirliyi artıq birbaşa olaraq, orta məktəb dərsliklərinin müəllifləri ilə müqavilələr bağlaya biləcək.

Butov.az Ölkə.Az-a istinadən xəbər verir ki, nazir təklif edib ki, Təhsil Nazirliyinin müraciəti əsasında AMEA-nın alimləri də bu müzakirələrdə iştirak etsinlər və biz onları vaxtında, yəni dərslik çap olunmamışdan əvvəl nəzərə ala bilək.

Ekspertlər isə bunu bir o qədər də yaxşı fikir hesab etmirlər. Təhsil üzrə ekspert Kamran Əsədov Ölkə.Az-a bildirib ki, hazırda orta məktəblərdə istifadə olunan dərsliklərin böyük əksəriyyətinin müəllifi elə AMEA-nın professor və akademikləridir. Onun sözlərinə görə, belə olan halda orta məktəb dərsliklərindən hansısa inkişaf gözləmək olmaz.

“Çünki orta məktəb kitabı akademik kitab olmamalıdır. Onda yerləşdirilən informasiyalar nə qədər sadə olsa o qədər şagirdləri cəlb etmiş olacaq. Hesab edirəm ki, bu halda dərsliklərin inkişafından danışmaq olmaz. Çünki tenderə buraxılan alternative dərsliklərə AMEA-nən komissiya üzvləri və ekspertləri mənfi rəy verəcək, bundan sonra onların həmkarlarının müəllifi olduqları dərsliklər qalib gələcək. Rusiyada heç bir akademik orta məktəb kitabının müəllifi ola bilməz. Bu qeyri etik hesab olunur. Çünki akademik adı orta məktəb dərsliyi müəllifi üçün o qədərdə məqbul hesab edilmir”.