Butov.az xəbər verir ki, AMEA Mərkəzi Elmi Kitabxanasının təşkilati dəstəyilə Güney Azərbaycan mühacir şairi Hadi Qaraçayın “Barışa inanma, Fərihcəm” adlı kitabının təqdimatı keçirilib.

Kitabın ön sözünün müəllifi, tərtib edəni və nəşrə hazırlayanı, AMEA Nizami adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, Güney Azərbaycan ədəbiyyatının, Məhəmmədhüseyn Şəhriyar poeziyasının araşdırıcısı, 100-ə yaxın elmi əsərin, o cümlədən xaricdə çıxmış 15 elmi əsərin müəllifi, respublika, beynəlxalq və xarici ölkələrin müxtəlif elmi qurumlarının üzvü Esmira Fuad əvvəlcə müəllif haqqında məlumat verib. Hadi Qaraçayı Güney Azərbaycanda və bütün Türk dünyasında tanınıb sevilən şair, milli ruhun daşıyıcısı kimi xarakterizə edən E. Fuad deyib: “Hadi üçün ən önəmlisi ana dilində düşünmək, bu dildə danışmaq və yazmaqdır. Dilimizə, əlifbamıza bu qədər önəm verib üstündə əsməsi, bəlkə də dilin bir xalq kimi var olmanın, millətləşmənin çox mühüm amili olduğunu yaxşı anladığındandır. Bu dil yanıqlısının haqq qənaətincə, İranda türkcə yazmaq və ədəbi əsərlər yazmaq öz-özlüyündə siyasi fəaliyyətdir. Eyni zamanda, siyasi görüş və düşüncələrin ədəbi əsərlərin məzmununa daxil edilməsinin Güneydə bir problem olmadığını da vurğulayan şair əsərlərində siyasi mövzulara toxunmağı pis və ya yaxşı bir hal kimi qabartmır, ancaq siyasi motivi necə işləməyin, ədəbi müstəviyə hansı səviyyədə gətirməyin, hansı söz və kəlimələrlə ifadə etməyin önəmli olduğuna diqqət çəkir. Yaranmış vəziyyətdən çıxış yolunu isə dünyanın harasında yaşamasından asılı olmayaraq hər bir türkün anlamaqda çətinlik çəkməyəcəyi ortaq türkcənin yaradılmasında görür”.




İsveçdə fəaliyyət göstərən Güney Azərbaycan Konqresi (GAK) başqanı Abdulla Amir Haşimi, Azərbaycan Yazıçılar Birliyinin (AYB) Cənubi Azərbaycan bölməsinin sədri Sayman Aruz, AMEA Nizami adına Ədəbiyyat İnstitutunun əməkdaşları Cavanşir Yusifzadə, Qürbət Mirzəzadə, Aygün Bağırlı, Qumru Şəhriyar, Sakibə Ələsgərova, şairlərdən Zəkulla Bayramlı, Mənzər Nigarlı, Kəmalə Abıyeva müəllif və kitab haqqında düşüncələrini bölüşüb, onu çağdaş dövrün dəyərli qələm sahibi, ağ, modern şeirin ustadı adlandırıblar. Çağdaş Güney Azərbaycan poeziyasını yaradanlardan, ədəbiyyatımızın qüdrətli nümayəndələrindən biri, son dərəcə dərin poetik duyuma, intellektə sahib bir şair kimi ona gələcək yaradıcılığında uğurlar diləyiblər.



Şeirlərin müəllifi Hadi Qaraçay doğma vətənin gələcəyi ilə bağlı nikbin ümidlərini səsləndirib, kitab haqqında fikirlərini dilə gətirib.

Qeyd edək ki, taleyinə mühacirlik həyatı yazılan Hadi Qaraçay 1966-cı ildə Güney Azərbaycanın Suyari kəndində doğulub. İlk və orta təhsilini Ələmdar şəhərində fars dilində alıb. Ali təhsil almaq məqsədilə öncə Təbrizə, daha sonra vətənin bu tayına Quzey Azərbaycana üz tutan şair hazırda Norveçin Sadnes şəhərində yaşayır. “Barışa inanma Fərihcəm” kitabı yaradıcılığını ana vətəninə, ana dilinə, xalqın taleyinə kökləyən müəllifin sayca 4-cü kitabıdır. Kitabda Hadi Qaraçayın “Mənim otuz yaşıma, yurdumun bayraqsız başına şeir”, “And”, “Sürülmüş torpağın nağılı”, “Sonuncu boy”, “Sürgünlük” kimi ən son şeirləri və Azərbaycan tarixinə poetik baxış sərgiləyən “Sonsuzluq poeması” və ədəbi-tənqidi məqalələri yer alıb.

Butov.az