Bizimyol.info xəbər verir ki, “Hur” adlı tərcümə və araşdırma mərkəzinin, "İran və Avrasiya araşdırma institutu"nun (İRAS) və "Qafqaz Araşdırmalar Mərkəzi"nin təşkilatçılığı ilə 2014-cü ilin noyabr ayının 16-da təşkil edilmiş seminardakı çıxışların mətnləri yayımlanıb."Tarix boyu Qafqazın coğrafi sərhədləri” adlı elmi qurultayın çıxışçıları Azərbaycan Respublikası ilə əlaqələrdən danışıblar. Tarixçi, millət vəkili Karen Xanlari bildirib ki, Ermənistanın rus qoşunlarının köməyi ilə Qarabağa hücumu, qarabağlıların Azərbaycan Respublikasından qurtuluşu deməkdir. K. Xanlari Ermənistan tərəfinin Azərbaycan ərazisinə hərbi hücumunu Kosovo məsələsinə bənzədib. Amma millət vəkili bu iddiaları ortaya atarkən BMT Təhlükəsizlik Şurasının Ermənistanı işğalçı kimi tanıyıb və qoşunlarının Azərbaycan ərazisindən çıxarması ilə bağlı dəfələrlə edilmiş tələbləri unudub.
Daha sonra çıxış edən digər tarixçi araşdırmaçı Cavad Təbatəbayi İran-Azərbaycan xarici əlaqələrini qınayıb. O, bildirib ki, Azərbaycan Respublikasında qanlı düşmənlərimiz var. Cavad Təbatəbayi həmçinin İranda Azərbaycan milli fəallarının Azərbaycan dövləti tərəfindən dəstəkləndiyini deyib: "Bakının Vaşinqtondakı səfirliyi, İran azərbaycanlılarını ruhlandırır. Bunun nəticəsində onlar Azərbaycan bayrağını açdılar və belə hallara bu gün universitetlərdə, Təbrizin ictimai yerlərində də rast gəlmək olar."
Qeyd edək ki, azərbaycanlı yazarlar və tadqiqatçılar bu iddiaların erməni lobbisi tərəfindən planlaşdırılmış olduğunu düşünür və İranın dövlət orqanları tərəfindən dəstəklənməsindən narahatdırlar.