Butov.az GünAzTV - yə istinadən xəbər verir ki, İran prezidentinin qardaşı Hüseyn Firudin həbs edilib. Bu barədə İran Məhkəmə Sisteminin sözçüsü axund Qulamhüseyn Möhsüni Ejei iyulun 16-da jurnalistlərlə görüşündə xəbər verib.

Möhsüni Ejei bildirib ki, Hüseyn Firudin iyulun 15-də bir sıra maliyyə məsələləri ilə əlaqədar əleyhinə sürülən ittihamlarla bağlı həbs edilib: “Onun müvəqqəti azadlığa buraxılması qarşılığında mülki girov vəsiqəsinin qoyulması tələb edilib. Lakin girov vəsiqəsi təmin edilmədiyinə görə o, zindana köçürülüb. Vəsiqənin məbləği təmin ediləcəyi təqdirdə o, müvəqqəti olaraq sərbəst buraxılacaq”.

Hüseyn Firudinin müvəqqəti azadlığa buraxılması qarşılığında təyin edilən mülki vəsiqə girovunun məbləğini açıqlamayan Möhsüni Ejei, onun işi ilə bağlı daha bir neçə nəfərin də həbs edildiyini bəyan edib. Məsələnin araşdırıldığını bildirən axund Ejei, tutulmuş həmin şəxslərin adlarını açıqlamayıb.



Qeyd edək ki, İran prezidentinin qardaşı ötən ilin yayında bir sıra rəsmilərin tutduğu vəzifələrdən sui-istifadə edərək özlərinə astronomik maaşlar yazması məsələsində rolu olmaqda və Refah bankının rəisinin təyin edilməsində müdaxilədə günahlandırılsa da o, həmin ittihamları rədd etmişdi.

Bəzi mənbələr isə Həsən Ruhaninin qardaşının tutduğu vəzifədən sui-istifadə etməkdə, maliyyə fırıldaqçılığında və dövlət əmlakını mənimsəməkdə günahlandırıldığını bildirirlər.

İran prezidentinin özəl köməkçisi və xarici işlər naziri Məhəmmədcavad Zərifin müşaviri vəzifələrində çalışan Hüseyn Firudinə qarşı irəli sürülən ittihamlar təzə olmasa da, onun məhz indi tutulması, hakimiyyətin dini liderə yaxın qatı mühafizəkar qanadından olan bəzi cərəyanların Həsən Ruhaniyə və onun hökumətinə təzyiqi kimi qiymətləndirilir.