Yaqut Aslanova

"Bir kərə yüksələn bayraq bir daha enməz"- Məhəmməd Əmin Rəsulzadənin istiqlal şüarı idi. 1918-ci ildən bu hər bir Azərbaycan vətəndaşının istiqlal şüarı oldu. Doğrudur artıq 97 il keçib. Azadlığa, müstəqilliyə, zəfərə gedən yolumuzda enişdə oldu, yoxuşda oldu. Amma odlar yurdunun övladları geri çəkilmədi əksinə güc toplayaraq daha böyük zirvələri məqsəd seçdi. Bu məqsədlərdən biri də İlk Avropa Oyunları idi. Birinci Avropa Oyunlarının keçirilməsi barədə qərar 8 dekabr 2012 -ci ildə Romada keçirilmiş Avropa Olimpiya Komitəsinin 41-ci Baş Assambleyasında qəbul edilib. Avropa oyunlarının hər dörd ildə bir keçirilməsi planlaşdırılıb, növbəti oyunlar isə 2019 -cu ildə baş tutacaq. Baş Assambleyada keçirilən səsvermədə 48 səsdən 38 səs İlk Avropa Oyunlarının Bakıda keçirilməsi barədə qərar qəbul etdi. Bakı 2015 Avropa Oyunlarının rəsmi loqosu 16 iyun 2014 -cü il tarixində müəyyən olundu. Adəm Yunisovun tərtib etdiyi loqo Alov, Su, Simurq quşu, Xalı və Nar da daxil olmaqla, bu beş element ev sahibi ölkənin qədim və müasir tarix və mədəniyyətini özündə birləşdirirdi bu beş element. Ceyran və Nar Bakı 2015 Avropa Oyunlarının rəsmi simvolu elan edildi. Bu simvollar Bakı 2015- in təbliğatında brend rolunda çıxış edərək bütün dünyada Avropa Oyunlarının simvoluna çevriləcək. Ceyran Azərbaycanın zəngin irsinin, qədim tarixinin, dəyərli mədəniyyətinin elçisi olacaq. Nar isə Oyunların enerjisini, həyəcanını və əyləncəsini təmsil edir. Avropa Oyunları üçün 4 obyekt qrupu üzrə 18 yarış obyekti mövcuddur. Daimi idman obyektlərinin sayı 12-dir. Triatlon və Velosiped yarışları üçün nəzərdə tutulmuş 6 müvəqqəti idman obyekti də yaradılmışdır. İdman obyektlərindən beşi-Milli Gimnastika Arenası, BMX Veloparkı, Bakı Su İdman Mərkəzi, Bakı Atıcılıq Mərkəzi və Bakı Olimpiya Stadionu. Bakıda keçirilən Avropa Oyunlarından məsul olan Təşkilat Komitəsi Azərbaycan Respublikası prezidentinin sərəncamı ilə qurulmuşdur. Təşkilat Komitəsinə Heydər Əliyev Fondunun prezidenti Mehriban Əliyeva sədrlik edir. Bakı 2015 Avropa Oyunları Əməliyyat Komitəsi Təşkilat Komitəsinin sədrinin qərarı ilə yaradılmışdı. Avropa Oyunlarının Əməliyyat Komitəsinin baş içraçı direktoru Gənclər və İdman Naziri cənab Azad Rəhimov, baş əməliyyat direktoru cənab Saymon Kleqdir. Bakı Avropa Oyunlarına 12,000 könüllü cəlb olunub. 14 yanvar 2015 -ci ildə Bakı 2015 Avropa Oyunları Əməliyyat Komitəsi İlk Avropa Oyunlarında könüllüləri "Alov Qoruyanlar" kimi elan edib. Bu ad oyunların ruhunun təbliğində və uğurlu keçirilməsində könüllülərin əsas rol oynadığını əks etdirir. Könüllülər idmançılara və rəsmi şəxslərə kömək edir, tamaşaçılara və media nümayəndələrinə dəstək göstərir. "Alov Qoruyanlar" idman yarışlarına göstərdiyi xidmət əvəzində pulsuz nəqliyyat xidməti, uniforma, qida və Avropa Oyunlarının Rəsmi Tərəfdaşı olan Nar Mobile tərəfindən verilən Sim kartdan yararlanırlar. Bax bu tədbirdə də Odlar Yurdunun övladları bir daha əsl vətənpərvərliklərini sübut etdilər. Bilirəmki Oyunlarda əziyyət çəkən hər bir könüllü heç bir qarşılıq, mənfəət güdmədən öz işlərini icra edirlər. Könüllülər əməklərinə qarşılıq idmançılarımızdan qızıl medal, böyük zəfərlər gözləyir. Bunun üçün də həm işlərini icra edirlər, həm də idmançılarımıza dəstək olurlar. Bax budur Azərbaycan övladlarının həmrəyliyi. Biz birik, həmrəyik bunu indi bütün dünya görür.
Biz 31 dekabr tarixini bayram olsun deyə qeyd etmirik. Hər il qeyd etdiyimiz bu həmrəyliyi bu gün Avropa Oyunlarında göstəririk. Təkcə könüllülər deyil, xalqımız da həmrəy olub bu müddətdə bir-birinə və ən əsası da MÜSTƏQİL AZƏRBAYCANA dəstək olurlar. Azərbaycan tarixinə daha bir günü yazdı 12 iyun 2015 -ci il. Həmin gün təkcə Azərbaycan deyil bütün dünya Bakını izləyirdi. Açılış mərasimini Bakı Olimpiya Stadionunda 68000 insan izlədi. Mərasim xoreoqraf Dimitris Papaioannounun ideya rəhbərliyi ilə keçirildi. Açılış mərasimində Azərbaycan mədəniyyətinin, tarixinin, musiqisinin, irsinin, ədəbiyyatının inciləri birləşərək yeni bir əsər yaratdı. O əsər ki, hələ uzun müddət bütün dünya ondan danışacaq, ondan yazacaq. Avropa oyunlarının açılış mərasimi Azərbaycanı dünyaya bir daha nümayiş etdirmək üçün möhtəşəm imkan idi. 12 iyunda hər kəs Bakını izləyirdi. Tədbir maraqlı məqamları və sürprizləri ilə yaddaşlara yazıldı. Dəyərli sənətkarımız Alim Qasımovun ifa etdiyi muğamın səsi Olimpiya Stadionuna yayıldı . Ritmik nağara sədaları altında 24-dən sıfıra geriyə sayım başladı. Rəqəmin 24 seçilməsi isə təsadüfi deyildi. Bu Azərbaycanın müstəqilliyinin 24 illiyini əks etdirirdi. Rəqqasələr ətəkləri ilə səhnənin əsas hissəsini örtürdü. Onların ətəkləri Azərbaycan xalılarındakı həndəsi fiqurlar və dekorativ naxışlarla işlənmişdir. Rəqqasələr ətəkləri ilə sonda Azərbaycan bayrağının obrazını yaratdılar. Simfonik orkestrin ifasında Azərbaycanın dövlət himni səsləndirildi. Azərbaycan Respublikasının dövlət bayrağı stadiona gətirildi. Azərbaycan Respublikasının Prezidenti İlham Əliyevi, “Bakı-2015” ilk Avropa Oyunlarının Təşkilat Komitəsinin sədri Mehriban Əliyevanı və Avropa Olimpiya Komitəsinin prezidenti Patrik Hikkini Mərasim İştirakçıları salamladılar. Bakı Olimpiya Stadionundakı elektron tablolarda Azərbaycanı qarış-qarış dolaşmış məşəlin səyahət marşrutu nümayiş etdirildi. İki dəfə paralimpiya oyunları çempionu, ikiqat dünya çempionu, beşqat Avropa çempionu İlham Zəkiyev və Gənclərin Olimpiya Oyunlarında taekvondo üzrə qızıl medala layiq görülmüş Səid Quliyev Avropa Oyunlarının məşəlini stadiona gətirdi. Nizami Gəncəvinin tutduğu tərəziyə hər kəsin diqqəti yönəldi. Tərəzinin bir gözündə qadın, digər gözündə kişi fiquru vardı. Leyli və Məcnun rəmzləri olan kişi və qadın dövrə vura -vura rəqs edir, qovuşmağa çalışır, lakin birləşə bilmirdilər. Sonra stadionun mərkəzinə doğru uçan bolluq, oyanış, sevgi, uğur mücəssəməsi olan böyük nar gəldi. Nar bölündü və içindən qırmızı rəngli yüzlərlə şar uçmağa başladı. O an Olimpiya Stadionunda heç vaxt yaddan çıxmayacaq xüsusi və füsunkar görünüş canlandı. Möhtəşəm idi. Ardınca isə ilk olaraq Yunanıstan idmançıları səhnəyə gəldilər. İdmançıların keçidini əlifba sırası ilə digər ölkələr davam etdirdi. Bu ardıcıllığı ev sahibi Azərbaycan idmançıları tamamladılar. Azərbaycan Avropa Oyunlarında 291 idmançı ilə təmsil olunur. Açılış mərasiminin sürprizlərindən biri də müğənni Ledi Qaqanın piano arxasındaki ifası idi . İrəliləyən dəqiqələrdə stadiona Avropa olimpiya Komitəsinin bayrağı gətirildi. Stadionda iri ağ buğa və qız göründü. Bakı səmasında ulduzlar parlayır. Bu Avropanın gecə görüntüsü idi ki, Bakıda canlandırıldı. Daha sonra İlk Avropa Oyunları Təşkilat Komitəsinin sədri Mehriban Əliyeva və Avropa Olimpiya Komitəsinin prezidenti Patrik Hikki çıxış etdi.
çıxış etdi. Patrik Hikki Azərbaycan Respublikasının Prezidenti cənab İlham Əliyevi “Bakı-2015” ilk Avropa Oyunlarını açıq elan etməyə dəvət etdi. Odun, suyun, Qobustanın qayaüstü təsvirlərinin rəmzi olaraq Olimpiya Stadionunda canlandarılması həmən günü daha da əfsanəvi edirdi. Azərbaycan xalq mahnısı “Sarı gəlin”in səsləndirilməsi də rəmzi məna daşıyırdı. Həmin gün Azərbaycan tarix kitabına daha bir səhifə əlavə etdi. Səhnədə canlandırılan hər bir təsvir Azərbaycanındır. Bunu biz bilirik, siz də bilin. Qoy hər kəs bütün dünya bizim musiqilərimizi eşitsin, rəqslərimizi görsün, tariximizi bilsin, bizi tanısın. Avropa Oyunlarının Bakıda keçirilməsi Azərbaycan üçün əhəmiyyətli rol oynayır. Azərbaycanın təkcə adını deyil, yerini, insanlarını, tarixini, mədəniyyətini, musiqisini, gücünü görmüş oldular. Ölkəmizə gələn kiçikdən böyüyə hər kəsə qayğı, diqqət, hörmət var. Avropa oyunlarının həm idmançıları həm azərkəşləri üçün Bakıda hər cür şərait yaradılıb. Hər şey müasir standartlara cavab verir. Bakıya baxan birdə baxmaq istəyir. Şəhərin gözəlliyi və özəlliyi hər kəsi valeh edir. Məhz bu gün Azərbaycanın əsl gücünü ,hünərini hər kəs gördü. Avropa oyunlarının keçirilməsi böyük tarixi hadisədir. İlk dəfədir ki, Avropa Oyunları keçirildi. İlk oyunların Bkıda keçirilməsi Azərbaycanın tarixində uğurlu səhifədir. İlk oyunlara ev sahibliyi edəcək Azərbaycanın uğuru və xüsusi rolu Azərbaycan Prezidenti İlham Əliyevin 31 iyul 1997-ci il tarixində Milli Olimpiya Komitəsinin prezidenti kimi seçilməsindən sonra düşünülmüş siyasətin nəticəsidir. Azərbaycan dünya və Avropa səviyyələrində çempionat və tədbirləri, o cümlədən ölkəmizdə nüfuzlu beynəlxalq yarışları təşkil etməklə dünyanın idman mərkəzlərindən birinə çevrilib. Burada 2012-ci ildə keçirilmiş Avropa Ağır Atletika Ustaları Çempionatı, Avroviziya Mahnı Müsabiqəsi və FİFA-nın 17 yaşlı Qızlar arasında Dünya Kuboku kimi mühüm silsilə tədbirləri qeyd etmək olar. 2013-cü ildə ölkə, həmçinin BEİD Dırmanma üzrə Dünya Kuboku və F2 Bakı Qran Pri tədbirlərini qəbul etmişdir. Gələn illərdə Azərbaycan bir sıra yüksək səviyyəli çempionat və yarışları, o cümlədən 2015-ci il üzrə Dünya Kuboku, Beynəlxalq Şahmat Olimpiadası 2016 keçirməyi planlaşdırır. Bununla belə, ən vacib fakt ondan ibarətdir ki, Bakıya 2015-ci ildə ilk Avropa Oyunlarını keçirmək hüququ verilmişdir. Bakı IV İslam Həmrəyliyi Oyunlarını (2017) qəbul etmək üçün namizədliyini irəli sürüb. Bunlar ilk Avropa Oyunlarını ən yüksək təşkilati səviyyədə keçirmək üçün güclü zəmin yaradır. Bizim bərpa olunmuş müstəqilliyimizin yaşı 24 ildir, amma biz bu 24 ildə çox böyük uğurlara imza atdıq. Azərbaycanın bu 24 ildə iqtisadiyyatı da, mədəniyyəti də, incəsənəti də, musiqisi də, mədəni dəyərləri də, tarixi də inkişaf etdi. Azərbaycan bir ölkə kimi hər tərəfli inkişaf etdi. Azərbaycan daha zirvələrə ucalmaq üçün tərəqqi yolu ilə irəlilədi. Azərbaycan bu gün zirvədədir, sabah da zirvədə olacaq. Çünki Azərbaycana daim zirvələrdə olmaq yaraşır. Sənin uğurlarına da övladların sevinər və daim səninlə fəxr edər, Azərbaycan. Həmişə qürurla yalnız bu cümləni söyləyərək qürur duyuruq ki, biz Azərbaycanlıyıq.