11:35

Bu gün səhər saat 09:00 radələrində Bakının Sabunçu rayonu ərazisində sərnişin avtobusu yanıb. Fövqəladə Hallar nazirliyinin Dövlət Yanğından Mühafizə Xidmətindən Anspress-ə verilən məlumata görə, Bakıxanov qəsəbəsində, Sülh küçəsində yerləşən Sabunçu Rayon İcra Hakimiyyətinin qarşısında Bakıdan Gürcüstana gedən ikimərtəbəli sərnişin avtobus qəfil alovlanıb. Hadisə yerinə 2 yanğınsöndürmə briqadası cəlb edilib. Yanğın zamanı bir neçə nəfər xəsarət alıb. Yanğınsöndürənlər 2 nəfəri alovun içindən çıxarıblar. 2 nəfər isə xəstəxanaya yerləşdirilib.

Yanğının digər nəqliyyat vasitələrinə keçməsinin qarşısı alınıb və söndürülüb.

Avtobusun yanması nəticəsində xəsarət alan şəxslərin kimliyi məlum olub. Anspress-in məlumatına görə, avtobusun yanması nəticəsində 47 yaşlı Təyyar Hümbətov və 57 yaşlı Vidadi Qasımov xəsarət alıblar. Onlar ağır vəziyyətdə xəstəxanaya yerləşdirilib.

10:55

APA-nın məlumatına görə, hadisə Sabunçu rayonunun Bakıxanov qəsəbəsində qeydə alınıb. İkimərtəbəli avtobusda baş verən yanğının söndürülməsinə yanğınsöndürənlər cəlb olunub.

Hazırda yanğının söndürülməsi istiqamətində iş aparılır.

Hadisə nəticəsində yaralıların olduğu bildirilir.