Azərbaycan Dövlət Neft və Sənaye Universitetində (ADNSU) Rabitə və Yüksək Texnologiyalar Nazirliyinin (RYTN) tabeliyində İnformasiya Texnologiyalarının İnkişafı Dövlət Fondunun elan etdiyi qrant müsabiqəsində ali məktəbin tələbələri tərəfindən hazırlanan və qrant müsabiqəsində qalib olmuş bir neçə layihənin təqdimatı keçirilib.


Butov.az "APA-Economics"-ə istinadən xəbər verir ki, tədbirdə çıxış edən ADNSU-nun rektoru Mustafa Babanlı universitetin Startap və İnnovasiya Mərkəzi haqqında ətraflı məlumat verib.

Fondun icraçı direktoru Elçin Zeynalov görüşün məqsədi və fondun startap layihələrinə göstərdiyi dəstəkdən danışıb.

Nazirliyin şöbə müdiri Tahir Məmmədov isə çıxışında müsabiqə çərçivəsində qalib gəlmiş startap layihələrə uğurlar arzulayıb və bu kimi innovativ təşəbbüslərin ölkənin İKT sektorunun inkişafına verəcəyi töhfənin önəmini qeyd edib. T. Məmmədov bildirib ki, Azərbaycan dövləti tərəfindən startapçılara verilən dəstək qeyri-neft sektorunun inkişafı üçün münbit ekosistemin yaradılması deməkdir: "Bu gün qrant müsabiqəsində qalib olan iştirakçılar Azərbaycanda mövcud olan ekosistemdən yararlanacaq və bunun faydasını görəcəklər. Bir zamanlar dövrünün ən məşhur neftçilərini yetişdirən Neft akademiyası hal-hazırda İKT sektorunda öz yerini tutacaq tələbələr yetişdirməklə ölkəmizin qeyri-neft sektoruna öz töhfəsini verir. Bu gün neft sektoru sürətlə İKT sektoruna inteqrasiya edir".

Daha sonra universitetin qrant müsabiqəsində qalib olan "Comfortab" və "Magic Words" layihələrinin təqdimatları keçirilib.

Sonda qrant müsabiqəndə qalib olan bir neçə layihə RYTN-in sertifikatları ilə təmin edilib.

Qeyd edək ki, fondun elan etdiyi son qrant müsabiqəsində 121 layihədən 29-u qalib elan olunaraq, ümumilikdə 395 min manat qrant vəsait ayrılıb.