Dünən Azərbaycan Dövlət Neft və Sənaye Universitetində Azərbaycan Respublikası Müharibə Veteranları və Beynəlmiləlçi Hərbçilər İctimai Birliyi Azərbaycan Respublikası Prezidentinin QHT-lərə Dövlət Dəstəyi Şurasının Maliyyə Dəstəyi ilə “Azərbaycan Respublikası Silahlı Qüvvələrinin hərbi hissələrinin ölkəmizin mənafeyi, ərazi bütövlüyü və müstəqilliyinin təmin edilməsi uğrunda fədakarlığının təbliği” adlı layihəsi çərçivəsində Azərbaycanın Milli Qəhrəmanı Mübariz Ağakərim oğlu İbrahimovun heykəlinin açılışına həsr olunmuş “Qəhrəmanlar ölməz – Vətən bölünməz!” adlı tədbir keçirib.
Tədbir zamanı Azərbaycanın Milli qəhrəmanı Mübariz İbrahimovun layihənin icrası çərçivəsində hazırlanmış heykəlinin açılışı olub.
Azərbaycan Dövlət Neft və Sənaye Universitetinin rektoru, professor Mustafa Babanlı bu əlamətdar gün münasibəti ilə tədbir iştirakçılarını salamladıqdan sonra layihənin rəhbəri, e.o.polkovnik Əzizağa Qəni-zadə Azərbaycanın Milli Qəhrəmanı Mübariz Ağakərim oğlu İbrahimovun həyatı və hərbi fəaliyyəti” adlı məruzə ilə çıxış edib.

Tədbirdə Azərbaycan Respublikası Milli Məclisinin deputatı, Azərbaycan Yazıçılar Birliyinin üzvü, filologiya elmləri namizədi Elmira xanım Axundova, Azərbaycan Dövlət Neft və Sənaye Universitetinin müəllim və tələbə heyəti, Azərbaycan Veteranlar təşkilatının sədri İlham Əliyev, Dəmiryolları Veteranlarının sədri Mehdi Hacıyev, Bakı şəhər Müharibə Əlilləri və Veteranları İctimai Birliyinin sədri Fuad Rzayev və digər ictimaiyyət nümayəndələri iştirak ediblər.

Nuranə Nəcəfova