Sevda Mikayılqızının Mübariz İbrahimovun ailəsinə ünvanladığı məktubun, ümumiyyətlə Azərbaycan cəmiyyətinə, gənclərimizə ünvanlandığı qənaətinə gələrək Butov.az saytının oxucularına təqdim edirik:

AZƏRBAYCANIN MILLI QƏHRƏMANI
MÜBARIZ İBRAHIMOVUN AILƏSINƏ ÜNVANLADIĞIMIZ MƏKTUBDAN
….Mübariz Vətənə məhəbbətdən şeirlər yazmadı, mahnı bəstələmədi, «Lazım gələrsə düşmənlə döyüşə hazırıq!» söyləmədi, pafosla «Vətən, Vətən!» demədi.
O, sadəcə bu Vətənin yolunda canından keçdi! Şəhid oldu! Millətimizin, Xalqımızın Qəhrəmanı oldu.
Tanrının yaratdığı hər kəs üçün gözlə qaş arasında olan ucuz ölümü düşmənə çox baha satmaqla, Mübariz yatmış vicdanları oyatdı, kütləşməkdə olan vətənpərvərlik hisslərinə bülöv çəkdi, düşmənə papaq altında yatan oğlanların qisasının gücünü göstərdi. Elə özümüzə də!
Mübariz öz danılmaz qəhrəmanlığı ilə belə igidləri olan Vətənin basılmazlığını mənfur erməni qəsbkarlarına bir daha anlatdı! Lərzəyə saldı düşmənlərimizi.
Ağakərim Ata! Şamama Ana!
Bilin ki, oğlunuz ölməyib! Düşmənə göz dağı olan uca qaməti, məğrur görkəmi, əzəməti və əzmi ilə ölü­mə qalib gəlib! Nurlu siması, doğma çöhrəsi ilə bizim hər birimizə əzizdən də əziz olan Mübarizimiz öz şərəfli ölü­müylə əbədi ölümsüzlük qazanıb!
İndi «Bu torpağın Nəbisi, Koroğlusu, Babəki var!» sözlərini çox eşitmiş insanların artıq əfsanəsi yox, canlı həqiqəti var - Mübariz adlı həqiqəti!
Həqiqət isə qəhrəmanlıq kimidir - heç vaxt ölmür!
Əsil Azərbaycan Oğlunun nəyə qadir olduğunu əməli ilə sübut edərək, xain düşməni sarsıdan belə qəhrəman oğula görə bir daha qarşınızda baş əyir, Tanrıdan sizə səbr diləyirik.
Böyük hörmətlə,
«Ziya» Nəşriyyat Mərkəzinin
kollektivi adından
Sevda Mikayılqızı