Bu gün Bakı Ağır Cinayətlər Məhkəməsində ötən il mayın 19-da Binəqədidə baş verən yanğına səbəb olmaqda təqsirləndirilən Miryusif Mahmudov və digərlərinin cinayət işi üzrə məhkəmə prosesi davam etdirilib.

Butov.az “Qafqazinfo”-ya istinadən xəbər verir ki, proses şahidlərin ifadələri ilə davam etdirilib.

M.Mahmudovun vəkili İlhamə Həsənova deyib ki, onların vəsatəti əsasında çağırılan əlavə şahidlər dindirilsin.

Dövlət ittihamçısı bildirib ki, əsas şahidlər və zərərçəkənlərin dindirilməsi başa çatandan sonra əlavə şahidlərin dindirilməsinə baxıla bilər.

Prokuror vəsatətə münasibət bildirərək deyib ki, əlavə şahidlərin çağırılmasına ehtiyac yoxdur: "Əsas şahidlərin ifadələri kifayət edir. O şəxslər Miryusif Mahmudovun işçiləridir, hansı məzmunda ifadə verəcəkləri indidən bəllidir".

Məhkəmə kollegiyası vəsatəti təmin edib.

Əlavə şahid Mansur Hüseynov deyib ki, "Global Construction"da baş mühəndis işləyib: "Bizim şirkət şifariş qəbul edərkən direktor İlqar Vəliyev görüşlər keçirib, razılaşdırırdı. Mən inşaat rəhbərim Toğrul Məmmədovdan tapşırıq alırdım. Təsisçi Miryusif Mahmudov bu işlərə müdaxilə etmirdi. Poliuretan məhsulun hansı formada vurulması ilə bağlı qayda yoxdur. Bəzi binalarda karkaz qurulurdu, bəzilərində yox".

Hakim bildirib ki, iş üzrə dindirilməyən bir şəxs qalıb, o da xaricdədir: "Həmin şəxsin istintaqa ifadəsini elan edərik".