2017-ci il aprelin 4-də saat 1100-da Azərbaycan Hərb Tarixi Muzeyində Azərbaycan ordusunun 2016-cı ilin aprelində cəbhədə düşmən üzərində qazandığı qələbəyə həsr olunmuş “Dördgünlük müharibə: başlanma səbəbləri və nəticələri” mövzusunda dəyirmi masa keçirilmişdir.

Dəyirmi masada Aprel döyüşlərinə həsr olunmuş Müdafiə Nazirliyinin Sənədli və Tədris Filmləri Kinostudiyası tərəfindən hazırlanmış sənədli film və mövzu ilə bağlı sərgi nümayiş olunmuşdur.

Dəyirmi masa ətrafında “Aprel döyüşləri Azərbaycan ordusunun yeni parlaq qələbəsidir”, “Aprel döyüşləri ərəfəsində məkirli erməni planları”, “Aprel döyüşləri xarici mətbuat səhifələrində”, “Aprel döyüşlərinin başlıca nəticələri” adlı mövzular ətrafında məruzələr dinlənilmiş və müzakirələr aparılmışdır.

Dəyirmi masada Müdafiə nazirinin şəxsi heyət üzrə müavini - Şəxsi Heyət Baş İdarəsinin rəisi, Mənəvi-Psixoloji Hazırlıq və İctimaiyyətlə Əlaqələr İdarəsinin rəisi, həmçinin H.Əliyev adına ali hərbi məktəblərin, hərbi hissələrin, Hərbi Akademiyanın, veteran təşkilatlarının, Qarabağ müharibəsi veteranlarının və digər idarə - müəssisələrin nümayəndələri iştirak etmişdir.

Müzakirələr zamanı muzey rəisi e.o.polkovnik Əzizağa Qəni-zadənin, Aprel döyüşlərinin şəhidi, Azərbaycanın Milli Qəhrəmanı Murad Mirzəyevin həyat yoldaşı Fizzə xanım Mirzəyevanın, muzeyin ekspozisiya hissəsinin rəisi Şəlala Hüseyovanın, muzeyin baş elmi işçisi tarix üzrə fəlsəfə doktoru Vahid İsmayılovun, Aprel şəhidi polkovnik-leytenant Sənan Axundovun həyat yoldaşı Nəcibə xanım Axundovanın və oğlu Tahir Axundovun, Aprel döyüşlərinin iştirakçısı mayor Mirzə Osmanovun, kapitan Elmir Abbasovun və digər tədbir iştirakçıların çıxışları dinlənilmişdir.

Tədbirdə Milli Qəhrəman Murad Mirzəyevin həyat yoldaşı Fizzə xanım Mirzəyeva zabitin hərbi geyim formasını muzeyə təqdim etdi.

Dəyirmi masanın bədii hissəsində Silahlı Qüvvələrin “Mahnı və rəqs ansanblı”nın çıxışları olmuşdur.