Azərbaycan Hərb Tarixi Muzeyində 1993-cü ildə döyüşlər zamanı Silahlı Qüvvələrin Kəlbəcər rayonunun 60 minlik mülki əhalinin soyqrımdan xilas edilməsi və bu döyüşlərdə həlak olmuş 400 hərbçinin xatirəsinə həsr olunmuş anım tədbiri keçirilib.

Muzeyin rəisi ehtiyatda olan polkovnik Əzizağa Qəni-zadə qeyd etdi ki, aprelin 2-dən başlayaraq Ermənistan Azərbaycana qarşı növbəti silahlı təxribat törətmişdir. Ermənistanın təxribatçı qrupları təmas xəttində yerləşən mövqelərimizə hücum çəkmiş, yaşayış məntəqələrini atəşə tutmuşdur. Bu təxribata cavab olaraq Silahlı Qüvvələrimiz tərəfindən düşmənə layiqli cavab verilmiş, onlara sarsıdıcı zərbə endirilmiş və yerinə oturdulmuşdur. Silahlı Qüvvələrimiz təxribatın qarşısını almaqla yanaşı bir sıra əlverişli hərbi mövqeləri də tutmuşdur.Düşmən üzərində böyük hərbi qələbənin başlanğıcını münasibətlə Ordumuzu, Azərbaycan xalqını təbrik etdiyini, uğurlarımızın axarlı olmasını arzuladı. Bundan başqa muzey rəisi Kəlbəcərdə gedən döyüşlərdə Milli Ordumuzun göstərdiyi şücaət və qəhrəmanlıqdan da bəhs etdi.

Düşmən martın 26-da heç bir müdafiə qüvvəsi olmayan Kəlbəcər rayonunu işğal etmək üçün Ağdərə rayonundan 3, Laçın rayonundan 1, Ermənistan-Azərbaycan dövlət sərhədindən isə 2 istiqamətdən ümumi sayı 6 alaydan ibarət olan qüvvə ilə hücuma keçdi. Həmin ağır dəqiqələrdə Kəlbəcər əhalisinin köməyinə qonşu Laçın rayonunun dəhlizi uğrunda döyüşən briqada özünü çatdırdı. Əgər düşmənin 6 alayı 6 müxtəlif istiqamətlərdən deyil yalnız Laçın rayonundan hücuma keçsəydi, döyüş təcrübəsi olan motoatıcı briqadamızın əsas qüvvələri ilə rastlaşıb çoxlu itkilər verər və heç vaxt Kəlbəcər rayonunun işğalına müvəffəq ola bilməzdi.

Gərgin döyüşlərdə milli ordumuzun əsgər və zabitləri, hətta təlim keçməyən vətənpərvərlər əzmkarlıqla vuruşaraq son damla qanlarını belə əsigəməyərək özlərindən 15 qat üstün olan düşmən qüvvələri qarşısında mətanətlə dayanırdılar.

Tədbirdə Milli Məclisin deputatlarının, Müdafiə Nazirliyinin, H.Əliyev adına ali hərbi məktəblərin, hərbi hissələrin, Hərbi Akademiyanın, veteran təşkilatlarının, Qarabağ müharibəsi veteranlarının və digər idarə- müəssisələri, AMEA-nın müxbir üzvü Z. Bünyadov adına Şərqşünaslıq İnstitutunun direktoru, Millət Vəkili Gövhər Baxşəliyeva, İnsan Hüquqları Komitəsinin üzvü eyni zamanda Milli Qəhrəman Şirin Mirzəyevin həyat yoldaşı Millət Vəkili Flora Qasımova, Kəlbəcər rayon İcra Hakimiyyətinin Hüquq Şöbəsinin rəisi Faiq Mehdiyev, Döyüş Hazırlığı İdarəsinin, Müdafiə Nazirliyi Hüquq İdarəsinin, Silahlı Qüvvələrin Hərbi Akademiyasının, Zabitlər Konfederasıyasının, Rəssamlıq Akademiyası və İncəsənət Gimnaziyasının və digər idarə və müəsisələrdən nümayəndələri iştirak etmişdir.

Tədbirdə Silahlı Qüvvələrin Hərbi hissələrinin Qarabağ müharibəsində göstərdiyi şücaət və qəhrəmanlıqlara həsr olunmuş “MÜHASİRƏ” adlı tarixi- xroniki qısametrajlı sənədli film nümayiş olunmuş, muzey rəisi e.o.polkovnik Əzizağa Qəni-zadənin, muzeyin tərcüməçi- bələdçisi, layihənin rəhbəri Türkan Novruzovanın, muzeyin tədqiqatçı- elmi işçisi Nuranə Nəcəfovanın, Millət Vəkillərinin və digər tədbir iştirakçıların çıxışları dinlənilmişdir. Onu da qeyd edim ki, tədbirdə İncəsənət Gimnaziyası şagirdlərinin vətənpərvərlik mövzusunda çəkdikləri rəsm əsərləri sərgilənmiş, gənc rəssamlar fəxri fərman və təşəkkürnamə ilə təltif olunmuşdur.

Nuranə Nəcəfova