Bu gün Azərbaycan Hərb Tarixi Muzeyində Xocalı soyqırımının 24-cü ildönümünə həsr olunmuş “Qan yaddaşımız Xocalı” adlı anım tədbiri keçirilib.

Xocalı faciəsi iki yüz ildən çox müddətdə davakar erməni millətçiləri tərəfindən xalqımıza qarşı həyata keçirilən etnik təmizləmə siyasətinin qanlı səhifəsidir. Məhz 24 il öncə 1992-ci il fevralın 25-dən 26-na keçən gecə Ermənistan Respublikasının hərbi birləşmələri, Dağlıq Qarabağdakı terrorçu qruplaşmalar və keçmiş imperiya ordusunun 23-cü diviziyasının Xankəndində yerləşən 366-cı motoatıcı alayı ilə birləşərək Xocalıda kütləvi və amansız soyqırımı aktı həyata keçirdi. Bu misli görünməmiş faciə yalnız Azərbaycan xalqına deyil, bütövlükdə insanlığa və bəşəriyyətə qarşı törədilmiş cinayət idi.

Bu soyqırımı nəticəsində 63-ü uşaq, 106-sı qadın, 70-i qoca olmaqla 613 nəfər qətlə yetirilmiş, 8 ailə tamamilə məhv edilmiş, 25 uşaq hər iki valideyinini, 130 uşaq valideyinlərindən birini itirmişdir. Düşmən gülləsinə tuş gəlib yaralanan 487 nəfərdən 76-sı uşaq idi. 1275 Xocalı sakini əsir, 150-si isə itkin düşmüşdür. Dövlətin və əhalinin əmlakına 1 aprel 1992-ci il tarixinə olan qiymətlərlə 5 mlrd rubl dəyərində ziyan vurulmuşdur.

Tədbiri giriş sözü ilə açan muzeyin rəisi e.o.polovnik Əzizağa Qəni-zadə qeyd etmişdir ki, məhz həmin gecə Xocalıya 4 tərəfdən dəhşətli hücum başladı. Hücumda Ermənistan Respublikasının hərbi birləşmələri, Dağlıq Qarabağdakı terrorçu qruplaşmalar və keçmiş imperiya ordusunun 23-cü diviziyasının Xankəndində yerləşən 366-cı motoatıcı alayı iştirak edirdi.
Tədbirdə Müdafiə Nazirliyinin Döyüş hazırlığı İdarəsindən, Hüquq İdarəsindən, H.Əliyev adına ali hərbi məktəblərdən, hərbi hissələrdən, Hərbi Akademiyadan, veteran təşkilatlarından, Hərb Oyunları Mərkəzindən, Təlim- Tədris Mərkəzindən ,şəhər muzeyləri və digər idarə - müəssisələrindən nümayəndələr iştirak etmişdir.
Tədbirdə Müdafiə Nazirliyi Sənədli filmlər kinostudiyası tərəfindən hazırlanmış Xocalı soyqırımına həsr olunmuş " Xocalı əsrin faciəsi" adlı 15 dəqiqəlik sənədli filmin təqdimatı olmuşdur.

Tədbirdə Azərbaycan Hərb Tarixi Muzeyinin Ekspozisiya hissəsinin rəisi, tədbirin layihə rəhbəri Şəlalə Hüseynovanın və digər natiqlərin çıxışları dinlənilmişdir.