Azərbaycan Hərb Tarixi Muzeyində Kəlbəcər rayonunun 1993-cü ildə işğalına həsr olunmuş tədbir keçirilib.
AHTM-in konfrans zalında keçirilən tədbirdə əvvəlcə Dövlət Himni səsləndirilmiş, Kəlbəcər döyüşlərində həlak olan şəhidlərin ruhu sükütla yad edilmişdir. Tədbiri muzeyin rəisi ehtiyatda olan polkovnik Ə.Qəni-zadə giriş sözü ilə açaraq 1993-cü ildə Kəlbəcər rayonunda baş vermiş proseslərdən, Kəlbəcər əhalisinin düşmənlərə qarşı mübarizə aparmasından və Azərbaycan Milli Ordusunun döyüşçülərinin 60min əhalini kütləvi qırğından xilas etməsindən danışmışdır. Daha sonra muzeyin bələdçi-tərcüməçisi Türkan Novruzova “Kəlbəcər-çağdaş Qarabağ müharibəsinin qəhrəman qalası”, mövzusunda məruzə etmişdir.
Muzeyin rəisi Ə.Qəni-zadənin məruzəsi bilavasitə Kəlbəcər döyüşlərinin konkret təhlilinə həsr edilmişdir. Bu məruzədə tərəflərin qüvvələri qiymətləndirilir, döyüşlərin gedişi konkret və sistemli şəkildə işıqlandırılır, bu əməliyyatın hərbi-siyasi mahiiyyəti açıqlanır. Muzey rəisi onu da vurğuladı ki, biz döyüşü uduzmuşuq, müharibəni uduzmamışıq. Bu gün bizim çox güclü ordumuz var. Ali Baş Komandanın əmri ilə torpaqlarımızı tez bir zamanda geri alacağıq!
Tədbirdə Azərbaycan Kikboksinq Federasiyasının prezidenti MDB Müdafiə və Təhlükəsizlik Komitəsinin sədr müavini, Milli Məclisin Təhlükəsizlik və Müdafiə məsələləri daimi komissiyasının üzvü Adil Əliyevin, tədbirin layihə rəhbəri Nuranə Nəcəfovanın, Kəlbəcərdə döyüşmüş 701-ci briqadanın döyüşçülərinin, müharibə veteranı Bəhrəm Ləzimovun və digər qonaqların çıxışları dinlənilmişdir.
Tədbirdə Kəlbəcərin işğalı ilə bağlı 15 dəqiqəlik sənədli film izlənilmişdir.
Nuranə Nəcəfova