10-10-2025, 23:19
Pakistan Taliban liderini öldürüb?
“Təhrik-e Taliban Pakistan” (TTP) qruplaşmasının lideri Nur Vəli Mehsud Əfqanıstanın paytaxtı Kabilə endirilən hava zərbələri nəticəsində zərərsizləşdirilib.
Bu barədə Pakistan mediası və xarici mənbələr yazıb.
Məlumata görə, Pakistan Hərbi Hava Qüvvələrinin oktyabrın 9-da axşam saatlarında Kabildə həyata keçirdiyi zərbə zamanı Abdul Haq meydanı yaxınlığında yerləşən “Land Cruiser” markalı avtomobil vurulub. Zərbədən sonra avtomobil alışıb və hadisə yerinin üzərində pilotsuz uçuş aparatı müşahidə olunub.
Lakin TTP-yə yaxın mənbələr yayılan məlumatı təkzib edib, Nur Vəli Mehsudun səsini əks etdirdiyi iddia olunan audioyazı paylaşıblar. Həmin səsdə Mehsud öldürülməsi barədə xəbərləri “propaqanda” adlandırır.
Əfqanıstan “Taliban” hərəkatının nümayəndəsi Zabihulla Mücahid partlayış faktını təsdiqləyib, lakin hadisənin təfərrüatları barədə açıqlama verməyib.
Pakistan müdafiə naziri Xavaca Asif Milli Assambleyada çıxışı zamanı bildirib ki, İslamabadın səbr kasası daşmaq üzrədir: “Kim terrorçuları gizlədirsə, cavab verməli olacaq. Əfqanıstan hakimiyyəti anlamalıdır ki, onların ərazisindən gələn terrorizm artıq qəbuledilməzdir.”
Nazir əlavə edib ki, gələn həftə Əfqanıstana rəsmi nümayəndə heyəti göndərilməsi planlaşdırılır və federal, həmçinin regional hakimiyyət orqanları bu məsələdə ordu ilə birlikdə hərəkət etməlidirlər.
10-10-2025, 23:13
Azərbaycan millisi məğlub oldu
21 yaşadək futbolçulardan ibarət Azərbaycan milli komandası Avropa çempionatının seçmə mərhələsi çərçivəsində üçüncü oyununa çıxıb.
B qrupunda yer alan millimiz Çexiyanın müvafiq yaş qrupundan ibarət komandası ilə qarşılaşıb. Karvina şəhər stadionunda keçirilən görüş meydan sahiblərinin 5:0 hesablı qələbəsi ilə yekunlaşıb.
Qeyd edək ki, U-21 millimiz qrupda dördüncü görüşünü oktyabrın 14-də Bakıda Şotlandiya yığmasına qarşı keçirəcək.
10-10-2025, 22:53
Azərbaycan şahmatçıları Ermənistana qalib gəldilər
Gürcüstanın Batumi şəhərində şahmat üzrə komandalar arasında Avropa çempionatında 6-cı turun partiyaları keçirilib
Hesabat turunda kişi və qadınlardan ibarət Azərbaycan komandaları Ermənistan şahmatçılarıyla qarşılaşıb.
Kişi şahmatçılardan ibarət Azərbaycan komandası Ermənistana 2.5-1.5 hesabı ilə qalib gəlib. 6-cı turda Şəhriyar Məmmədyarov görüşü qalib kimi başa vurub. Rauf Məmmədov, Eltac Səfərli və Aydın Süleymanlı heç-heçəyə oynayıb. Bu qələbədən sonra Azərbaycan komandasının aktivində 9 xal var.
Qadın şahmatçılardan ibarət komandamız da 6-cı turda Ermənistan şahmatçılarını üstələyib. Ülviyyə Fətəliyeva və Gülnar Məmmədova rəqibi məğlub edib, Xanım Balacayeva və Gövhər Beydullayeva partiyanı heç-heçə ilə bitirib. 3-1 hesablı qələbədən sonra xanım şahmatçıların xalı 8-ə çatıb.
Qeyd edək ki, oktyabrın 11-i Avropa çempionatında istirahət günüdür. Qitə çempionatına oktyabrın 14-də yekun vurulacaq.
10-10-2025, 22:38
Fidandan Qəbələ görüşü barədə vacib açıqlama
Türk Dünyasında yeni bir həmrəylik dövrü inşa etmişik
Bu sözləri Türkiyənin xarici işlər naziri Hakan Fidan deyib.
O, üç gün əvvəl Türk Dövlətləri Təşkilatının (TDT) 12-ci Zirvə Görüşü çərçivəsində Azərbaycanda səfərdə olduğunu xatırladaraq, Türkiyə Prezidenti Rəcəb Tayyib Ərdoğanın Türk Dünyasının inteqrasiyasını dərinləşdirmək istiqamətindəki iradəsini ən yüksək səviyyədə ifadə etdiyini vurğulayıb.
Nazir əlavə edib ki, bu mövqe Şimali Kipr Türk Cümhuriyyətinin də iştirakı ilə bir daha təsdiqlənib. Onun sözlərinə görə, TDT artıq institusional inkişafını böyük ölçüdə tamamlayıb, konkret layihələrə fokuslanıb, kommunikasiya istiqamətində mühüm addımlar atıb və iqtisadi əməkdaşlıq ölçüsünü daha da gücləndirib.
Fidan həmçinin Türk Dünyasında ortaq əlifbaya keçid istiqamətində atılan addımların əhəmiyyətli olduğunu bildirib.
10-10-2025, 20:31
Rəsmi Bakıdan Qəzzadakı atəşkəsə REAKSİYA
Qəzzada atəşkəsin təmin olunması, girov və məhbusların azad edilməsi, humanitar yardımın Qəzzaya maneəsiz şəkildə çatdırılması və yenidənqurma işlərinin aparılması istiqamətində əldə edilmiş razılaşmanı alqışlayırıq.
Bu barədə Xarici İşlər Nazirliyinin “X” hesabındakı paylaşımında bildirilib.
“Ümid edirik ki, razılaşmanın bütün mərhələləri lazımı şəkildə həyata keçiriləcək və regionda ədalətli və davamlı sülhün təmin olunması üçün səylər artırılacaq. Bu nəticənin əldə olunmasına vasitəçilik edən Amerika Birləşmiş Ştatları, Türkiyə, Qətər və Misirin səylərini təqdir edirik”, – deyə paylaşımda qeyd olunub.
10-10-2025, 19:40
Putin Trampın xanımının məktubuna cavab verib
ABŞ-ın birinci xanımı Melaniya Tramp Rusiya Prezidenti Vladimir Putinin onun məktubuna cavab verdiyini açıqlayıb.
Bu barədə o, oktyabrın 10-da Ağ Evdə çıxışı zamanı bildirib.
Melaniya Trampın sözlərinə görə, məktub Ukraynadan Rusiyaya aparılan uşaqlarla bağlı olub. O deyib ki, Vladimir Putin məktubuna yazılı şəkildə cavab verib və “birbaşa əməkdaşlığa hazır olduğunu” bildirib:
“Prezident Putin məktubuma cavabında həm Ukraynadan olan uşaqların Rusiyada yerləşdirilməsi barədə ətraflı məlumat verdi, həm də bu mövzuda mənimlə birbaşa işləmək istədiyini bildirdi.”
Birinci xanım vurğulayıb ki, son üç ay ərzində onun nümayəndələri ilə Rusiya tərəfi arasında bu məsələ üzrə daimi əlaqə saxlanılıb və bir neçə görüş keçirilib.
“Bizim nümayəndəmiz Putinin komandası ilə birbaşa işləyərək Ukrayna və Rusiya arasındakı ailələrin birləşdirilməsini təmin edib. Son 24 saatda səkkiz uşaq ailələri ilə yenidən görüşüb. Onlardan üçü döyüşlər nəticəsində ailələrindən ayrı düşmüşdü, daha beş nəfər isə sərhədin o tayında yaxınlarından təcrid olunmuşdu. Onların arasında kiçik bir qız da var idi, o, artıq Rusiyada ailəsi ilə görüşüb,” – deyə Melaniya Tramp əlavə edib.
ABŞ-ın birinci xanımı bildirib ki, Rusiya tərəfi “hazırkı vəziyyətlə bağlı obyektiv və ətraflı məlumat verməyə hazır olduğunu nümayiş etdirib”.
10-10-2025, 19:25
10 gündə 3 böyük sammit - Hikmət Hacıyevdən paylaşım
Prezident İlham Əliyevin 10 gün ərzində üç sammitdə iştirakı Azərbaycanın çoxşaxəli və çoxregional xarici siyasətinin təzahürüdür.
Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev "X" sosial şəbəkəsində yazıb.
"1-2 oktyabr - Avropa Siyasi Birliyinin sammiti, Kopenhagen. Aİ və digər tərəfdaşlarla görüşlər və müzakirələr; 6-7 oktyabr - Qəbələdə Türk Dövlətləri Təşkilatının sammiti. Türk dünyasının həmrəyliyi və birliyi; 9-10 oktyabr - Düşənbədə MDB Sammiti", - Prezidentin köməkçisi xatırladıb.
10-10-2025, 17:19
Nəzrinin ölümünə görə həbs olunan həkimə hökm oxundu
Bakıda burun əməliyyatından sonra komaya düşən Nəzrin Mansurlunun ölümü faktı üzrə həbs olunan lor-cərrah Sənan Mehdiyevin cinayət işi üzrə sonuncu məhkəmə prosesi keçirilib.
Bu gün Nəsimi rayon Məhkəməsində hakim Solmaz Mustafayevanın sədrliyi ilə keçirilən prosesdə hökm oxunub.
Hökmə əsasən, təqsirləndirilən Sənan Mehdiyev 2 il müddətə azadlıqdan məhrum edilib. O, cəzasını məntəqə tipli cəzaçəkmə müəssisəsində çəkəcək.
Ötən prosesdə dövlət ittihamçısı təqsirləndirilən şəxsin 4 il 9 ay müddətə azadlıqdan məhrum edilməsini istəyib.
Qeyd edək ki, bu il yanvarın 12-də 1995-ci il təvəllüdlü Nəzrin Mansurlunun rinoplastika əməliyyatından sonra vəziyyətinin kəskin ağırlaşması səbəbindən yerləşdirildiyi xəstəxanada ölməsi faktı üzrə Nəsimi rayon prokurorluğunda başlanmış cinayət işinin istintaqı tamamlanıb.
İstintaqla həkim-otorinolarinqoloq Sənan Mehdiyevin yanvarın 3-də Nəzrin Mansurlunun üzərində rinoseptoplastika cərrahi-əməliyyatını qüsurlu icra etməsi səbəbindən sonuncunun ölümünə səbəb olmasına əsaslı şübhələr müəyyən edilib.
Toplanmış sübutlar əsasında Sənan Mehdiyevə Cinayət Məcəlləsinin 314.2-ci (ehtiyatsızlıqdan zərərçəkmiş şəxsin ölümünə səbəb olan səhlənkarlıq) maddəsilə ittiham elan edilməklə cinayət işi baxılması üçün aidiyyəti üzrə rayon məhkəməsinə göndərilib. Təqsirləndirilən şəxs barəsində həbs qətimkan tədbiri seçilib.
10-10-2025, 17:06
Tramp administrasiyası Nobel qərarından qəzəblidir
Nobel Komitəsi siyasəti sülhdən üstün tutur.
Bunu ABŞ Prezidentinin mətbuat katibi və kommunikasiya direktoru Stiven Çun bildirib.
“Prezident Donald Tramp dünyada sülh sazişləri imzalamağa, müharibələri dayandırmağa və insan həyatını xilas etməyə davam edəcək. Nobel Komitəsi isə açıq şəkildə göstərdi ki, onlar üçün siyasət sülhdən daha vacibdir”, - deyə Çun sosial şəbəkədə yazıb.
Bu açıqlama Nobel Komitəsinin 2025-ci il Sülh Mükafatını Trampa təqdim etməməsindən sonra səsləndirilib.
"The New York Post" qəzeti isə Prezident Administrasiyasındakı mənbələrə istinadən yazır ki, Trampın 2026-cı ildə Nobel Sülh Mükafatını almaq şansı daha yüksək olacaq. Mənbənin sözlərinə görə, 2025-ci ildə bu mükafatın ona verilməsi gözlənilməz addım olardı, lakin onun son təşəbbüsləri, xüsusən İsraillə HƏMAS arasında əldə olunan atəşkəs beynəlxalq səviyyədə diqqət doğurub.
Qəzet, həmçinin xatırladır ki, Trampın tərəfdarları onun prezidentliyə qayıdışından sonra sülh prosesinə verdiyi töhfəni xüsusi vurğulayıblar, bəzi xarici liderlər isə onun Nobel mükafatına namizədliyini irəli sürüblər.
Bununla yanaşı, Trampın tənqidçiləri onun İrana qarşı hərbi zərbə əmrini, Qrenlandiyanın “birləşdirilməsi” ilə bağlı bəyanatlarını və Müdafiə Nazirliyinin adını “Hərbi Nazirlik” kimi dəyişdirməsini sülh prinsiplərinə zidd addımlar kimi qiymətləndiriblər.
10-10-2025, 17:00
İrəvanla Bakı “3+3” formatı ilə bağlı razılığa gəlməlidir
Rusiya 2025-ci ilin sonuna kimi “3+3” regional məsləhət platformasının dördüncü nazirlər görüşünün keçirilməsini dəstəkləyir. Hazırda onun işlənib hazırlanması istiqamətində işlər aparılır.
Bunu Rusiya Federasiyasının Ermənistandakı fövqəladə və səlahiyyətli səfiri Sergey Kopırkin Rusiya-Ermənistan Universitetinin (RAU) tələbələri ilə görüşündə deyib.
"Biz hazırda Ermənistanla Azərbaycan arasında əlaqə saxlayırıq, çünki burada prioritet məsələ var. Həm Ermənistan, həm də Azərbaycan tərəfi belə bir görüşə ev sahibliyi etməyə hazırdır. Onlar prioritet sırasını razılaşdırmalıdırlar və biz də təbii ki, hər cür köməklik göstəririk", - diplomat bildirib.
Səfirin sözlərinə görə, Türkiyə və İran tərəfləri ilə əlaqə saxlayan platformanın bütün iştirakçıları hesab edirlər ki, bu, faydalı və aktual formatdır və region dövlətlərinin özləri bölgənin problemlərinin həllində əsas rol oynamalıdırlar.
"Bu, bizim prinsipial mövqeyimizdir və tərəfdaşlarımız da bunu bölüşürlər. Əlbəttə, üçüncü ölkələrin iştirakı dəyərli ola bilər, lakin bu, reallıqların və regional oyunçuların özlərinin maraqlarının dərk edilməsinə əsaslanmalıdır", - diplomat bildirib.
O, həmçinin qeyd edib ki, Ermənistan-Azərbaycan münasibətlərinin normallaşması və ya Ermənistan-Amerika dialoqu çərçivəsində müzakirə olunan bir çox məsələlər istər-istəməz digər qonşu dövlətlərin maraqlarına toxunur və bu səbəbdən də “3+3” platforması çoxtərəfli dialoq üçün obyektiv axtarılan mexanizmə çevrilir.
Kopirkin qeyd edib ki, format işləyir, artıq üç görüş keçirilib. Tiflisin iştirakı ilə bağlı o qeyd edib ki, Gürcüstan əvvəlcə ekspertlər səviyyəsində maraq göstərib və tədbirlərdən birində iştirak edib, lakin sonradan uzaqlaşıb. Buna baxmayaraq, Rusiya səfiri vurğulayıb ki, platformanın bütün iştirakçıları Gürcüstan üçün qapının açıq qalması fikrində yekdildir.
Əvvəllər bildirilmişdi ki, “3+3” məsləhətçi regional platformasının növbəti görüşlərinin tərəflərin özlərinin müəyyən edəcəyi ardıcıllıqla İrəvanda və Bakıda keçirilməsi planlaşdırılır.
Xatırladaq ki, “3+3” regional məsləhət platformasının sonuncu iclası 2024-cü ilin oktyabrında İstanbulda baş tutub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!