Hikmət Hacızadə: “Baş verən hücuma görə, Rusiya hökuməti cavabdehdir”

Bir neçə gün öncə Azərbaycan səfirliyinin konsulluq işçisinin taksi ilə evə gedərkən sürücü tərəfindən qəddarlıqla döyüldüyü barədə məlumat vermişdik. Maraqlıdır, ümumiyyətlə səfirlik əməkdaşının həyatına kim cavabdehlik daşıyır? Ona hücum olunarsa, məsuliyyət kimin üzərinə düşür?

Butov.az xəbər verir ki, FaktXeber.com məsələ ilə əlaqədar Azərbaycanın Rusiyadakı keçmiş səfiri Hikmət Hacızadədən münasibət öyrənib.

Politoloqun sözlərinə görə, əgər o sadə bir işçidirsə və cangüdəni yoxdursa, onun təhlükəsizliyini qorumaq olduğu ölkənin hüquq mühafizə orqanlarının məsuliyyətindədir: «Sözügedən halda, baş verən hücuma görə, Rusiya hökuməti cavabdehdir».

Bəs görəsən Hikmət Hacızadənin Rusiyada səfir olduğu müddətdə belə insidentlər olubmu? Axı həmin zamanlar iki ölkə arasında münasibətlər o qədər də isti deyildi?

Politoloq özünün səfir olduğu müddətdə belə hadisələrin yaşanmadığını dedi: «Emil Məhərrəmovun başına gələnlər xuliqanlıq hadisəsidir. Hansısa bir şəhərdə həmişə mərdimazarla rastlaşmaq olar. «Qarabala» olduğu üçün də hücum edə bilərlər. Mənim vaxtımda olmayıb. Çünki həmin vaxt postsovet məkanında indiki kimi şizofreniya olmayıb, indi çoxalıb».

Hikmət Hacızadə səfir olduğu dövrlərdə Azərbaycana münasibətə gəldikdə isə həmin vaxtlarda Moskva hökumətinin və cəmiyyətinin daha çox ermənipərəst olduğunu xatırlatdı: «Azərbaycana ənənəvi olaraq ya müsəlmanıq, ya türkük, ya «qarayıq», ona görə ermənilərlə münasibətdə yanaşma isti deyildi. Amma belə açıq hücumlara keçmirdilər. Bir az nəzakət var idi, hörmət saxlayırdılar. Amma sonra çox şey dəyişdi, dəlilər keçdilər qabağa, ağıllılar köçdü ölkədən, indi dəlixanadır oralar».

Xatırladaq ki, aprelin 15-dən 16-na keçən gecə Azərbaycan səfirliyinin konsulluq şöbəsinin müdiri Emil Məhərrəmov taksi ilə evə gedərkən sürücü tərəfindən qəddarlıqla döyülüb. O, təcili yardım maşını ilə şəhər xəstəxanalarından birinə çatdırılıb, ona orada təxirəsalınmaz tibbi yardım göstərilib.

İnsidentlə əlaqədar səfirlik hadisənin səbəblərini araşdırmağa çalışır. Xəsarət alan E. Məhərrəmov isə hüquq-mühafizə orqanlarına müraciət edib.