EV TİKİN, EV YIXMAYIN

Bu gün Beynəlxalq Mətbuat Mərkəzində bir qrup Qeyri Hökumət Təşkilatı rəhbərləri tərəfindən Azərbaycan Respublikasının Prezidenti İlham Əliyev cənablarına müraciət qəbul olunub.
Müraciətdə deyilir ki, oktyabrın 2-də gecə saat 3-də hərbi geyimli naməlum şəxslər Laçın rayonundan məcburi köçkün, yazıçı-publisist, Azərbaycanın İşğal olunmuş Ərazilərindəki Tarix və Mədəniyyət Abidələrini Müdafiə Təşkilatı İctimai Birliyinin sədri, Soyqırım və Terror Əleyhdarları QHT Koalisiyasının rəhbəri Faiq İsmayılıovun Buzovna qəsəbəsi, Zuğulba prospekti-61 ünvanda yerləşən yaşayış evini heç bir izahat vermədən, hüquqi sənəd təqdim etmədən söküblər. Bu hadisədən mənəvi zərbə alan ailənin qadın üzvləri hal-hazırda şok vəziyyətində həkim nəzarəti altında müalicə alırlar.
Dağıntıdan sonra ailənin 6 nəfərlik üzvü – ata, ana, iki oğul, gəlin və nəvə bir otağa sığınmaq məcburiyyətində qalıblar ki, bu da nə qanuna, nə dinə, nə də əxlaqa uyğundur. Məqsədli şəkildə bu cür neqativ halların yaradılması və ölkə ziyalılarının, elm adamlarının hədəf seçilməsi Azərbaycan dövlətçiliyi əleyhinə yönəlmiş hərəkət kimi qiymətləndirilməlidir.
Müraciəti imzalayanlar əminliklə bildiriblər ki, ölkə başçısının qətiyyətli mövqeyi nəticəsində Faiq İsmayılovun pozulmuş hüquqları bərpa olunacaq, Azərbaycanda bu cür neqativ halların qarşısı birdəfəlik alınacaq, möhtəkirlər və işbazlar cəzalandırılacaq. Gələcəkdə ölkə vətəndaşları bir daha belə hallarla qarşılaşmayacaqlar.
Biz isə dövlət məmurlarını insanları incitməməyə çağırırıq. Xatırladırıq ki, ev yıxanları tarix boyu lənətləyiblər. Həmişə xeyirxahlara “Allah evini tiksin!”, bədxahlara “Allah evini yıxsın!” deyiblər. Ev tikin, ev yıxmayın. Unutmayın ki, evini başına uçurduğunuz insanların ahı bir gün sizi tutacaq. Onu da yaddan çıxarmayın ki, məmurun yıxdığı ev Allahın köməyi ilə nə vaxtsa yenidən tikiləcək, amma Allahın yıxdığı evi heç bir məmur tikə bilməz. 
Arif MƏMMƏDLİ