Bakı Beynəlxalq Multikulturalizm Mərkəzi (BBMM) fevralın 13-20-də IV Beynəlxalq Multikulturalizm qış məktəbi təşkil edəcək.
Butov.az xəbər verir ki, Mərkəzin mətbuat xidmətindən "Report"a verilən məlumata görə, qış məktəbi Azərbaycan Respublikasının Prezidenti yanında Bilik Fondu ilə birgə “Multikulturalizm Azərbaycanda həyat tərzi kimi: İslam həmrəyliyi bizə nə verir?” devizi altında Bakı şəhəri və Şəki, Oğuz, Qəbələ, Qax rayonlarında olacaq.
Qış məktəbinə hazırlıq işləri ilə bağlı yekun müzakirə iclası keçirilib.
Millətlərarası, multikulturalizm və dini məsələlər üzrə Dövlət müşaviri, BBMM-in Himayəçilik Şurasının sədri, akademik Kamal Abdullayev bildirib ki, bu il Multikulturalizm Mərkəzi növbəti beynəlxalq multikulturalizm məktəbini “İslam həmrəyliyi bizə nə verir?” devizi ilə həyata keçirəcək: "Beynəlxalq multikulturalizm məktəbləri vasitəsilə Azərbaycana olan maraq sevgiyə çevrilir. III Beynəlxalq multikulturalizm məktəbinin xarici ölkələrdən olan iştirakçılarının təşəbbüsü ilə yaradılan “Azərbaycanın Gənc Dostları” Beynəlxalq Klubu məhz ölkəmizə olan sevginin təzahürüdür. Hazırda Klubun 200-dək üzvü var və onlar dünyanın müxtəlif ölkələrində Azərbaycan həqiqətlərinin müdafiəçiləri kimi çıxış edirlər. Artıq IV Beynəlxalq Multikulturalizm qış məktəbi ilə bağlı son hazırlıq işləri başa çatdırılıb. İnanırıq ki, Multikulturalizm Mərkəzi IV Beynəlxalq multikulturalizm qış məktəbini də əvvəl olduğu kimi yüksək səviyyədə həyata keçirərək, həm dövlətimizin başçısının müəyyənləşdirdiyi hədəfin gerçəkləşməsinə, həm də “İslam Həmrəyliyi ili”nə layiqli töhfələrini bəxş edəcək”.
Qeyd edək ki, IV Beynəlxalq Multikulturalizm qış məktəbində Azərbaycanla yanaşı, Portuqaliya, İtaliya, Almaniya, Rusiya, Çexiya, Bolqarıstan, Litva, İsrail, ABŞ, Makedoniya, Yunanıstan, Vyetnam, Gürcüstan, Qazaxıstan, Misir, Polşa, İordaniya və Rumıniyanın tanınmış universitetlərində təhsil alan tələbələr iştirak edəcəklər.