Gülər Əhmədova mətbuatla daha çox ünsiyyət saxlayan vəkili Raqif Mustafayevdən imtina edib. İstintaqdakı mənbələrdən “Yeni Müsavat”a verilən məlumata görə, sabiq deputatın imtinasına səbəb vəkilin media mediaya verdiyi açıqlamalardır. Xəbərə görə, G. Əhmədova bir neçə aydır ki, media ilə bütün ünsiyyəti sıfıra endirməyi tapşırıb.
Məlumatda bildirilir ki, G. Əhmədovanın qəzəblənməsinə R. Mustafayevin qadağadan öncə mediaya verdiyi müsahibə və açıqlamalar səbəb olub. Hazırda istintaq materialları ilə tanış olan sabiq deputat orda özünün əleyhinə olan bəzi məqamlarda vəkilinin ehtiyatsızlığından qəzəblənib. Onun fikrincə, R. Mustafayevin bütün açıqlamaları, müsahibələri daha çox öz təbliğatını aparmasına hesablanıb.
Daha bir versiya sabiq deputatla vəkili arasında yaranmış maddi problemlərlə bağlıdır. G. Əhmədovanın vəkillərinə qarşı əliaçıq olmaması bilinən gerçəkdir. Daha öncəki vəkili Eldar Qədimi ilə də yollarını sonuncuya qonorar verməməsi üzündən ayırmışdı. Ciddi maliyyə sıxıntısı yaşayan Əhmədovlar ailəsinin R. Mustafayevə qonorarını vaxtlı-vaxtında ödəməməsi də münasibətlərin korlanması ilə nəticələnib.