Rusiya prezidentinin mətbuat katibi Dmitri Peskov dekabrın 16-a jurnalistlərə açıqlamasında “Sepah”ın “Qüds” qanadının komandanı Qasım Süleymaninin Moskvaya səfəri və onun Vladimir Putinlə görüşməsi barədə yayılan məlumatları təkzib edib.
Dmitri Peskov, “İTAR-TASS” müxbirinin ona verdiyi “Süleymani və Putin həqiqətən bir-biri ilə görüşüb mü” sualını belə cavablandırıb: “Xeyir, bu düzgün məlumat deyil”.

İranın “Fars” agentliyi dekabrın 16-da özünün ingilisdilli bölməsində Qasım Süleymaninin Rusiyaya səfəri barədə məlumat yayıb. Məlumatda bildirilir ki, “Qüds” qüvvələrinin komandanı Qasım Süleymani ötən həftə üç günlüyə Moskvaya səfər edib və həmin müddətdə Rusiya prezidenti Vladimir Putinlə və Rusiyanın bir sıra hərbi komndanları ilə görüşüb. “Fars” agentliyinin yaydığı məlumatda hətta o da vurğulanır ki, baş tutan həmin görüşdə Putin, Qasım Süleymanini özünün “yoldaş”ı adlandırıb.

Qeyd edək ki, bir neçə ay əvvəl, Qasım Süleymaninin gizli şəkildə Moskvaya səfər etməsi və onun regiondakı durumla bağlı Rusiya rəsmiləri ilə danışıqlar aparması barədə məlumat yasyılsa da, hər iki ölkə bunu təkzib edib.



GunAz.tv