Söz Azadlığını Müdafiə Fondundan Butov.az saytına verilən məılumata görə, Çörək muzeyinin fəaliyyətinin bərpası ilə əlaqədar Heydər Əliyev Fondunun prezidenti, UNESKO və İSESKO-nun Xoşməramlı səfiri, millət vəkili Mehriban xanım Əliyevaya mürasiət ünvanlayıb. Müraciətdə deyilir ki, fond işğal altındakı maddi-mədəni irsimizin araşdırılması, qədim abidələrimizin tədqiq edilməsi, o cümlədən ölkəmizə və xalqımızın tarixinə dəymiş maddi-mənəvi zərərin miqyasının araşdırılması, əldə olunmuş real fakt və rəqəmlərin yerli və beynəlxalq ictimaiyyətin diqqətinə çatdırılması istiqamətində bir neçə layihənin həyata keçirilməsinə nail olmuşdur. Bu layihələr çərçivəsində keçmiş SSRİ dövründən fəaliyyət gostərmiş Ağdam Çörək Muzeyi ilə də bağlı geniş məzmunlu tədqiqat işi aparılmışdır. Son iki il ərzində isə fondun əməkdaşlarının ciddi səyi ilə muzeylə bağlı iyirmiyədək eksponat toplanmışdır. Müraciətdə deyilir ki, Ağdamda fəaliyyət göstərmiş dünyada ikinci, keçmiş SSRİ məkanında birinci olan Çörək Muzeyinin indi rayonun işğal altında olmayan ərazisində bərpasının böyük əhəmiyyəti vardır. Çünki ermənilərin torpaqlarımıza təcavüzü nəticəsində yandırılan bu muzeyin bərpası həm beynəlxalq aləmdə bizim haqlı mövqeyimizin sübutunda xüsusi rol oynayar, həm də gənclərdə çörəyə və hallalığa olan münasibətin müsbət istiqamətdə formalaşmasına, bu ruhda böyüyən gəncin vətən sevgisininə yetərincə şərait yaratmış olar. SAMF Mehriban xanım Əliyevaya müaraciət etməklə tariximizin bir parçasının eksponatlarını sərgiləyəcək muzeyin fəaliyətinin bərpasına dəstək verməyi xahiş edib. Qeyd edək ki, QHT bundan əvvəl Mədəniyyət və Turizm nazirliyinə, Ağdam RİH-ə və bir qrup Milli Məclis üzvünə eyni məzmunlu müraciət ünvanlayıb.

SAMF