Milli Mədəniyyətin Təbliği İctimai Birliyinin sədri, filologiya üzrə fəlsəfə doktoru Jalə Cəfərovanın Moderator.az-a göndərdiyi yazıda muğam müsabiqələrinin milli-mənəvi dəyərlərə verdiyi töhfə ilə yanaşı, münsiflər heyətinin bəzi üzvlərinin sərgilədiyi davranış tərzi məzəmmət edilir. Yazının ictimai əhəmiyyətini nəzərə alaraq Butov. az saytının oxucularına təqdim edirik:"Artıq ikinci həftədir ki ənənəvi “Muğam televiziya müsabiqəsi-2015 “ işinə start verib. Müsabiqənin canlı yayımlanması, təqdimatların səhnədəcə qiymətləndirilməsi hamının ürəyincədir. Ən azından necə deyərlər, hər şey göz qabağında. Göz qabağında olan mühüm cəhətlərdən biri və birincisi tərkibi (iki nəfərdən başqa) xalq artistlərindən təşkil olnmuş münsiflər heyətidir. Düzü, hər il diqqətlə izlədiyim və iştirak etdiyim müsabiqədə münsiflər heyətinin çox zaman gənc istedadlara etdikləri yersiz iradlar və haqsızlıqlar mənim kimi çoxlarının diqqətindən yayınmır. Hamımız bilirik ki, bu müsabiqənin əsas məqsədi yetişməkdə olan nəslin muğama olan sevgisini artırmaq, həmçinin yeni istedadların üzə çıxarmaqdır. Əvvəla, münsiflər heyətinin tərkibinin yeniləriylə əvəzlənməsi vacibdir. Ömründə iki adamın qarşısında çıxış etməyən bu fidanlar səhnəyə çıxar-çıxmaz beş-altı dəqiqəlik ifaları bitər-bitməz tənqid gülləboranına tuş olurlar. Yeddi münsiflər heyətinin hərəsi ən azı 10-15 dəqiqə yıxıb sürüyür bu uşaqları. Dünən bu “öyüd–nəsihətin” pik nöqtəsinin hamımız şahıdi olduq. 16 yaşlı gənc qıza xalq artistinin “ bir də bura bax, səhnədə HƏYASIZLIQ ETMƏ” deməsi heç bir halda qəbul edilən deyil. Bu nə səhnə mədəniyyətinin bütün atributlarını hamıdan gözəl bilən ağsaqqal el sənətkarının belə tənbehi zalda da çox narazılıqla qarşılandı.
P. S. Münsiflər heyətinin istənilən birinin bu uşaqlar yaşda olanda belə ifa etdiklərinə bir daha əminliklə inanmadım.
Jalə Cəfərova
Milli Mədəniyyətin Təbliği İctimai Birliyinin sədri, filologiya üzrə fəlsəfə doktoru