Ötən gün Nizami Kino Mərkəzində "Mahmud və Məryəm" filminin təqdimat mərasimi keçirilib. ANS PRESS-in məlumatına görə, tədbirdə dövlət və hökumət nümayəndələri, Milli Məclisin deputatları və KİV təmsilçiləri iştirak ediblər. Azərbaycan və qardaş ölkə Türkiyə birgə layihəsi olan filmdə "Mahmud" obrazını,daha öncə “Öyle bir geçer zaman ki” filmindən Mete kimi tanıdığımız Aras Bulut İynemli, "Məryəm" rolunu isə qazaxıstanlı Eva Dedova canlandırır. Açılışa baş rolun ifaçıları ilə yanaşı Türkiyənin bir neçə aktyorları da qatılıblar.

Çəkilişlərinə Şəki şəhərində başlanılan ekran əsərində Azərbaycanın məşhur sevilən aktyoru, xalq artisti Fəxrəddin Manafov, Türkiyədə yaşayıb və bir neçə filmlərdə yer alan Məlahət Abbasova, Şamil Süleymanov, Mehmet Çevik, Tomris İncer, Kristina Krapela və digər tanınmış aktyor və aktrisalar rol alıblar.

Azərbaycan dili ilə yanaşı, müxtəlif dillərə dublyaj olunması nəzərdə tutulan 120 dəqiqəlik "Mahmud və Məryəm" filmi Azərbaycan, Türkiyə, Rusiya və 9 Avropa ölkəsinin kinoteatrlarında, daha sonra isə televiziyada nümayiş olunacaq.

Qeyd edək ki, iki gəncin uğursuz sevgisindən bəhs edən filmin quruluşçu rejissoru Mehmet Ada Öztekin, prodüseri Sevda Kayğısızdır.