Modern.az-a bu haqda məlumat verən deputat Zahid Orucun sözlərinə görə, ötən il noyabrın 13-də Türkiyə və Azərbaycan hökumətləri arasında müvafiq saziş layihəsi razılaşdırılıb.
Hər iki ölkə müxtəlif vaxtlarda terrordan çox ciddi əziyyət çəkib, böyük itkilərə məruz qalıb. Türkiyənin həyatında PKK-nın adı və vurduğu ziyanlar bütün dünyaya bəllidir, Azərbaycan isə erməni terrorundan əziyyət çəkib. Belə olan təqdirdə iki ölkə arasında terrorçuluğa qarşı effektiv tədbirlərin həyata keçirilməsi təhlükəsizlik baxımından son dərəcə önəm daşıyır. Yalnız terror qruplarının öz adı ilə çağırılması, onun tanınması, mediada bunun bəyan edilməsi, terror qruplaşmalarına qarşı birgə əməliyyat tədbirləri, iki ölkənin təcrübələrinin bölüşdürülməsi, terror qruplarının hər hansı şəxslər və ya ictimai dairələr tərəfindən qarşısının alınması, hər hansı bir şəkildə terrorçulara sığınacaq verilməməsi kimi məsələlər çox önəmlidir. Bu sənədin mühüm əhəmiyyəti ondan ibarətdir ki, bəzən ölkə daxilində müxtəlif dairələrin Azərbaycanın PKK məsələsindəki baxışlarında fərqlər axtarırdılar. Bu sənədlə Azərbaycan hökuməti sübut edir ki, Türkiyə ilə Azərbaycanın terror hədəfləri eynidir. Terrorrçuluq onların vahid düşmənidir.

Millət vəkili bildirib ki, terrorçuluğa qarşı mübarizədə iki ölkənin birgə addımlar atması bu sahədə hərbi təhlükəsizlik əlaqələrimizin yaxınlaşması anlamına gələcək.

“Həmçinin regionda bu yöndə ayrı-ayrı dövlətlərin terrorçuluğu müdafiə edən siyasətinə qarşı ciddi zərbə olacaq. Odur ki, hər iki dövlətin imkanlarını birləşdirməsini təqdirəlayiq hal kimi qiymətləndirirəm”.

Deputat məsələnin Milli Məclisin Təhlükəsizlik və müdafiə komitəsində bu gün keçiriləcək iclasda müzakirə olunacağını deyib.

Bundan başqa, bugünkü komitə iclasında Avropa Şurasının terrorçuluğa qarşı konvensiyası da müzakirə olunacaq. Artıq parlamentə göndərilən “Avropa Şurasının terrorçuluğun qarşısının alınması haqqında Konvensiyasının təsdiq edilməsi ilə bağlı Azərbaycan Respublikasının Qanunu”na bu gün komitədə baxılacaq.

Zahid Oruc hesab edir ki, hər iki sənədə komitədə baxılandan sonra Milli Məclisin yaz sessiyasında müzakirəyə çıxarılacaq.

Gültəkin ƏLƏSGƏR